മക്ക: ഐസിഎഫ് - ആര്‍എസ്സി ഹജ്ജ് വളണ്ടിയര്‍ കോര്‍ ക്യാമ്പ് മക്കയില്‍ ഉദ്ഘാടനം ചെയ്തു. മിനയില്‍ മൂന്ന് ദിവസങ്ങളായി നടക്കുന്ന 'മിന മിഷന്‍' പ്രവര്‍ത്തനങ്ങളെ ഏകോപിപ്പിക്കുന്നതിനായാണ് ഹജ്ജ് വളണ്ടിയര്‍ ക്യാമ്പ് പ്രവര്‍ത്തിക്കുക. ICF മക്ക പ്രസിഡന്റ് അബ്ദുല്‍ റഷീദ് അസ്ഹരി ഉദ്ഘാടനം നിര്‍വഹിച്ചു. HVC മക്ക ചെയര്‍മാന്‍ ഹനീഫ അമാനി അധ്യക്ഷത വഹിച്ചു. വളണ്ടിയര്‍മാര്‍ക്കുള്ള സ്‌പെഷ്യല്‍ കിറ്റ് വിതരണം ജമാല്‍ കക്കാട്, റാഷിദ് മാട്ടൂലിന് നല്‍കി ഉദ്ഘാടനം ചെയ്തു.
കേരള മുസ്ലിം ജമാഅത്തിന്റെ പ്രവാസി ഘടകമായ ഐസിഎഫും ആര്‍എസ്സിയും ചേര്‍ന്നാണ് ഹജ്ജ് വളണ്ടിയര്‍ കോര്‍ പ്രവര്‍ത്തനങ്ങള്‍ ഏകോപിപ്പിക്കുന്നത്. പതിറ്റാണ്ടുകളായി ഹാജിമാര്‍ക്ക് സ്തുത്യര്‍ഹമായ രീതിയില്‍ സേവനം നല്‍കിവരികയാണ് ഐസിഎഫ് - ആര്‍എസ്സി വളണ്ടിയര്‍ കോര്‍. ഇരു ഹറമുകളിലും ജിദ്ദ, മദീന വിമാനത്താവളങ്ങളിലും മിന, അറഫ, മുസ്ദലിഫ തുടങ്ങിയ പുണ്യസ്ഥലങ്ങളിലും വളണ്ടിയര്‍മാരുടെ സേവനം ലഭ്യമാക്കുന്നുണ്ട്.
പുണ്യഭൂമിയില്‍ ആദ്യ ഹജ്ജ് സംഘം എത്തിയത് മുതല്‍ ഹാജിമാര്‍ക്കുള്ള എല്ലാ സേവനങ്ങളും വളണ്ടിയര്‍ കോര്‍ നല്‍കിവരുന്നു. ഇരു ഹറമുകളിലും അസീസിയ, നസീം തുടങ്ങി ഹാജിമാരുടെ താമസസ്ഥലങ്ങളിലും അവര്‍ക്കാവശ്യമായ ഭക്ഷണസാധനങ്ങളും മറ്റ് സഹായങ്ങളും വളണ്ടിയര്‍ കോര്‍ എത്തിക്കുന്നുണ്ട്.
ഹാജിമാര്‍ക്ക് കൂടുതല്‍ സഹായങ്ങള്‍ ആവശ്യമായി വരുന്ന മിനയിലെ വളണ്ടിയര്‍ പ്രവര്‍ത്തനങ്ങള്‍ ക്രോഡീകരിക്കുന്നതിനും, വളണ്ടിയര്‍മാരുടെ താമസസൗകര്യത്തിനുവേണ്ടിയുമാണ് ഈ വളണ്ടിയര്‍ ക്യാമ്പ് തുറന്നിരിക്കുന്നത്.
ഉദ്ഘാടന പരിപാടിയില്‍ സാദിഖ് ചാലിയാര്‍, റഷീദ് പന്തല്ലൂര്‍, നൗഫല്‍ മുസ്ലിയാര്‍ ജിദ്ദ, ശിഹാബ് കുറുകത്താണി, അബൂബക്കര്‍ കണ്ണൂര്‍, ഇസ്ഹാഖ് ഖാദിസിയ്യ എന്നിവര്‍ സംബന്ധിച്ചു.
Related News
