ദുബായ്: നീറ്റ്-യുജി പരീക്ഷയുടെ ചോദ്യപേപ്പര്‍ ചോര്‍ച്ചയുമായി ബന്ധപ്പെട്ട പുനഃപരീക്ഷാ അനിശ്ചിതത്വങ്ങള്‍ നിലനില്‍ക്കുന്ന സാഹചര്യത്തില്‍, പരീക്ഷാ കേന്ദ്രങ്ങളെക്കുറിച്ചുള്ള വ്യക്തതയില്ലായ്മ പ്രവാസി വിദ്യാര്‍ത്ഥികളില്‍ വലിയ ആശങ്ക സൃഷ്ടിക്കുന്നതായി രിസാല സ്റ്റഡി സര്‍ക്കിള്‍ ഗ്ലോബല്‍ കമ്മിറ്റി അറിയിച്ചു.
ഗള്‍ഫ് രാജ്യങ്ങളിലെ കേന്ദ്രങ്ങളില്‍ പരീക്ഷ എഴുതിയ ആയിരക്കണക്കിന് വിദ്യാര്‍ത്ഥികള്‍ പരീക്ഷയ്ക്ക് ശേഷം നാട്ടിലേക്ക് പോയിട്ടുണ്ട്. നിലവില്‍ ഇന്ത്യയിലുള്ള ഇവര്‍ക്ക് ആവശ്യാനുസരണം നാട്ടിലെ കേന്ദ്രങ്ങളില്‍ പരീക്ഷ എഴുതാന്‍ അനുമതി ലഭിക്കുമോ എന്നതില്‍ വിദ്യാര്‍ത്ഥികളും രക്ഷിതാക്കളും ആശങ്കാകുലരാണ്. നിലവില്‍ ഗള്‍ഫ് സെക്ടറില്‍ വിമാനക്കമ്പനികള്‍ ഭീമമായ ടിക്കറ്റ് നിരക്കാണ് ഈടാക്കുന്നത്. പുനഃപരീക്ഷയുമായി ബന്ധപ്പെട്ട അനിശ്ചിതത്വം പ്രവാസി കുടുംബങ്ങള്‍ക്ക് വലിയ മാനസിക, സാമ്പത്തിക, അക്കാദമിക് സമ്മര്‍ദ്ദമാണ് സൃഷ്ടിക്കുന്നത്.
ഈ വിഷയത്തില്‍ അടിയന്തര ഇടപെടലും വ്യക്തതയും ആവശ്യപ്പെട്ട് ആര്‍.എസ്.സി, നാഷണല്‍ ടെസ്റ്റിംഗ് ഏജന്‍സിക്ക് (NTA) കത്ത് നല്‍കി. പ്രവാസി വിദ്യാര്‍ത്ഥികള്‍ക്ക് പ്രത്യേക പരിഗണന നല്‍കണമെന്നും അവര്‍ ആഗ്രഹിക്കുന്ന പരീക്ഷാ കേന്ദ്രങ്ങള്‍ അനുവദിക്കണമെന്നും ആര്‍.എസ്.സി ആവശ്യപ്പെട്ടു.
വിദ്യാര്‍ത്ഥികളുടെ ആശങ്ക പരിഹരിക്കുന്നതിനായി പുതിയ പരീക്ഷാതീയതി, ഫലം, കേന്ദ്രങ്ങള്‍ എന്നിവ സംബന്ധിച്ച വ്യക്തമായ ഷെഡ്യൂള്‍ അടിയന്തരമായി പ്രഖ്യാപിക്കണം. ലക്ഷക്കണക്കിന് മെഡിക്കല്‍ സ്വപ്നങ്ങളുള്ള വിദ്യാര്‍ത്ഥികളുടെ ഭാവി അനിശ്ചിതത്വത്തിലാക്കരുത്. സുതാര്യതയോടെയും ഉത്തരവാദിത്തത്തോടെയും അടിയന്തര നടപടികള്‍ കൈക്കൊണ്ട് പരീക്ഷാ സംവിധാനത്തിലുള്ള പൊതുജനവിശ്വാസം പുനഃസ്ഥാപിക്കണമെന്നും ആര്‍.എസ്.സി അഭ്യര്‍ത്ഥിച്ചു.
.jpg)
Related News
