റിയാദ്: ഫാഷിസ്റ്റ് വിരുദ്ധ പോരാട്ടങ്ങളില്‍ ആശയപരമായും പ്രായോഗികമായും ശക്തമായ പ്രതിരോധം തീര്‍ത്ത സമൂഹങ്ങളില്‍ പോലും വിദ്വേഷത്തിന്റെയും നശീകരണത്തിന്റെയും ശക്തികള്‍ സ്വാധീനം ഉറപ്പിക്കുന്നത് അങ്ങേയറ്റം ആശങ്കാജനകമാണെന്ന് സൗദി ഇന്ത്യന്‍ ഇസ്ലാഹി സെന്റര്‍ ദേശീയ കൗണ്‍സില്‍ അഭിപ്രായപ്പെട്ടു. സ്വതന്ത്രമായി പ്രവര്‍ത്തിക്കേണ്ട ഭരണഘടനാ സംവിധാനങ്ങളും സ്ഥാപനങ്ങളും ഭരണകര്‍ത്താക്കളുടെ താല്പര്യങ്ങള്‍ക്കനുസരിച്ച് നിലകൊള്ളുന്നത് ജനാധിപത്യത്തെ അട്ടിമറിക്കുന്നതിന് തുല്യമാണെന്നും കൗണ്‍സില്‍ പാസാക്കിയ പ്രമേയത്തില്‍ ചൂണ്ടിക്കാട്ടി.
പൗരന്മാരുടെ മൗലികാവകാശമായ വോട്ടവകാശത്തെയും തിരഞ്ഞെടുക്കാനുള്ള സ്വാതന്ത്ര്യത്തെയും പിന്‍വാതിലിലൂടെ ഇല്ലാതാക്കാന്‍ ശ്രമങ്ങള്‍ നടക്കുന്നുവെന്ന ആരോപണങ്ങള്‍ അതീവ ഗൗരവമുള്ളതാണ്. ഇത്തരം നീക്കങ്ങള്‍ ജനാധിപത്യ വിശ്വാസികളെ ആശങ്കയിലാഴ്ത്തുന്നു. രാജ്യത്തിന്റെ ആത്മാവായ മതേതരത്വവും ജനാധിപത്യവും നിലനില്‍ക്കണമെന്ന് ആഗ്രഹിക്കുന്ന എല്ലാ പൗരന്മാരും ഭിന്നതകള്‍ മറന്ന് ഒന്നിക്കേണ്ടത് കാലഘട്ടത്തിന്റെ അനിവാര്യതയാണ്. വര്‍ഗീയ ശക്തികളെ പ്രതിരോധിക്കാന്‍ മതേതര വിശ്വാസികള്‍ക്കിടയിലുള്ള വിശാലമായ ഐക്യവും സഹകരണവും ശക്തിപ്പെടുത്തുന്നതിനായി എല്ലാവരും കൈകോര്‍ക്കണമെന്നും നാഷണല്‍ കൗണ്‍സില്‍ ആഹ്വാനം ചെയ്തു.
റിയാദിലെ സൗദി ഇന്ത്യന്‍ ഇസ്ലാഹി സെന്റര്‍ ഓഡിറ്റോറിയത്തില്‍ നടന്ന ദേശീയ കൗണ്‍സില്‍ യോഗം പ്രമുഖ പണ്ഡിതനും എഴുത്തുകാരനുമായ സയ്യിദ് സുല്ലമി ഉദ്ഘാടനം ചെയ്തു. സൗദി ഇന്ത്യന്‍ ഇസ്ലാഹി സെന്റര്‍ സെക്രട്ടറി ഷാജഹാന്‍ ചളവറ സ്വാഗതം പറഞ്ഞു. വൈസ് പ്രസിഡന്റ് ഹസ്‌കര്‍ ഒതായി അധ്യക്ഷത വഹിച്ചു. ജനറല്‍ സെക്രട്ടറി ജരീര്‍ വേങ്ങര നാഷണല്‍ കമ്മിറ്റിയുടെ പ്രവര്‍ത്തന റിപ്പോര്‍ട്ടും, സിറാജ് തയ്യില്‍ സാമ്പത്തിക റിപ്പോര്‍ട്ടും അവതരിപ്പിച്ചു. വിവിധ ഏരിയ കമ്മിറ്റികളുടെ റിപ്പോര്‍ട്ടുകള്‍ ബന്ധപ്പെട്ട ഭാരവാഹികള്‍ സമര്‍പ്പിച്ചു. ഫാറൂഖ് സ്വലാഹി, ഇക്ബാല്‍ സുല്ലമി, മുനീര്‍ ഹാദി എന്നിവര്‍ സംസാരിച്ചു. ജമാല്‍ പി.കെ. നന്ദി പറഞ്ഞു.
ഫോട്ടോ: സൗദി ഇന്ത്യന്‍ ഇസ്ലാഹി സെന്റര്‍ നാഷണല്‍ കൗണ്‍സില്‍ സയ്യിദ് സുല്ലമി ഉദ്ഘാടനം ചെയ്യുന്നു.
.jpg)
