ദുബായ്: 2026-ന്റെ രണ്ടാം പകുതിയില്‍ ദുബായ് വാടക ഗണ്യമായ കുറയാന്‍ സാധ്യത. വര്‍ഷങ്ങളായി കുത്തനെ വര്‍ധിച്ചിരുന്ന വാടക നിരക്കുകളില്‍ നിന്ന് മാറി, വിപണി 'സാധാരണ നിലയിലേക്ക്' മടങ്ങുകയാണെന്ന് പ്രമുഖ പ്രോപ്പര്‍ട്ടി വിദഗ്ധര്‍ വിലയിരുത്തുന്നു. പുതിയ അപ്പാര്‍ട്ട്മെന്റുകളുടെ ലഭ്യത കൂടുന്നതോടെ വാടകക്കാര്‍ക്ക് ഈ കാലയളവില്‍ മികച്ച ഡീലുകള്‍ ലഭിക്കാന്‍ സാധ്യതയുണ്ടെന്നാണ് വിലയിരുത്തപ്പെടുന്നത്.
ജുമൈറ വില്ലേജ് സര്‍ക്കിള്‍, അര്‍ജാന്‍, ദുബായ് സിലിക്കണ്‍ ഒയാസിസ്, ഡിസ്‌കവറി ഗാര്‍ഡന്‍സ്, സ്പോര്‍ട്സ് സിറ്റി തുടങ്ങിയ പ്രദേശങ്ങളിലെ അപ്പാര്‍ട്ട്മെന്റുകള്‍ക്ക് വാടകയില്‍ ഇളവ് ലഭിക്കാന്‍ സാധ്യതയുണ്ട്. ഇവിടെ പുതിയ കെട്ടിടങ്ങളുടെ നിര്‍മ്മാണം പൂര്‍ത്തിയായി താമസക്കാര്‍ക്കായി തുറന്നുകൊടുക്കുന്നതോടെ കെട്ടിട ഉടമകള്‍ തമ്മിലുള്ള മത്സരം വര്‍ധിക്കുന്നത് വാടകക്കാര്‍ക്ക് ഗുണകരമാകും.
ബിസിനസ് ബേ, ദുബായ് സൗത്ത് തുടങ്ങിയ മേഖലകളിലും വലിയ തോതില്‍ പുതിയ യൂണിറ്റുകള്‍ വിപണിയിലെത്തുന്നുണ്ട്. ഇത്തരം പ്രദേശങ്ങളില്‍ പുതിയ വാടക കരാറുകളില്‍ ഏകദേശം 5% വരെ കുറവോ അല്ലെങ്കില്‍ നിരക്കുകളില്‍ മാറ്റമില്ലാതെയോ തുടരാനാണ് സാധ്യതയെന്ന് വിദഗ്ധര്‍ ചൂണ്ടിക്കാട്ടുന്നു. എങ്കിലും, ഈ ഇളവുകള്‍ പ്രധാനമായും പുതിയ കരാറുകള്‍ക്ക് മാത്രമാണ് ബാധകമാവുകയെന്നാണ് വിദഗ്ധരുടെ അഭിപ്രായം. നിലവില്‍ താമസിക്കുന്നവരുടെ വാടക വര്‍ധനവ് RERA സ്മാര്‍ട്ട് റെന്റല്‍ ഇന്‍ഡക്‌സ് പ്രകാരം നിയന്ത്രിക്കപ്പെടുന്നതിനാല്‍, നിലവിലെ താമസക്കാര്‍ക്ക് വലിയൊരു ആശ്വാസം ഉടന്‍ പ്രതീക്ഷിക്കേണ്ടതില്ലെന്നാണ് ഇതിനു കാരണമായി പറയുന്നത്.
അതേസയമം വില്ലകള്‍, വാട്ടര്‍ഫ്രണ്ട് വീടുകള്‍, പ്രീമിയം ഫാമിലി കമ്മ്യൂണിറ്റികള്‍ എന്നിവയുടെ ഡിമാന്‍ഡില്‍ കുറവുണ്ടായിട്ടില്ല. പാം ജുമൈറ, ബ്ലൂവാട്ടര്‍ ഐലന്‍ഡ്, ജുമൈറ ഗോള്‍ഫ് എസ്റ്റേറ്റ്‌സ്, ദുബായ് ഹില്‍സ് എസ്റ്റേറ്റ്, അറേബ്യന്‍ റാന്‍ചസ്, തിലാല്‍ അല്‍ ഗാഫ് തുടങ്ങിയ സ്ഥലങ്ങളില്‍ ലഭ്യത കുറവായതിനാല്‍ വാടകയില്‍ ചെറിയ വര്‍ധനവ് തുടരാന്‍ തന്നെയാണ് സാധ്യത. ദുബായ് ഹില്‍സ് എസ്റ്റേറ്റില്‍ 5% മുതല്‍ 8% വരെയും, അല്‍ മക്തൂം അന്താരാഷ്ട്ര വിമാനത്താവളത്തിന്റെ വികസനവുമായി ബന്ധപ്പെട്ട് ദുബായ് സൗത്തില്‍ 6% മുതല്‍ 10% വരെയും വാടക വര്‍ധനവ് ഉണ്ടായേക്കാമെന്നാണ് സൂചന.
വാടക ഇളവുകള്‍ പ്രയോജനപ്പെടുത്താന്‍ ആഗ്രഹിക്കുന്നവര്‍ക്ക് അടുത്ത കുറച്ചു മാസങ്ങള്‍ അനുകൂലമാണ്. പ്രത്യേകിച്ച് സ്‌കൂള്‍ അവധിക്കാലം കഴിഞ്ഞ് തിരക്ക് തുടങ്ങുന്നതിന് മുമ്പ് വീട് മാറുന്നത് കൂടുതല്‍ അഭികാമ്യമാവും. വാടക മാസങ്ങളായോ, പാദവാര്‍ഷികമായോ നല്‍കാന്‍ അനുവദിക്കുന്ന പുതിയ പദ്ധതികള്‍ പണലഭ്യതയില്‍ ബുദ്ധിമുട്ടുന്ന വാടകക്കാര്‍ക്ക് വലിയ ആശ്വാസമാണ്. പുതിയ കരാറുകളില്‍ ഇത്തരം സൗകര്യങ്ങള്‍ ചോദിച്ചുവാങ്ങാന്‍ വാടകക്കാര്‍ക്ക് സാധിക്കും.
Related News
