മക്ക: ഹജ്ജ് തീര്‍ഥാടകര്‍ക്ക് മാര്‍ഗനിര്‍ദ്ദേശങ്ങളും മതപരമായ അറിവുകളും പകര്‍ന്നുനല്‍കുന്നതിനായി ഇരുഹറം കാര്യാലയ മതകാര്യ വകുപ്പ് 'ദലാല വ തിബ്യാന്‍' (Dalalah wa Tibyan) പദ്ധതിക്ക് തുടക്കം കുറിച്ചു. ഹജ്ജ് സീസണിലെ പ്രത്യേക പ്രവര്‍ത്തന പദ്ധതിയുടെ ഭാഗമായാണ് ഈ ഉദ്യമം ആരംഭിച്ചത്.
വിവിധ രാജ്യങ്ങളില്‍ നിന്നുള്ള തീര്‍ഥാടകരുടെ ആത്മീയ അനുഭവം മെച്ചപ്പെടുത്തുന്നതിനായി മക്കയിലെ മസ്ജിദുല്‍ ഹറാമിലും പരിസരങ്ങളിലും വിവിധ ഭാഷകളിലുള്ള മാര്‍ഗനിര്‍ദ്ദേശ പുസ്തകങ്ങളും ബോധവല്‍ക്കരണ സാമഗ്രികളും വിതരണം ചെയ്യും. ഹജ്ജ് കര്‍മ്മങ്ങളുടെ ശരിയായ രീതികള്‍, ഇസ്ലാമിക മര്യാദകള്‍ എന്നിവയെക്കുറിച്ച് തീര്‍ഥാടകര്‍ക്ക് അവബോധം നല്‍കുകയാണ് പദ്ധതിയുടെ ലക്ഷ്യം. അതോടൊപ്പം തന്നെ ഇസ്ലാമിലെ മിതത്വവും സന്തുലിതാവസ്ഥയും പ്രചരിപ്പിക്കാനും ഈ സംരംഭം ഊന്നല്‍ നല്‍കുന്നു.
സൗദി വിഷന്‍ 2030-ന്റെ ലക്ഷ്യങ്ങള്‍ മുന്‍നിര്‍ത്തി, തീര്‍ഥാടകര്‍ക്ക് മികച്ച സേവനം ഉറപ്പാക്കുന്നതിനാണ് ഈ ബഹുഭാഷാ മതകാര്യ പദ്ധതി ആവിഷ്‌കരിച്ചിരിക്കുന്നത്. ലോകത്തിന്റെ വിവിധ ഭാഗങ്ങളില്‍ നിന്നുള്ള വിശ്വാസികള്‍ക്ക് തങ്ങളുടെ മാതൃഭാഷയില്‍ തന്നെ നിര്‍ദ്ദേശങ്ങള്‍ ലഭിക്കുന്നത് കര്‍മ്മങ്ങള്‍ കൂടുതല്‍ വ്യക്തതയോടെയും കൃത്യതയോടെയും നിര്‍വ്വഹിക്കാന്‍ അവരെ സഹായിക്കുമെന്ന് മതകാര്യ വകുപ്പ് അറിയിച്ചു.
ഹജ്ജ് വേളയില്‍ കൂടെക്കരുതാവുന്ന രീതിയിലുള്ള ലഘുലേഖകളും പുസ്തകങ്ങളുമാണ് വിതരണം ചെയ്യുന്നത്. ആരാധനക്രമങ്ങള്‍, പെരുമാറ്റച്ചട്ടങ്ങള്‍, ആരാധനകളിലെ സംശയനിവാരണം എന്നിവ ഉള്‍ക്കൊള്ളുന്ന വിപുലമായ സേവനങ്ങളാണ് ഹജ്ജ് സീസണില്‍ ഉടനീളം ഈ പദ്ധതിയിലൂടെ ലഭ്യമാവുക.
.jpg)
Related News
