ടെഹ്‌റാന്‍: യുഎസുമായും ഇസ്രായേലുമായുള്ള യുദ്ധത്തെത്തുടര്‍ന്ന് നീണ്ടുപോയ മുന്‍ പരമോന്നത നേതാവ് ആയത്തുള്ള അലി ഖാംനഇയുടെ ഭൗതികശരീരം വന്‍ ജനപങ്കാളിത്തത്തോടെ സംസ്‌കരിക്കുന്നതിനുള്ള ഒരുക്കങ്ങള്‍ ഇറാന്‍ അധികൃതര്‍ ആരംഭിച്ചതായി ഔദ്യോഗിക മാധ്യമങ്ങള്‍ റിപ്പോര്‍ട്ട് ചെയ്തു.
സംസ്‌കാര ചടങ്ങുകളുടെ തീയതി ഔദ്യോഗികമായി പ്രഖ്യാപിച്ചിട്ടില്ലെങ്കിലും, ചടങ്ങുകള്‍ ആസൂത്രണം ചെയ്യുന്നതിനും മേല്‍നോട്ടം വഹിക്കുന്നതിനുമായി ഒരു പ്രത്യേക ആസ്ഥാനം രൂപീകരിച്ചിട്ടുണ്ടെന്ന് ടെഹ്‌റാന്‍ ഇസ്ലാമിക് പ്രൊപഗണ്ട കോര്‍ഡിനേഷന്‍ കൗണ്‍സില്‍ മേധാവി മൊഹ്‌സിന്‍ മഹ്‌മൂദിയെ ഉദ്ധരിച്ച് ഇറാന്‍ സ്റ്റേറ്റ് ടെലിവിഷന്‍ റിപ്പോര്‍ട്ട് ചെയ്തു. വിവിധ സര്‍ക്കാര്‍ ഏജന്‍സികള്‍ നിലവില്‍ ഇതിനായുള്ള ക്രമീകരണങ്ങള്‍ നടത്തിവരികയാണ്.
മൂന്ന് പതിറ്റാണ്ടിലേറെക്കാലം ഇസ്ലാമിക റിപ്പബ്ലിക്കിനെ നയിച്ച അലി ഖാംനഇ, ഫെബ്രുവരി 28-ന് യുഎസും ഇസ്രായേലും നടത്തിയ ആദ്യഘട്ട വ്യോമാക്രമണത്തിലാണ് കൊല്ലപ്പെട്ടത്. ഈ ആക്രമണത്തിലാണ് ഇരുരാജ്യങ്ങളും തമ്മിലുള്ള യുദ്ധം പൊട്ടിപ്പുറപ്പെട്ടത്. ആക്രമണത്തില്‍ ഖമേനിയുടെ മകനും നിലവിലെ പിന്‍ഗാമിയുമായ മുജ്തബ ഖാംനഇക്കും പരിക്കേറ്റിരുന്നു. പരമോന്നത നേതാവായി ചുമതലയേറ്റ ശേഷം ഇദ്ദേഹം ഇതുവരെ പൊതുവേദികളില്‍ പ്രത്യക്ഷപ്പെട്ടിട്ടില്ല.
കഴിഞ്ഞ ഏപ്രില്‍ മാസത്തില്‍ അലി ഖാംനഇക്ക് ആദരാഞ്ജലികള്‍ അര്‍പ്പിച്ചുകൊണ്ട് ഒരു അനുസ്മരണ ചടങ്ങ് സംഘടിപ്പിച്ചിരുന്നു. എന്നാല്‍ യുദ്ധ സാഹചര്യം നിലനിന്നിരുന്നതിനാല്‍ ഔദ്യോഗിക ബഹുമതികളോടെയുള്ള സംസ്‌കാര ചടങ്ങുകള്‍ നടത്താന്‍ സാധിച്ചിരുന്നില്ല. ഔദ്യോഗിക പ്രഖ്യാപനം ഉണ്ടാകുന്നതോടെ വന്‍ ജനപങ്കാളിത്തത്തോടെ 'സംസ്‌കാര ചടങ്ങ്' നടത്തുന്നതിന് ആവശ്യമായ എല്ലാ സാഹചര്യങ്ങളും ഒരുക്കാന്‍ വിവിധ സംഘടനകള്‍ ഒന്നിച്ച് പ്രവര്‍ത്തിക്കുകയാണെന്ന് മഹ്‌മൂദി അറിയിച്ചു.
കഴിഞ്ഞ ഏപ്രില്‍ മുതല്‍ ഇരുപക്ഷവും തമ്മില്‍ താല്‍ക്കാലിക വെടിനിര്‍ത്തല്‍ നിലവിലുണ്ടെങ്കിലും, യുദ്ധം പൂര്‍ണ്ണമായി അവസാനിപ്പിക്കുന്നതിനുള്ള സ്ഥിരമായൊരു സമാധാന കരാറില്‍ ഒപ്പുവെക്കാന്‍ ഇതുവരെ സാധിച്ചിട്ടില്ല.
Related News
