ന്യൂഡല്‍ഹി: തെക്കന്‍ ഡല്‍ഹിയിലെ മാളവ്യ നഗറിലെ ഹോട്ടലിലുണ്ടായ വന്‍ തീപിടിത്തത്തില്‍ 20 പേര്‍ മരിച്ചു. 25 വിദേശികളടക്കം നിരവധി പേര്‍ക്ക് പരിക്ക്. നിരവധി പേരെ രക്ഷപ്പെടുത്തി. ഇന്ന് രാവിലെ 8.50-ഓടെയാണ് അഞ്ചുനില കെട്ടിടത്തിന്റെ ബേസ്മെന്റില്‍ പ്രവര്‍ത്തിക്കുന്ന 'മിക്കാസ ഇന്‍' ഹോട്ടലിലെ റെസ്റ്റോറന്റില്‍ തീപിടിത്തമുണ്ടായത്.
തീപിടിത്തമുണ്ടാകുമ്പോള്‍ കെട്ടിടത്തിനുള്ളില്‍ നാല്‍പ്പതോളം പേര്‍ ഉണ്ടായിരുന്നതായാണ് വിവരം. ഇടുങ്ങിയ ലെയ്‌നുകള്‍ നിറഞ്ഞ ഹൗസ് റാണി പ്രദേശത്താണ് ഈ ഹോട്ടല്‍ സ്ഥിതി ചെയ്യുന്നത്. ചികിത്സയ്ക്കായി ഇന്ത്യയിലെത്തിയ വിദേശികളായിരുന്നു ഹോട്ടലിലെ 25 മുറികളിലായി താമസിച്ചിരുന്ന അതിഥികളില്‍ ഭൂരിഭാഗവും. തീപിടിത്തമുണ്ടാകുമ്പോള്‍ ഇവരില്‍ പലരും ഉറക്കത്തിലായിരുന്നു.
കെട്ടിടത്തില്‍ നിന്ന് തീയും പുകയും ഉയരുന്നത് കണ്ട് ജീവന്‍ രക്ഷിക്കാനായി ചിലര്‍ മുകളില്‍ നിന്ന് താഴേക്ക് ചാടുന്നതിന്റെ ദൃശ്യങ്ങള്‍ പുറത്തുവന്നിട്ടുണ്ട്. തീപിടിത്തത്തിന്റെ കൃത്യമായ കാരണം ഇതുവരെ കണ്ടെത്താനായിട്ടില്ല.
'എല്ലാം പെട്ടെന്നായിരുന്നു'; ഭീതിജനകമായ നിമിഷങ്ങള്‍ റെസ്റ്റോറന്റിലെ ഷെഫായ കേസരി സിംഗ് വിവരങ്ങള്‍ പങ്കുവെച്ചു.
'രാവിലെ എട്ട് മണിയോടെ ഇലക്ട്രിക് സ്റ്റൗ ഓണ്‍ ചെയ്യാന്‍ ശ്രമിച്ചപ്പോഴാണ് പെട്ടെന്ന് തീജ്വാലകള്‍ ഉയര്‍ന്നത്. അപ്പോഴാണ് ഹോട്ടലില്‍ ഇതിനകം തന്നെ തീ പടര്‍ന്നുപിടിച്ച കാര്യം ഞാന്‍ മനസ്സിലാക്കുന്നത്. ഹോട്ടലിന് തീപിടിച്ച വിവരം ഞാന്‍ ഉടന്‍ തന്നെ കൂടെയുണ്ടായിരുന്ന അസിസ്റ്റന്റിനെ അറിയിക്കുകയും ആളുകളെ മാറ്റാന്‍ ശ്രമിക്കുകയുമായിരുന്നു,' കേസരി സിംഗ് പറഞ്ഞു.
Related News
