റിയാദ്- സൗദി വിദേശകാര്യ മന്ത്രി ഫൈസല്‍ ബിന്‍ ഫര്‍ഹാന്‍ രാജകുമാരന്‍ ലെബനന്‍ പ്രധാനമന്ത്രി ഡോ. നവാഫ് സലാമുമായി ടെലിഫോണ്‍ ചര്‍ച്ച നടത്തി. ലെബനനില്‍ നിന്നുള്ള ഉല്‍പ്പന്നങ്ങളുടെ ഇറക്കുമതി രാജ്യത്തേക്ക് പുനരാരംഭിക്കാന്‍ സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിന്‍ സല്‍മാന്‍ ബിന്‍ അബ്ദുല്‍ അസീസ് രാജകുമാരന്‍ നല്‍കിയ നിര്‍ദ്ദേശം അദ്ദേഹം ലെബനന്‍ പ്രധാനമന്ത്രിയെ അറിയിച്ചു. ലെബനന്‍ പ്രസിഡന്റ് ജോസഫ് ഔണിന്റെയും പ്രധാനമന്ത്രിയുടെയും അഭ്യര്‍ത്ഥന മാനിച്ചാണ് ഈ നിര്‍ണായക തീരുമാനം എടുത്തിരിക്കുന്നത്.
ലെബനന്‍ സര്‍ക്കാര്‍ തങ്ങളുടെ ഭരണഘടനാ സ്ഥാപനങ്ങളെ പുനര്‍നിര്‍മ്മിക്കുന്ന പ്രക്രിയയില്‍ സ്വീകരിച്ച നല്ല നീക്കങ്ങളുടെയും, കഴിഞ്ഞ ഒരു വര്‍ഷമായി പ്രത്യേക സംഘങ്ങള്‍ കൈവരിച്ച നേട്ടങ്ങളുടെയും അടിസ്ഥാനത്തിലാണ് സൗദിയുടെ ഈ പുതിയ നടപടി. ഈ പ്രക്രിയയില്‍ ലെബനന്‍ ഭാഗത്തുനിന്നുണ്ടായ മികച്ച സഹകരണവും അവര്‍ നല്‍കിയ ആവശ്യമായ ഉറപ്പുകളും ഈ തീരുമാനത്തിലേക്ക് നയിക്കുന്നതില്‍ പ്രധാന പങ്കുവഹിച്ചു.
ടെലിഫോണ്‍ സംഭാഷണത്തില്‍, ലെബനന്റെ സുസ്ഥിരതയ്ക്കും അതിന്റെ മുഴുവന്‍ പ്രദേശങ്ങളിലെയും പരമാധികാരത്തിനും ഒപ്പം അവിടുത്തെ സഹോദരങ്ങളായ ജനങ്ങളുടെ ക്ഷേമത്തിനും സൗദി അറേബ്യ നല്‍കുന്ന പിന്തുണ വിദേശകാര്യ മന്ത്രി ആവര്‍ത്തിച്ചു വ്യക്തമാക്കി. ഇരു രാജ്യങ്ങളും തമ്മിലുള്ള സൗഹൃദവും സഹകരണവും കൂടുതല്‍ ദൃഢമാക്കാന്‍ ഈ തീരുമാനം സഹായിക്കുമെന്നാണ് പ്രതീക്ഷിക്കുന്നത്.
സഹോദര രാജ്യങ്ങള്‍ക്ക് ദോഷം വരുത്തുന്ന ഒരു വേദിയായി ലെബനനെ ഉപയോഗിക്കുന്നില്ലെന്ന് ഉറപ്പാക്കാന്‍ ലെബനനിലെ ഭരണാധികാരികള്‍ ആവശ്യമായ എല്ലാ നടപടികളും സ്വീകരിക്കുമെന്ന് അദ്ദേഹം ആത്മവിശ്വാസം പ്രകടിപ്പിച്ചു. പ്രാദേശിക സുരക്ഷയും സമാധാനവും മുന്‍നിര്‍ത്തി ഇരുരാജ്യങ്ങളും കൈകോര്‍ത്തു നീങ്ങേണ്ടതിന്റെ പ്രാധാന്യവും ചര്‍ച്ചയില്‍ അടിവരയിട്ടു.
Related News
