റിയാദ്: സൗദി അറേബ്യയില്‍ വാഹനങ്ങള്‍ വാടകയ്ക്കെടുക്കുന്നവരുടെ എണ്ണത്തില്‍ വന്‍ വര്‍ധനവ് രേഖപ്പെടുത്തിയതായി പബ്ലിക് ട്രാന്‍സ്പോര്‍ട്ട് അതോറിറ്റി വെളിപ്പെടുത്തി. രാജ്യത്ത് ടൂറിസം, ബിസിനസ് മേഖലകളിലുണ്ടായ ഉണര്‍വ് പ്രതിഫലിപ്പിക്കുന്നതാണ് അതോറിറ്റി പുറത്തുവിട്ട ഏറ്റവും പുതിയ റിപ്പോര്‍ട്ട്.

2025-ല്‍ മാത്രം സൗദിയിലുടനീളം 66 ലക്ഷത്തിലധികം (6.6 മില്യണ്‍) വാഹനം വാടകയ്ക്കെടുക്കല്‍ കരാറുകളാണ് ഒപ്പുവെക്കപ്പെട്ടത്. അതായത്, ദിവസേന ശരാശരി 18,000-ത്തിലധികം കരാറുകള്‍. ഓരോ മണിക്കൂറിലും ശരാശരി 753 കരാറുകള്‍ വീതം രജിസ്റ്റര്‍ ചെയ്യപ്പെടുന്നു. 2024-നെ അപേക്ഷിച്ച് 2025-ല്‍ വാഹന വാടകക്കരാറുകളില്‍ 15% വര്‍ധനവാണ് രേഖപ്പെടുത്തിയത്.

രാജ്യത്ത് ഈ മേഖലയിലുള്ള വര്‍ധിച്ചുവരുന്ന ജനപ്രീതി നിലനിര്‍ത്തിക്കൊണ്ട്, 2026-ന്റെ ആദ്യ പാദത്തില്‍ മാത്രം 16 ലക്ഷത്തിലധികം (1.6 മില്യണ്‍) കാര്‍ റെന്റല്‍ കരാറുകള്‍ അതോറിറ്റി ഇഷ്യൂ ചെയ്തുകഴിഞ്ഞു. കഴിഞ്ഞ വര്‍ഷത്തെ ഇതേ പാദത്തെ അപേക്ഷിച്ച് 7% വളര്‍ച്ചയാണ് ഈ വര്‍ഷം ആദ്യ മൂന്ന് മാസങ്ങളില്‍ മാത്രം ഉണ്ടായിരിക്കുന്നത്.

രാജ്യത്തെ വിവിധ പ്രവിശ്യകളില്‍ കാര്‍ റെന്റല്‍ കരാറുകളില്‍ ഏറ്റവും കൂടുതല്‍ വിഹിതം രേഖപ്പെടുത്തിയത് തലസ്ഥാന നഗരിയുള്‍പ്പെടുന്ന റിയാദ് മേഖലയിലാണ്.