ദുബായ്: ദുബായ് എമിറേറ്റ്‌സ് റോഡിലുണ്ടായ ദാരുണമായ വാഹനാപകടത്തില്‍ ജീവന്‍ നഷ്ടപ്പെട്ടവരുടെയും പരിക്കേറ്റവരുടെയും കുടുംബങ്ങള്‍ക്ക് 2.6 കോടി രൂപയുടെ സമഗ്ര പുനരധിവാസ പാക്കേജ് പ്രഖ്യാപിച്ച് പ്രമുഖ വ്യവസായിയും ബുര്‍ജീല്‍ ഹോള്‍ഡിങ്‌സ് ചെയര്‍മാനുമായ ഡോ. ഷംഷീര്‍ വയലില്‍.

അപകടത്തില്‍ ജീവന്‍ നഷ്ടപ്പെട്ട ആറ് ഇന്ത്യക്കാരടക്കം ഏഴ് പേരുടെ കുടുംബങ്ങള്‍ക്ക് 26 ലക്ഷം രൂപ വീതം നല്‍കും. രണ്ട് മലയാളികള്‍ ഉള്‍പ്പെടെ പരിക്കേറ്റ ഒന്‍പത് പേരുടെ അടിയന്തര ചികിത്സയ്ക്കും പുനരധിവാസത്തിനുമായി 47 ലക്ഷം രൂപ വകയിരുത്തി. അപകടത്തില്‍പ്പെട്ടവരുടെ കുടുംബാംഗങ്ങളുടെ അടിയന്തര യാത്രാ-താമസ ആവശ്യങ്ങള്‍ക്കായി 18 ലക്ഷം രൂപയും അനുവദിച്ചു. ഇരകളായവരുടെ കുട്ടികളുടെ വിദ്യാഭ്യാസ ആവശ്യങ്ങള്‍ക്കായി 13 ലക്ഷം രൂപയും നീക്കിവെച്ചിട്ടുണ്ട്.

കമ്പനി ജീവനക്കാരുമായി പോവുകയായിരുന്ന മിനിബസ്, സാങ്കേതിക തകരാറിനെ തുടര്‍ന്ന് റോഡില്‍ നിര്‍ത്തിയിട്ടിരുന്ന ട്രക്കിലിടിച്ചാണ് അപകടം നടന്നത്. ഇന്ത്യ, ശ്രീലങ്ക സ്വദേശികളായ തൊഴിലാളികളാണ് ബസിലുണ്ടായിരുന്നത്. മരിച്ച ഇന്ത്യക്കാരില്‍ മൂന്ന് പേര്‍ ഉത്തര്‍പ്രദേശ് സ്വദേശികളും മൂന്ന് പേര്‍ തെലങ്കാനയില്‍ നിന്നുമുള്ളവരുമാണ്. പരിക്കേറ്റവരില്‍ രണ്ട് പേര്‍ മലയാളികളാണ്. നിലവില്‍ പരിക്കേറ്റവരില്‍ മൂന്ന് പേര്‍ വിവിധ ആശുപത്രികളില്‍ ചികിത്സയില്‍ തുടരുന്നു.

കുടുംബത്തിന്റെ ഏക ആശ്രയം നഷ്ടപ്പെട്ടവര്‍ക്ക് അടിയന്തര ആശ്വാസം നല്‍കുന്നതിനൊപ്പം, അവരുടെ ഭാവി സുരക്ഷിതമാക്കാനും ചെറിയ കുട്ടികളുള്ള കുടുംബങ്ങള്‍ക്ക് പ്രത്യേക പരിഗണന നല്‍കാനും പാക്കേജിലൂടെ ലക്ഷ്യമിടുന്നു. ദുബായിലെ ഇന്ത്യന്‍ കോണ്‍സുലേറ്റുമായി സഹകരിച്ചാണ് സഹായം എത്തിക്കുന്നതെന്ന് ഡോ. ഷംഷീര്‍ വ്യക്തമാക്കി.

'പ്രിയപ്പെട്ടവരുടെ വിയോഗം നികത്താനാവില്ലെങ്കിലും, ഈ പ്രയാസകരമായ ഘട്ടത്തില്‍ കുടുംബങ്ങള്‍ക്ക് ഇതൊരു ചെറിയ ആശ്വാസമാകുമെന്ന് കരുതുന്നു' - ഡോ. ഷംഷീര്‍ വയലില്‍ പറഞ്ഞു. മുന്‍പും സമാനമായ ദുരന്തങ്ങളില്‍ അടിയന്തര സഹായങ്ങളുമായി അദ്ദേഹം രംഗത്തെത്തിയിട്ടുണ്ട്.