ന്യൂഡല്‍ഹി: യുണൈറ്റഡ് സ്റ്റേറ്റ്‌സുമായി (യുഎസ്) ചര്‍ച്ചകള്‍ തുടരാന്‍ തങ്ങള്‍ക്ക് സന്ദേശങ്ങള്‍ ലഭിച്ചതായി ഇറാന്റെ വിദേശകാര്യമന്ത്രി അബ്ബാസ് അരാഗ്ചി വ്യക്തമാക്കി. തര്‍ക്കങ്ങള്‍ പരിഹരിക്കുന്നതിനായുള്ള നയതന്ത്ര നീക്കങ്ങളില്‍ ചൈന ഉള്‍പ്പെടെയുള്ള ഏത് രാജ്യത്തിന്റെയും സഹകരണത്തെ സ്വാഗതം ചെയ്യുന്നതായും അദ്ദേഹം കൂട്ടിച്ചേര്‍ത്തു. ന്യൂഡല്‍ഹിയില്‍ നടക്കുന്ന ബ്രിക്‌സ് ഉച്ചകോടിയില്‍ പങ്കെടുത്ത ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
'ചര്‍ച്ചകളും ആശയവിനിമയങ്ങളും തുടരാന്‍ തങ്ങള്‍ തയ്യാറാണെന്ന് വ്യക്തമാക്കിക്കൊണ്ട് അമേരിക്കക്കാരുടെ സന്ദേശങ്ങള്‍ വീണ്ടും ഞങ്ങള്‍ക്ക് ലഭിച്ചിട്ടുണ്ട്,' അരാഗ്ചി പറഞ്ഞു. നിലവില്‍ പാകിസ്ഥാനാണ് യുഎസും ഇറാനും തമ്മിലുള്ള പ്രധാന മധ്യസ്ഥ ചര്‍ച്ചകള്‍ക്ക് നേതൃത്വം നല്‍കുന്നത്. പാകിസ്ഥാന്റെ മധ്യസ്ഥ ശ്രമങ്ങള്‍ ഇതുവരെ പരാജയപ്പെട്ടിട്ടില്ലെന്നും എന്നാല്‍ അമേരിക്കയുടെ നിലപാടുകളും ഇരുരാജ്യങ്ങള്‍ക്കുമിടയിലെ അവിശ്വാസവും കാരണം ഈ പ്രക്രിയ വളരെ കഠിനമായ ഘട്ടത്തിലൂടെയാണ് കടന്നുപോകുന്നതെന്നും അദ്ദേഹം കൂട്ടിച്ചേര്‍ത്തു.
തന്ത്രപ്രധാനമായ ഹോര്‍മുസ് കടലിടുക്ക് വീണ്ടും തുറക്കാന്‍ ചൈനീസ് പ്രസിഡന്റ് ഷി ജിന്‍പിംഗ് സഹായം വാഗ്ദാനം ചെയ്തതായി യുഎസ് പ്രസിഡന്റ് ഡൊണാള്‍ഡ് ട്രംപ് വ്യക്തമാക്കിയതിന് തൊട്ടുപിന്നാലെയാണ് ഇറാന്റെ പ്രതികരണം. യുഎസിനും ഇസ്രായേലിനുമെതിരായ യുദ്ധത്തില്‍ ഇറാന് സൈനിക ഉപകരണങ്ങള്‍ നല്‍കി സഹായിക്കില്ലെന്ന് ചൈന ഉറപ്പുനല്‍കിയതായും ട്രംപ് പറഞ്ഞിരുന്നു.
ഇതിനോട് പ്രതികരിക്കവെ, പ്രശ്‌നപരിഹാരത്തിന് സഹായിക്കാന്‍ ശേഷിയുള്ള ഏത് രാജ്യത്തിന്റെയും നീക്കങ്ങളെ തങ്ങള്‍ വിലമതിക്കുന്നുവെന്നും പ്രത്യേകിച്ച് ചൈനയുടെ പങ്കിനെ സ്വാഗതം ചെയ്യുന്നുവെന്നും അരാഗ്ചി പറഞ്ഞു. ചൈനയുമായി ഇറാനുള്ളത് വളരെ അടുത്ത തന്ത്രപ്രധാന പങ്കാളിത്തമാണെന്നും നയതന്ത്ര ചര്‍ച്ചകള്‍ വിജയകരമാക്കാന്‍ ചൈന നടത്തുന്ന ഏത് ശ്രമത്തെയും ഇസ്ലാമിക് റിപ്പബ്ലിക് ഓഫ് ഇറാന് സ്വാഗതം ചെയ്യുമെന്നും അദ്ദേഹം വ്യക്തമാക്കി.
അതേസമയം, രണ്ട് ദിവസത്തെ ഔദ്യോഗിക ചൈന സന്ദര്‍ശനം പൂര്‍ത്തിയാക്കി അമേരിക്കയിലേക്ക് മടങ്ങുന്നതിനിടെ എയര്‍ഫോഴ്‌സ് വണ്‍ വിമാനത്തില്‍ വെച്ച് ഡൊണാള്‍ഡ് ട്രംപ് മാധ്യമപ്രവര്‍ത്തകരോട് സംസാരിച്ചു. ഇറാന് ഒരു കാരണവശാലും ആണവായുധം കൈവശം വെക്കാന്‍ പാടില്ലെന്ന കാര്യത്തില്‍ ചൈനീസ് പ്രസിഡന്റ് ഷി ജിന്‍പിംഗിന് ശക്തമായ നിലപാടുണ്ടെന്ന് ട്രംപ് അവകാശപ്പെട്ടു. നിലവിലെ യുദ്ധം മൂലം ഗതാഗതം തടസ്സപ്പെട്ടിരിക്കുന്ന ഹോര്‍മുസ് കടലിടുക്ക് ഇറാന് എത്രയും വേഗം തുറന്നുനല്‍കണമെന്നാണ് ചൈന ആഗ്രഹിക്കുന്നതെന്നും ട്രംപ് കൂട്ടിച്ചേര്‍ത്തു.
Related News
