മുംബൈ- ചലച്ചിത്ര സംവിധായകന്‍ ബുച്ചി ബാബു സന തന്റെ പുതിയ ചിത്രമായ 'പെഡ്ഡി'യില്‍ നടി ജാന്‍വി കപൂറിന്റെ കഥാപാത്രത്തെ അമിതമായി ലൈംഗികവല്‍ക്കരിച്ച് ചിത്രീകരിച്ചതിനെതിരെ ഉയര്‍ന്ന കടുത്ത വിമര്‍ശനങ്ങളെ തുടര്‍ന്ന് പരസ്യമായി മാപ്പ് പറഞ്ഞു. ചിത്രത്തിലെ ചില രംഗങ്ങള്‍ക്കെതിരെ ഓണ്‍ലൈനില്‍ വന്‍ പ്രതിഷേധം ഉയര്‍ന്ന പശ്ചാത്തലത്തിലാണ് പ്രേക്ഷകരുടെ പ്രതികരണങ്ങള്‍ മാനിച്ചുകൊണ്ട് ആവശ്യമായ മാറ്റങ്ങള്‍ വരുത്തുമെന്ന് സംവിധായകന്‍ വ്യക്തമാക്കിയത്. അനാവശ്യമായ ക്യാമറ ആംഗിളുകള്‍, പീഡനത്തെയും പീഡനശ്രമങ്ങളെയും സാധാരണവല്‍ക്കരിക്കുന്ന ഡയലോഗുകള്‍ എന്നിവയാണ് ജാന്‍വി അവതരിപ്പിച്ച 'അച്ചിയമ്മ' എന്ന കഥാപാത്രത്തെ ചുറ്റിപ്പറ്റിയുള്ള വിവാദങ്ങള്‍ക്ക് കാരണമായത്.
സിനിമ, പ്രേക്ഷകരെ രസിപ്പിക്കാനും പ്രചോദിപ്പിക്കാനുമുള്ളതാണെന്നും, അത് ആരെയും അസ്വസ്ഥരാക്കാനോ അപമാനിക്കാനോ ഇടയാക്കരുതെന്നും ബുച്ചി ബാബു എക്‌സ് പ്ലാറ്റ്ഫോമില്‍ പങ്കുവെച്ച കുറിപ്പില്‍ പറഞ്ഞു. ഒരു സ്ത്രീ കഥാപാത്രത്തെയും മോശമായി ചിത്രീകരിക്കാന്‍ തങ്ങള്‍ ഉദ്ദേശിച്ചിട്ടില്ലെന്നും, എങ്കിലും പ്രേക്ഷകരുടെ വികാരങ്ങളെ പൂര്‍ണ്ണമായി ബഹുമാനിക്കുന്നുവെന്നും അദ്ദേഹം കൂട്ടിച്ചേര്‍ത്തു. സ്ത്രീകളെ അന്തസ്സോടെയും ബഹുമാനത്തോടെയും മാത്രമേ സ്‌ക്രീനില്‍ അവതരിപ്പിക്കാവൂ എന്ന നിലപാടില്‍ താന്‍ ഉറച്ചുനില്‍ക്കുന്നുവെന്നും അദ്ദേഹം വ്യക്തമാക്കി.
നിലവില്‍ ചിത്രത്തിന്റെ പോസ്റ്റ്-പ്രൊഡക്ഷന്‍ ജോലികള്‍ പുരോഗമിക്കുകയാണെന്നും വിമര്‍ശനങ്ങള്‍ക്ക് കാരണമായ രംഗങ്ങളില്‍ ആവശ്യമായ തിരുത്തലുകള്‍ വരുത്തിയ ശേഷമേ ചിത്രം തിയേറ്ററുകളില്‍ എത്തിക്കൂ എന്നും സംവിധായകന്‍ ഉറപ്പുനല്‍കി. പ്രേക്ഷകരുടെ പ്രതികരണങ്ങള്‍ക്കനുസരിച്ച് സിനിമകളും മാറേണ്ടതുണ്ടെന്നും, ഉത്തരവാദിത്തമുള്ള കഥാഖ്യാനമാണ് താന്‍ ലക്ഷ്യമിടുന്നതെന്നും പറഞ്ഞ ബുച്ചി ബാബു, തങ്ങളുടെ തെറ്റുകള്‍ ചൂണ്ടിക്കാണിച്ച പ്രേക്ഷകര്‍ക്ക് നന്ദി അറിയിക്കുകയും ചെയ്തു.
Related News
