ജെറുസലേം: അടുത്ത പത്ത് വര്‍ഷത്തിനുള്ളില്‍ അമേരിക്കയുടെ സൈനിക സാമ്പത്തിക സഹായം പൂര്‍ണ്ണമായും ഒഴിവാക്കി ഇസ്രായേലിനെ സ്വയംപര്യാപ്തമാക്കാന്‍ ആഗ്രഹിക്കുന്നതായി പ്രധാനമന്ത്രി ബെഞ്ചമിന്‍ നെതന്യാഹു. ഗള്‍ഫ് രാജ്യങ്ങളുമായുള്ള ബന്ധം ശക്തിപ്പെടുത്തുന്നതിന്റെ ഭാഗമായാണ് ഈ നീക്കമെന്ന് ഞായറാഴ്ച സംപ്രേക്ഷണം ചെയ്ത അഭിമുഖത്തില്‍ അദ്ദേഹം വ്യക്തമാക്കി.

'അമേരിക്കയില്‍ നിന്നുള്ള സാമ്പത്തിക സഹായം പൂജ്യത്തിലേക്ക് എത്തിക്കാന്‍ ഞാന്‍ ആഗ്രഹിക്കുന്നു. സൈനിക സഹകരണത്തിന്റെ ഭാഗമായി ലഭിക്കുന്ന ഫണ്ട് ഒഴിവാക്കണം,' നെതന്യാഹു സി.ബി.എസ് '60 മിനിറ്റ്‌സ്' പരിപാടിയില്‍ പറഞ്ഞു. നിലവില്‍ പ്രതിവര്‍ഷം 3.8 ബില്യണ്‍ ഡോളറാണ് അമേരിക്ക ഇസ്രായേലിന് സൈനിക സഹായമായി നല്‍കുന്നത്. 2018 മുതല്‍ 2028 വരെയുള്ള കരാര്‍ പ്രകാരം ആകെ 38 ബില്യണ്‍ ഡോളറാണ് യുഎസ് വാഗ്ദാനം ചെയ്തിട്ടുള്ളത്. അമേരിക്കയുമായുള്ള സാമ്പത്തിക ബന്ധം പുനഃക്രമീകരിക്കാന്‍ പറ്റിയ ഏറ്റവും അനുയോജ്യമായ സമയമാണിതെന്നും അടുത്ത കോണ്‍ഗ്രസ് വരെ കാത്തിരിക്കാന്‍ താന്‍ തയ്യാറല്ലെന്നും അദ്ദേഹം കൂട്ടിച്ചേര്‍ത്തു.

ഇസ്രായേലിനുള്ള അമേരിക്കന്‍ പിന്തുണയില്‍ അടുത്തിടെ വലിയ ഇടിവുണ്ടായതായി സര്‍വ്വേകള്‍ സൂചിപ്പിക്കുന്നു. ഗാസ യുദ്ധത്തിന് പിന്നാലെ 60 ശതമാനം അമേരിക്കക്കാരും ഇസ്രായേലിനെ പ്രതികൂലമായി കാണുന്നവരാണെന്ന് പ്യൂ സര്‍വ്വേ വ്യക്തമാക്കുന്നു. സോഷ്യല്‍ മീഡിയയുടെ അതിപ്രസരമാണ് ഇതിന് കാരണമെന്ന് നെതന്യാഹു കുറ്റപ്പെടുത്തി. ചില രാജ്യങ്ങള്‍ സോഷ്യല്‍ മീഡിയ വഴി ഇസ്രായേലിനെതിരെ തെറ്റായ പ്രചാരണങ്ങള്‍ നടത്തുകയാണെന്നും അദ്ദേഹം പറഞ്ഞു.

ഫെബ്രുവരി 28-ന് ഇറാനെതിരെ യുഎസും ഇസ്രായേലും സംയുക്തമായി യുദ്ധം ആരംഭിച്ചതോടെ ലോകമെമ്പാടും ഇന്ധനവില കുതിച്ചുയരുകയാണ്. ഹോര്‍മുസ് കടലിടുക്ക് ഉപരോധിക്കാനുള്ള ഇറാന്റെ കരുത്ത് ഇസ്രായേല്‍ വൈകിയാണ് തിരിച്ചറിഞ്ഞതെന്ന് നെതന്യാഹു സമ്മതിച്ചു. ലോകത്തെ 20 ശതമാനം എണ്ണ കൈമാറ്റവും നടക്കുന്നത് ഈ പാതയിലൂടെയാണ്.

ഇറാനിലെ നിലവിലെ ഭരണകൂടം തകരുകയാണെങ്കില്‍ അതോടെ ലബനനിലെ ഹിസ്ബുള്ളയും പലസ്തീനിലെ ഹമാസും യെമനിലെ ഹൂതികളും അവസാനിക്കുമെന്ന് നെതന്യാഹു പറഞ്ഞു. 'ഇറാന്‍ കെട്ടിപ്പടുത്ത ഭീകരവാദ ശൃംഖലയുടെ ആകെത്തുകയാണ് ഈ ഭരണകൂടം. അത് തകര്‍ന്നാല്‍ സായുധ സംഘങ്ങളുടെ പതനവും ഉറപ്പാണ്. ഇറാന്‍ ഭരണകൂടത്തെ താഴെയിറക്കുക എന്നത് അസാധ്യമായ കാര്യമല്ല,' അദ്ദേഹം വ്യക്തമാക്കി. എന്നാല്‍ ഇറാനിലെ സൈനിക നീക്കങ്ങളെക്കുറിച്ചോ യുദ്ധത്തിന്റെ സമയക്രമത്തെക്കുറിച്ചോ കൂടുതല്‍ വിവരങ്ങള്‍ വെളിപ്പെടുത്താന്‍ അദ്ദേഹം തയ്യാറായില്ല.