ജിദ്ദ- തനിമയുടെ കീഴില്‍ സേവനനിരതരാകുന്ന ഭൂരിഭാഗം ഹജ്ജ് വളണ്ടിയര്‍മാര്‍ക്കും ഹജ്ജ് മന്ത്രാലയത്തില്‍നിന്നുള്ള അനുമതി പത്രം ലഭിച്ചു. അറഫയിലും മിനയിലും മുസ്ദലിഫയിലും സേവനമനുഷ്ഠിക്കുന്ന നൂറിലേറെ വളണ്ടിയര്‍മാര്‍ക്ക് ഇതിനകം പെര്‍മിറ്റ് ലഭിച്ചുവെന്നും ബാക്കിയുള്ളവര്‍ക്ക് അടുത്ത ദിവസം തന്നെ ലഭിക്കുമെന്നാണ് കരുതുന്നതെന്നും വളണ്ടിയര്‍മാരുടെ അവസാനഘട്ട പരിശീലന പരിപാടി ഉദ്ഘാടനം ചെയ്ത തനിമ കേന്ദ്ര പ്രസിഡന്റ് എ.നജ്മുദ്ദീന്‍ അറിയിച്ചു.
പതിറ്റാണ്ടുകളായുള്ള തനിമയുടെ ഹജ്ജ് സര്‍വീസ് പാരമ്പര്യം ഉയര്‍ത്തിപ്പിടിക്കണമെന്നും ആത്മാര്‍ഥമായും ഉത്തരവാദിത്തത്തോടെയും ദൌത്യം പൂര്‍ത്തിയാക്കണമെന്നും അദ്ദേഹം വളണ്ടിയര്‍മാരെ ഉണര്‍ത്തി.
കഴിഞ്ഞ വര്‍ഷം പ്രതീക്ഷയോടെ കാത്തിരുന്ന വളണ്ടിയര്‍മാര്‍ക്ക് പെര്‍മിറ്റ് ലഭിക്കാത്തതിനാല്‍ അവസരം ലഭിച്ചിരുന്നില്ല. ഇത്തവണ കൂടുതല്‍ ആവേശത്തോടെയാണ് ഹജ്ജ് വളണ്ടിയര്‍മാര്‍ മിനിയിലേക്ക് തിരിക്കുന്നത്. കര്‍മങ്ങള്‍ക്കിടയില്‍ അവശരാകുന്ന ഹാജിമാരെ സേവിക്കുകയും അവരെ സുരക്ഷിതമായി ടെന്റുകളിലെത്തിക്കുകയുമാണ് വളണ്ടിയര്‍മാര്‍ക്ക് ചെയ്യാനുള്ളത്. വഴി അറിയാതെ ബുദ്ധിമുട്ടുന്ന ഹാജിമാരില്‍ ചിലര്‍ക്ക് ദിവസങ്ങള്‍ കഴിഞ്ഞായിരിക്കും പലപ്പോഴും ടെന്റ് കണ്ടെത്താന്‍ കഴിയുക. ഇവര്‍ക്ക് മുന്നിലാണ് വീല്‍ ചെയറുമായും മറ്റു സംവിധാനങ്ങളുമായും വളണ്ടിയര്‍മാരുടെ സേവനമെത്തുക. ഹാജിമാര്‍ക്കും വളണ്ടിയര്‍മാര്‍ക്കും ഒരു പോലെ സഹായകമാകുന്ന മൊബൈല്‍ ആപ്പും തനിമ പുറത്തിറക്കിയിട്ടുണ്ട്.
വിശുദ്ധ ഭൂമിയില്‍ എങ്ങനെ സഹായിക്കാമെന്നതിനെ കുറിച്ച് അവസാനഘട്ട പരിശീലനത്തില്‍ തനിമ ഹജ്ജ് -ഉംറ മൊബൈല്‍ ആപ്പ് ഇന്‍ ചാര്‍ജ് മുനീര്‍ ഇബ്രാഹിം ,വളണ്ടിയര്‍ സര്‍വീസ് ജനറല്‍ കണ്‍വീനര്‍ തമീം മമ്പാട്, ക്യാപ്റ്റന്‍ അബ്ശീര്‍ എന്നിവര്‍ വിശദീകരിച്ചു. ജനസേവനത്തിന്റെ പ്രാധാന്യത്തെ കുറിച്ചും ഉത്തരവാദിത്തെ കുറിച്ചും തനിമ കേന്ദ്ര സമിതി അംഗം ശഫീഖ് നദ് വി നസീഹത്ത് നടത്തി.
സേവന രംഗത്തുള്ള മറ്റു വളണ്ടിയര്‍മാരുമായി സഹകരിച്ചും അധികൃതരുടെ നിര്‍ദേശങ്ങള്‍ യഥാസമയം അനുസരിച്ചും അച്ചടക്കത്തോടെ തനിമയുടെ പാരമ്പര്യം ഉയര്‍ത്തിപ്പിടിച്ച് പ്രവര്‍ത്തിക്കണമെന്ന് സമാപന പ്രസംഗത്തില്‍ തനിമ കേന്ദ്ര ജനറല്‍ സെക്രട്ടറി ഉമര്‍ ഫാറൂഖ് പാലോട് ഉണര്‍ത്തി.
ക്യാപ്ഷന്‍: 1. അവസാനഘട്ട പരിശീലനത്തില്‍ സംബന്ധിച്ച തനിമ ഹജ്ജ് വളണ്ടിയര്‍മാര്‍. 2. തനിമ ഹജ്ജ് വളണ്ടിയര്‍ പരിശീലനം കേന്ദ്ര പ്രസിഡന്റ് എ. നജ്മുദ്ദീന്‍ ഉദ്ഘാടനം ചെയ്യുന്നു.
.jpg)
