റിയാദ്: രാജ്യത്തെ വ്യോമയാന സുരക്ഷ ശക്തമാക്കുന്നതിന്റെ ഭാഗമായി വിമാനങ്ങളില്‍ പവര്‍ ബാങ്കുകള്‍ കൊണ്ടുപോകുന്നതിനും ഉപയോഗിക്കുന്നതിനുമുള്ള നിയമങ്ങള്‍ പരിഷ്‌കരിച്ച് സൗദി ജനറല്‍ അതോറിറ്റി ഓഫ് സിവില്‍ ഏവിയേഷന്‍ (GACA). അന്താരാഷ്ട്ര സിവില്‍ ഏവിയേഷന്‍ ഓര്‍ഗനൈസേഷന്‍ അപകടകരമായ വസ്തുക്കളുടെ സുരക്ഷിതമായ ഗതാഗതത്തിനായുള്ള സാങ്കേതിക നിര്‍ദ്ദേശങ്ങളില്‍ വരുത്തിയ ഭേദഗതികള്‍ ഉള്‍പ്പെടുത്തിയാണ് ഗാക്ക പുതിയ സര്‍ക്കുലര്‍ പുറത്തിറക്കിയത്. സൗദി അറേബ്യയിലെ വിമാനത്താവളങ്ങള്‍ കേന്ദ്രീകരിച്ച് സര്‍വീസ് നടത്തുന്ന മുഴുവന്‍ എയര്‍ലൈനുകള്‍ക്കും ഇത് സംബന്ധിച്ച നിര്‍ദ്ദേശം നല്‍കിയിട്ടുണ്ട്.

വിമാനത്തിനുള്ളില്‍ വെച്ച് പവര്‍ ബാങ്കുകള്‍ റീചാര്‍ജ് ചെയ്യുന്നത് യാത്രക്കാര്‍ക്ക് പൂര്‍ണ്ണമായും നിരോധിച്ചു. കൂടാതെ യാത്രയ്ക്കിടയില്‍ പവര്‍ ബാങ്കുകള്‍ ഉപയോഗിച്ച് മറ്റ് വ്യക്തിഗത ഇലക്ട്രോണിക് ഉപകരണങ്ങള്‍ ചാര്‍ജ് ചെയ്യുന്നതും ഒഴിവാക്കേണ്ടതാണ്. ഒരാള്‍ക്ക് പരമാവധി രണ്ട് പവര്‍ ബാങ്കുകള്‍ മാത്രമേ കൈവശം വെക്കാന്‍ അനുവാദമുള്ളൂ. പവര്‍ ബാങ്കുകള്‍ യാതൊരു കാരണവശാലും ചെക്ക്-ഇന്‍ ലഗേജുകളില്‍ വെക്കാന്‍ പാടില്ല. ഇവ യാത്രക്കാരുടെ കൈവശമുള്ള കാബിന്‍ ബാഗേജുകളില്‍ (Carry-on baggage) മാത്രമേ സൂക്ഷിക്കാവൂ.

വിമാന ക്യാബിനുകളില്‍ ലിഥിയം ബാറ്ററി ഉപകരണങ്ങള്‍ മൂലമുണ്ടാകുന്ന അപകടസാധ്യതകള്‍ കുറയ്ക്കാനും വ്യോമയാന സുരക്ഷ അന്താരാഷ്ട്ര നിലവാരത്തിലേക്ക് ഉയര്‍ത്താനുമാണ് ഈ നടപടിയെന്ന് ഗാക്ക വ്യക്തമാക്കി. വ്യോമയാന മേഖലയിലെ സുരക്ഷാ മാനദണ്ഡങ്ങള്‍ ലംഘിക്കുന്നവര്‍ക്കെതിരെ കര്‍ശനമായ നടപടികളാണ് അതോറിറ്റി സ്വീകരിച്ചു വരുന്നത്. കഴിഞ്ഞ വര്‍ഷം (2025) മാത്രം വ്യോമയാന നിയമങ്ങള്‍ ലംഘിച്ച എയര്‍ലൈനുകള്‍, കമ്പനികള്‍, വ്യക്തികള്‍ എന്നിവരില്‍ നിന്നായി 609 നിയമലംഘനങ്ങളാണ് അതോറിറ്റി കണ്ടെത്തിയത്. ഇതിലൂടെ 13.8 മില്യണ്‍ സൗദി റിയാലിലധികം (3.6 മില്യണ്‍ ഡോളര്‍) പിഴയായി ഈടാക്കിയിട്ടുണ്ട്.

ഗാക്കയുടെ നിര്‍ദ്ദേശങ്ങള്‍ പാലിക്കാത്തതുമായി ബന്ധപ്പെട്ട് എയര്‍ലൈനുകള്‍ക്കെതിരെ 404 ലംഘനങ്ങളാണ് രേഖപ്പെടുത്തിയത് (6.7 മില്യണ്‍ റിയാല്‍ പിഴ). യാത്രക്കാരുടെ അവകാശ സംരക്ഷണ നിയമങ്ങള്‍ ലംഘിച്ചതുമായി ബന്ധപ്പെട്ട് 136 കേസുകളും (5 മില്യണ്‍ റിയാലിലധികം പിഴ) ഇതില്‍ ഉള്‍പ്പെടുന്നു. കൂടാതെ ലൈസന്‍സുള്ള കമ്പനികള്‍, ഡ്രോണ്‍ ഓപ്പറേറ്റര്‍മാര്‍, വിമാനത്തിനുള്ളില്‍ മോശമായി പെരുമാറിയ യാത്രക്കാര്‍ എന്നിവര്‍ക്കെതിരെയും നിയമനടപടികള്‍ സ്വീകരിച്ചിട്ടുണ്ട്.

വ്യോമയാന മേഖലയില്‍ കൂടുതല്‍ സുതാര്യത ഉറപ്പാക്കാനും, യാത്രക്കാരുടെ അനുഭവം മെച്ചപ്പെടുത്താനും, മികച്ച സുരക്ഷാ മാനദണ്ഡങ്ങള്‍ നിലനിര്‍ത്താനുമുള്ള അതോറിറ്റിയുടെ പ്രതിബദ്ധതയാണ് ഈ നടപടികളിലൂടെ വ്യക്തമാകുന്നതെന്ന് ഗാക്ക അറിയിച്ചു.