റിയാദ്: ലോകത്തിലെ ഏറ്റവും വലിയ പ്രീ-യൂണിവേഴ്‌സിറ്റി ശാസ്ത്ര-എഞ്ചിനീയറിംഗ് മത്സരമായ 'റീജനറോണ്‍ ഇന്റര്‍നാഷണല്‍ സയന്‍സ് ആന്‍ഡ് എഞ്ചിനീയറിംഗ് ഫെയറില്‍' (ISEF 2026) പങ്കെടുക്കുന്നതിനായി സൗദി അറേബ്യയുടെ ദേശീയ ടീം അമേരിക്കയിലേക്ക് തിരിച്ചു. അരിസോണയിലെ ഫീനിക്‌സില്‍ മെയ് 9 മുതല്‍ 15 വരെയാണ് മത്സരം നടക്കുന്നത്.

സൗദി വിദ്യാഭ്യാസ മന്ത്രാലയവും കിംഗ് അബ്ദുല്‍ അസീസ് ഫൗണ്ടേഷനും (മൗഹിബ) സംയുക്തമായാണ് ടീമിനെ അയക്കുന്നത്. 42 മിടുക്കരായ വിദ്യാര്‍ത്ഥികളാണ് ഇത്തവണ രാജ്യത്തെ പ്രതിനിധീകരിക്കുന്നത്. 70 രാജ്യങ്ങളില്‍ നിന്നായി 1700-ലധികം വിദ്യാര്‍ത്ഥികള്‍ പങ്കെടുക്കുന്ന ഈ മഹാമേളയില്‍ വിവിധ ശാസ്ത്ര ശാഖകളിലെ നൂതനമായ പ്രോജക്റ്റുകള്‍ സൗദി സംഘം അവതരിപ്പിക്കും.

നാഷണല്‍ ഒളിമ്പ്യാഡ് ഫോര്‍ സയന്റിഫിക് ക്രിയേറ്റിവിറ്റി അഥവാ 'ഇബ്ദ 2026' എന്ന മത്സരത്തിലൂടെയാണ് മികച്ച പ്രോജക്റ്റുകളെ തിരഞ്ഞെടുത്തത്. ലോകത്തിലെ ഏറ്റവും വലിയ ഇന്നൊവേഷന്‍ മത്സരമെന്ന ഗിന്നസ് ലോക റെക്കോര്‍ഡും ഇത്തവണ ഇബ്ദ സ്വന്തമാക്കി. 3,57,000 വിദ്യാര്‍ത്ഥികളില്‍ നിന്ന് ലഭിച്ച 34,000 പ്രോജക്റ്റുകളില്‍ നിന്നാണ് ഫൈനല്‍ സംഘത്തെ തിരഞ്ഞെടുത്തത്. ആറ് ഘട്ടങ്ങളിലായി നടന്ന കഠിനമായ മൂല്യനിര്‍ണ്ണയത്തിനും പരിശീലനത്തിനും ശേഷമാണ് ഈ പ്രതിഭകള്‍ ആഗോള വേദിയിലേക്ക് ചുവടുവെക്കുന്നത്.

2007 മുതല്‍ ഐസെഫില്‍ പങ്കെടുത്തു വരുന്ന സൗദി അറേബ്യ ഇതുവരെ 185 പുരസ്‌കാരങ്ങള്‍ സ്വന്തമാക്കിയിട്ടുണ്ട്. ഇതില്‍ 124 ഗ്രാന്‍ഡ് അവാര്‍ഡുകളും 61 സ്‌പെഷ്യല്‍ അവാര്‍ഡുകളും ഉള്‍പ്പെടുന്നു. മുന്‍നിര ശാസ്ത്രജ്ഞരും വിദഗ്ധരും വിധിനിര്‍ണ്ണയം നടത്തുന്ന ഈ ആഗോള പ്ലാറ്റ്ഫോമില്‍ മികച്ച വിജയം കൈവരിക്കാനാവുമെന്ന പ്രതീക്ഷയിലാണ് സൗദി ഭരണകൂടവും വിദ്യാര്‍ത്ഥികളും.

ഗവേഷണം, പ്രസന്റേഷന്‍, കമ്മ്യൂണിക്കേഷന്‍ സ്‌കില്‍സ് എന്നിവ മെച്ചപ്പെടുത്തുന്നതിനായി ഒരു വര്‍ഷം നീണ്ടുനിന്ന തീവ്രമായ പരിശീലന പരിപാടികളാണ് സംഘത്തിനായി മൗഹിബ ഒരുക്കിയിരുന്നത്.