മക്ക: ഹിജ്‌റ പുതുവര്‍ഷാരംഭമായ മുഹറം ഒന്നിന് വിശുദ്ധ കഅബയെ പുതിയ പുതപ്പ് (കിസ് വ) അണിയിക്കുന്നതിനുള്ള ഒരുക്കങ്ങള്‍ മസ്ജിദുല്‍ ഹറാമില്‍ പൂര്‍ത്തിയായി. കിസ് വ മാറ്റുന്ന ചടങ്ങുകള്‍ക്കായി കൃത്യമായ പ്ലാനുകളോടെയുള്ള വിപുലമായ ഒരുക്കങ്ങളാണ് മാസങ്ങള്‍ക്ക് മുമ്പ് തന്നെ കിംഗ് അബ്ദുല്‍ അസീസ് കോംപ്ലക്‌സില്‍ ആരംഭിച്ചത്. നൂതന സാങ്കേതിക വിദ്യയും പരമ്പരാഗത കരവിരുതും ഒത്തുചേരുന്നതാണ് ഈ പ്രക്രിയ.
ഏറ്റവും ഉയര്‍ന്ന നിലവാരത്തിലും സമാനതകളില്ലാത്ത കരവിരുതിലും വിദഗ്ദ്ധരായ തൊഴിലാളികളാണ് കിസ് വ നിര്‍മ്മിച്ചിരിക്കുന്നത്. ശുദ്ധമായ പ്രകൃതിദത്ത പട്ടുനൂലില്‍ നെയ്‌തെടുത്ത വസ്ത്രത്തില്‍ സ്വര്‍ണ്ണ, വെള്ളി നൂലുകളാലാണ് മനോഹരമായ അലങ്കാരങ്ങളും ഖുര്‍ആന്‍ സൂക്തങ്ങളും എംബ്രോയ്ഡറി ചെയ്തിരിക്കുന്നത്.
പുതിയ കിസ് വയുടെ വിവിധ ഭാഗങ്ങള്‍ ഇതിനകം തന്നെ മസ്ജിദുല്‍ ഹറാമില്‍ നിശ്ചയിക്കപ്പെട്ട സ്ഥലങ്ങളിലേക്ക് മാറ്റിയിട്ടുണ്ട്. വസ്ത്രത്തില്‍ പതിച്ചിരിക്കുന്ന എംബ്രോയ്ഡറി ചെയ്ത കഷണങ്ങള്‍, ഇസ്ലാമിക അലങ്കാരങ്ങള്‍, ഖുര്‍ആന്‍ വചനങ്ങള്‍ എന്നിവയുടെ അന്തിമ പരിശോധനകള്‍ പൂര്‍ത്തിയായി വരുന്നു.
ഏറ്റവും കൃത്യതയും ശ്രദ്ധയും ആവശ്യപ്പെടുന്ന ഈ ദൗത്യം നിര്‍വ്വഹിക്കുന്നത് ദശകങ്ങളുടെ പരിചയസമ്പന്നരായ സൗദിയിലെ വിദഗ്ദ്ധ എഞ്ചിനീയറിംഗ്-സാങ്കേതിക സംഘമാണ്. കിസ് വ മാറ്റുന്ന പ്രക്രിയ യാതൊരുവിധ തടസ്സങ്ങളുമില്ലാതെ സുഗമമായി പൂര്‍ത്തിയാക്കുന്നതിനായുള്ള എല്ലാ സാങ്കേതിക ക്രമീകരണങ്ങളും ഹറം അധികൃതര്‍ പൂര്‍ത്തിയാക്കിയിട്ടുണ്ട്.
Related News
