ദുബായ്: യുഎഇയിലെ പ്രശസ്തമായ ബിഗ് ടിക്കറ്റ് നറുക്കെടുപ്പില്‍ മലയാളി യുവാവിന് ഒന്നാം സമ്മാനമായ 45 കോടിയിലധികം രൂപ (20 മില്യണ്‍ ദിര്‍ഹം) സമ്മാനമായി ലഭിച്ചു. മൂവാറ്റുപുഴ സ്വദേശിയായ ഷാമോന്‍ ഷാജിയാണ് ഈ കോടിപതിയായ ഭാഗ്യശാലി. കേരളത്തില്‍ ബിസിനസ്സ് നടത്തുന്ന 32-കാരനായ ഷാമോന്‍ ഷാജി, ദുബായിലുള്ള ഭാര്യയുടെ മാതാപിതാക്കളെ സന്ദര്‍ശിക്കാനായി കുടുംബത്തോടൊപ്പം ഗള്‍ഫിലെത്തിയതായിരുന്നു.

ബിഗ് ടിക്കറ്റിന്റെ 285-ാം സീരീസ് നറുക്കെടുപ്പിലാണ് ഷാമോന്‍ ഭാഗ്യവാനായത്. മാര്‍ച്ച് 22-ന് ഓണ്‍ലൈന്‍ വഴി എടുത്ത 229425 എന്ന നമ്പറിലുള്ള ടിക്കറ്റിനായിരുന്നു സമ്മാനം. കഴിഞ്ഞ മൂന്ന് മാസമായി മാത്രമാണ് അദ്ദേഹം ബിഗ് ടിക്കറ്റില്‍ ഭാഗ്യം പരീക്ഷിക്കാന്‍ തുടങ്ങിയത്. നറുക്കെടുപ്പ് തത്സമയം നടക്കുമ്പോള്‍ ഷാമോന്‍ ഭാര്യ എലീനയ്ക്കും മക്കള്‍ക്കും ഭാര്യാപിതാവിനുമൊപ്പം കാറില്‍ യാത്ര ചെയ്യുകയായിരുന്നു.

ലൈവ് വീഡിയോയില്‍ ഓരോ നമ്പറുകളായി പ്രഖ്യാപിച്ചപ്പോള്‍ വലിയ നെഞ്ചിടിപ്പോടെയാണ് നോക്കിയിരുന്നതെന്നും, അവസാന നിമിഷം തന്റെ പേര് സ്‌ക്രീനില്‍ തെളിഞ്ഞപ്പോള്‍ കാറിലിരുന്ന എല്ലാവരും സന്തോഷം കൊണ്ട് ഒന്നിച്ച് നിലവിളിച്ചു പോയെന്നും ഷാമോന്‍ ഓര്‍ക്കുന്നു. ടിക്കറ്റ് അടിച്ച വിവരം അറിഞ്ഞ ഉടന്‍ അദ്ദേഹം നാട്ടിലുള്ള തന്റെ പിതാവിനെയാണ് ആദ്യം വിളിച്ച് വിവരം അറിയിച്ചത്.

'എല്ലാവരെയും പോലെ സാമ്പത്തിക ഭദ്രതയും നല്ലൊരു ബാങ്ക് ബാലന്‍സും എന്റെയും സ്വപ്നമായിരുന്നു. ഈ വിജയം ആ ലക്ഷ്യത്തിലേക്കുള്ള വലിയൊരു ചുവടുവയ്പാണ്. ഈ തുക ഉപയോഗിച്ച് എന്റെ ബിസിനസ്സ് ദുബായിലേക്ക് കൂടി വ്യാപിപ്പിക്കാന്‍ ഞാന്‍ ആഗ്രഹിക്കുന്നു. ഇതൊരു പുതിയ യാത്രയുടെ തുടക്കം മാത്രമാണ്.' ഷാമോന്‍ വ്യക്തമാക്കി.

കൂട്ടുകാരും ബന്ധുക്കളുമൊക്കെയായി നിരവധി മലയാളികള്‍ക്ക് മുന്‍പും വലിയ സമ്മാനങ്ങള്‍ അടിച്ചിട്ടുണ്ടെങ്കിലും, ഒറ്റയ്ക്ക് ടിക്കറ്റെടുത്ത് ഇത്രയും വലിയ തുക സ്വന്തമാക്കാന്‍ കഴിഞ്ഞതിന്റെ സന്തോഷത്തിലാണ് ഷാമോനും കുടുംബവും.