കൊച്ചി- സിനിമ അഭിനേതാക്കളുടെ സംഘടനയായ 'അമ്മ'യുടെ എക്സിക്യൂട്ടീവ് കമ്മിറ്റിയില്നിന്ന് ജോയിന്റ് സെക്രട്ടറി അന്സിബ ഹസന് രാജിവച്ചു. രാജി അംഗീകരിച്ചതായും വ്യക്തിപരമായ കാരണങ്ങളാലും തൊഴില്പരമായ തിരക്കുകളാലുമാണ് രാജിയെന്നും 'അമ്മ' പ്രസിഡന്റ് ശ്വേത മേനോന് വ്യക്തമാക്കി.
കൊച്ചിയില് ചേര്ന്ന എക്സിക്യൂട്ടീവ് കമ്മിറ്റി യോഗത്തിന് ശേഷമാണ് ശ്വേത മേനോന് ഔദ്യോഗിക വിശദീകരണം നല്കിയത്. ഫെബ്രുവരി 21-ഓടെ തന്നെ അന്സിബ രാജിക്കത്ത് നല്കിയിരുന്നതായി ശ്വേത പറഞ്ഞു. തൊഴില്പരമായ തിരക്കുകള് ഉള്ളതിനാല് സംഘടനയുടെ പ്രവര്ത്തനങ്ങള്ക്കായി സമയം കണ്ടെത്താന് ബുദ്ധിമുട്ടുള്ളതിനാലാണ് ഈ തീരുമാനമെന്ന് അന്സിബ അറിയിച്ചതായി ശ്വേത മേനോന് പറഞ്ഞു.
'വ്യക്തിപരമായും തൊഴില്പരമായും തിരക്കുകള് ഉള്ളതിനാല് ആണ് 'അമ്മ'യുടെ എക്സിക്യൂട്ടീവ് കമ്മറ്റിയില്നിന്ന് അന്സിബ ഹസന് രാജി വച്ചത്. ഫെബ്രുവരി 21-ന് തന്നെ അന്സിബ രാജി സന്നദ്ധത അറിയിച്ചിരുന്നു. ഇതൊരു നിസ്വാര്ത്ഥ സേവനമാണ്. സംഘടനയുടെ മീറ്റിംഗുകളില് കൃത്യമായി പങ്കെടുക്കാനോ സജീവമായി പ്രവര്ത്തിക്കാനോ സാധിക്കാത്ത സാഹചര്യത്തില് മെമ്പറായി തുടരുന്നത് ശരിയല്ലെന്ന നിലപാടിലായിരുന്നു അന്സിബ. ഇന്ന് നടന്ന എക്സിക്യൂട്ടീവ് കമ്മിറ്റി യോഗത്തില് ഞങ്ങള് അന്സിബയെ വിളിച്ചു സംസാരിച്ചിരുന്നു. രാജി അംഗീകരിക്കണമെന്ന് അന്സിബ ആവശ്യപ്പെട്ടതോടെ എല്ലാവരും ചേര്ന്ന് അത് പാസാക്കി.' ശ്വേതാ മേനോന് പറഞ്ഞു.
ശ്വേത മേനോന് അമ്മയുടെ പ്രസിഡന്റായി തെരഞ്ഞെടുക്കപ്പെട്ട ഇലക്ഷനില് എതിരില്ലാതെ തെരഞ്ഞെടുക്കപ്പെട്ട ഒരേയൊരു സ്ഥാനാര്ഥി അന്സിബ ഹസന് ആയിരുന്നു. 'അമ്മ'യുടെ ജോയിന്റ് സെക്രട്ടറി സ്ഥാനത്തേക്കാണ് അന്സിബ തെരഞ്ഞെടുക്കപ്പെട്ടിരുന്നത്. നടി കുക്കു പരമേശ്വരന് ആണ് ജനറല് സെക്രട്ടറി.
അടുത്തിടെ അമ്മയിലെ ഒരു ഓഫിസ് സ്റ്റാഫ് തൊഴില്പരമായ പീഡനം നേരിടുന്നു എന്ന് ആരോപണം ഉന്നയിച്ചിരുന്നു. സംഘടനയുടെ ട്രഷറാനായ ഉണ്ണി ശിവപാലിനെതിരെയാണ് ജീവനക്കാരി ആരോപണം ഉന്നയിച്ചത്.
Related News
