കുവൈറ്റ് സിറ്റി: കുവൈറ്റ് അന്താരാഷ്ട്ര വിമാനത്താവളത്തിലെ ടെര്മിനല് ഒന്നിന് നേരെ ഇറാന്റെ മിസൈല്, ഡ്രോണ് ആക്രമണം. ആക്രമണത്തില് ആളപായവും വിമാനത്താവളത്തിലെ വിവിധ സൗകര്യങ്ങള്ക്ക് വന് നാശനഷ്ടവും സംഭവിച്ചതിനെ തുടര്ന്ന് സിവില് ഏവിയേഷന് പബ്ലിക് അതോറിറ്റി (PACA) അടിയന്തരാവസ്ഥ പ്രഖ്യാപിച്ചു.
അപകടത്തെ തുടര്ന്ന് വിമാനത്താവളത്തിന്റെ പ്രവര്ത്തനം താത്കാലികമായി നിര്ത്തിവെച്ചതായും സര്വീസുകള് അടുത്തുള്ള മറ്റ് വിമാനത്താവളങ്ങളിലേക്ക് തിരിച്ചുവിട്ടതായും സിവില് ഏവിയേഷന് വക്താവ് അബ്ദുള്ള അല് രാജി അറിയിച്ചു. ഔദ്യോഗിക വാര്ത്താ ഏജന്സിയായ 'കുന' (KUNA) പുറത്തുവിട്ട പ്രസ്താവനയിലാണ് അദ്ദേഹം ഇക്കാര്യം വ്യക്തമാക്കിയത്.
യാത്രക്കാരുടെയും ജീവനക്കാരുടെയും സുരക്ഷ ഉറപ്പാക്കുന്നതിനും വിമാനത്താവളത്തിന്റെ സുരക്ഷിതത്വം പുനഃസ്ഥാപിക്കുന്നതിനുമായി മുന്കൂട്ടി നിശ്ചയിച്ചിട്ടുള്ള അടിയന്തര പ്രോട്ടോക്കോളുകള് പ്രകാരമാണ് അധികൃതര് നിലവില് നടപടികള് സ്വീകരിച്ചു വരുന്നത്. സുരക്ഷാ-സാങ്കേതിക മുന്കരുതലുകള് പൂര്ണ്ണതോതില് നടപ്പിലാക്കിയ ശേഷമേ വിമാനത്താവളത്തിന്റെ പ്രവര്ത്തനം സാധാരണ നിലയിലാകൂ എന്ന് അദ്ദേഹം കൂട്ടിച്ചേര്ത്തു.
ആക്രമണത്തിലുണ്ടായ നാശനഷ്ടങ്ങളുടെ വ്യാപ്തി കണക്കാക്കാന് സാങ്കേതിക വിദഗ്ധരുടെ സംഘം പരിശോധന നടത്തിവരികയാണ്. ഇതിന് ശേഷമായിരിക്കും തകരാറിലായ ഭാഗങ്ങളുടെ അറ്റകുറ്റപ്പണികള് ആരംഭിക്കുകയെന്നും അല് രാജി വ്യക്തമാക്കി.
Related News
