മക്ക- ഈ വര്‍ഷത്തെ വിശുദ്ധ ഹജ്ജ് കര്‍മ്മത്തിനെത്തുന്ന തീര്‍ത്ഥാടകരുടെ സുരക്ഷയ്ക്കായി നിയോഗിക്കപ്പെട്ട സുരക്ഷാ സേനാംഗങ്ങളെയും വിവിധ സൈനിക വിഭാഗങ്ങളെയും പബ്ലിക് സെക്യൂരിറ്റി ഡയറക്ടറും ഹജ്ജ് സെക്യൂരിറ്റി കമ്മിറ്റി ചെയര്‍മാനുമായ ലെഫ്റ്റനന്റ് ജനറല്‍ മുഹമ്മദ് അല്‍ ബസ്സാമി നേരിട്ടെത്തി സന്ദര്‍ശിച്ചു. പുണ്യസ്ഥലങ്ങളില്‍ ഒരുക്കിയിരിക്കുന്ന സുരക്ഷാ ക്രമീകരണങ്ങളും തയ്യാറെടുപ്പുകളും വിലയിരുത്തുന്നതിനായിരുന്നു അദ്ദേഹത്തിന്റെ സന്ദര്‍ശനം.

പര്യടനത്തിനിടെ, തീര്‍ത്ഥാടകരുടെ സുരക്ഷയും ആശ്വാസവും ഉറപ്പാക്കുന്നതിനായി തയ്യാറാക്കിയ എല്ലാ സുരക്ഷാ, പദ്ധതികളും പൂര്‍ണ്ണ സജ്ജമാണെന്ന് അല്‍ ബസ്സാമി സ്ഥിരീകരിച്ചു. ദൈവത്തിന്റെ അതിഥികളായെത്തുന്ന ലക്ഷക്കണക്കിന് വിശ്വാസികള്‍ക്ക് യാതൊരുവിധ ബുദ്ധിമുട്ടുകളും കൂടാതെ, തികച്ചും സമാധാനപരവും സുരക്ഷിതവുമായ അന്തരീക്ഷത്തില്‍ ഹജ്ജ് കര്‍മ്മങ്ങള്‍ പൂര്‍ത്തിയാക്കാന്‍ ആവശ്യമായ എല്ലാ മുന്‍കരുതലുകളും അതോറിറ്റി സ്വീകരിച്ചിട്ടുണ്ടെന്നും അദ്ദേഹം വ്യക്തമാക്കി.