ജിദ്ദ- ഈ വര്‍ഷത്തെ ഹജ്ജ് കര്‍മ്മങ്ങള്‍ക്കായി സൗദി അറേബ്യയ്ക്ക് പുറത്തുനിന്ന് ഇതുവരെ 15 ലക്ഷത്തിലധികം തീര്‍ത്ഥാടകര്‍ എത്തിയതായി ഹജ്ജ് പാസ്പോര്‍ട്ട് ഫോഴ്സ് കമാന്‍ഡര്‍ മേജര്‍ ജനറല്‍ ഡോ. സാലിഹ് അല്‍-മുറബ്ബ സ്ഥിരീകരിച്ചു. ഹജ്ജ് സുരക്ഷാ മേധാവികളുടെ വാര്‍ത്താ സമ്മേളനത്തിലാണ് അദ്ദേഹം ഇക്കാര്യം അറിയിച്ചത്.

എത്തിയ തീര്‍ത്ഥാടകരില്‍ ഭൂരിഭാഗവും വ്യോമ മാര്‍ഗമാണ് രാജ്യത്ത് എത്തിയത്. വ്യോമമാര്‍ഗ്ഗം വഴി 14.71 ലക്ഷം തീര്‍ത്ഥാടകരും, കരമാര്‍ഗ്ഗം 45,100 ലധികം തീര്‍ത്ഥാടകരും, കടല്‍മാര്‍ഗ്ഗം വഴി 6,400 ലധികം തീര്‍ത്ഥാടകരും പുണ്യഭൂമിയില്‍ എത്തിച്ചേര്‍ന്നു.

തീര്‍ത്ഥാടകരുടെ യാത്ര സുഗമമാക്കുന്ന 'മക്ക റൂട്ട് പദ്ധതി' ഈ വര്‍ഷം കൂടുതല്‍ വിപുലീകരിച്ചതായി മേജര്‍ ജനറല്‍ വ്യക്തമാക്കി. ഇത്തവണ 10 രാജ്യങ്ങളിലെ 17 അന്താരാഷ്ട്ര വിമാനത്താവളങ്ങളിലേക്ക് ഈ പദ്ധതി വ്യാപിപ്പിച്ചിട്ടുണ്ട്. മൊറോക്കോ, ഇന്തോനേഷ്യ, മലേഷ്യ, പാകിസ്ഥാന്‍, ബംഗ്ലാദേശ്, തുര്‍ക്കി, ഐവറി കോസ്റ്റ്, മാലദ്വീപ്, സെനഗല്‍, ബ്രൂണെ എന്നീ രാജ്യങ്ങളാണ് ഇതില്‍ ഉള്‍പ്പെടുന്നത്. ഈ വര്‍ഷം എത്തിയ ആകെ തീര്‍ത്ഥാടകരുടെ 30 ശതമാനവും മക്ക റൂട്ട് പദ്ധതി വഴിയാണ് സൗദിയിലെത്തിയത്.

തീര്‍ത്ഥാടകരുടെ പാസ്പോര്‍ട്ട് നടപടികള്‍ വേഗത്തിലാക്കാന്‍ അത്യാധുനിക സാങ്കേതിക വിദ്യകള്‍ ഉപയോഗിച്ചതായി അദ്ദേഹം കൂട്ടിച്ചേര്‍ത്തു. വിവിധ ഭാഷകള്‍ സംസാരിക്കുന്ന പ്രൊഫഷണല്‍ സംഘമാണ് തീര്‍ത്ഥാടകരെ സ്വീകരിക്കുന്നത്. കൂടാതെ, യാത്രാ നടപടികള്‍ വേഗത്തിലാക്കാനും തീര്‍ത്ഥാടകരുടെ വരവ് എളുപ്പമാക്കാനും മൊബൈല്‍, ടാബ്ലെറ്റ് ഉപകരണങ്ങളുടെ ഉപയോഗം വിപുലീകരിച്ചിട്ടുണ്ട്.

നിയമലംഘകര്‍ക്കെതിരെ കര്‍ശന നിയന്ത്രണങ്ങളും പിഴകളും ചുമത്തുന്നതിനെക്കുറിച്ചും വാര്‍ത്താ സമ്മേളനത്തില്‍ മുന്നറിയിപ്പ് നല്‍കി. വിവിധ നിരീക്ഷണ കേന്ദ്രങ്ങളില്‍ അഡ്മിനിസ്‌ട്രേറ്റീവ് കമ്മിറ്റികള്‍ രൂപീകരിച്ചിട്ടുണ്ട്. നിയമവിരുദ്ധമായി തീര്‍ത്ഥാടകരെ കടത്തുന്ന വാഹനങ്ങള്‍ കോടതി ഉത്തരവിലൂടെ കണ്ടുകെട്ടുകയും, നിയമം ലംഘിക്കുന്ന വിമാന സര്‍വീസുകള്‍ ഉള്‍പ്പെടെയുള്ള ട്രാന്‍സ്‌പോര്‍ട്ട് കമ്പനികള്‍ക്കെതിരെ കര്‍ശന നടപടികള്‍ സ്വീകരിക്കുകയും ചെയ്യും.

വിവിധ പോര്‍ട്ടുകളിലും കേന്ദ്രങ്ങളിലും വിപുലമായ സാങ്കേതിക സംവിധാനങ്ങള്‍ ഒരുക്കുന്നതില്‍ സൗദി ഡാറ്റ ആന്റ് ആര്‍ട്ടിഫിഷ്യല്‍ ഇന്റലിജന്‍സ് അതോറിറ്റി നല്‍കിയ തന്ത്രപരമായ സഹകരണത്തെ മേജര്‍ ജനറല്‍ അല്‍-മുറബ്ബ പ്രശംസിച്ചു. പുണ്യസ്ഥലങ്ങളില്‍ തീര്‍ത്ഥാടകര്‍ക്ക് നേരിട്ടുള്ള ഫീല്‍ഡ് പിന്തുണയും മാര്‍ഗ്ഗനിര്‍ദ്ദേശവും സഹായവും നല്‍കുന്നതിനായി പ്രത്യേക സന്നദ്ധപ്രവര്‍ത്തകരുടെ സംഘങ്ങളെയും വിന്യസിച്ചിട്ടുണ്ടെന്നും അദ്ദേഹം അറിയിച്ചു.