വാഷിംഗ്ടണ്‍: ഹോര്‍മുസ് കടലിടുക്കില്‍ മൂന്ന് അമേരിക്കന്‍ യുദ്ധക്കപ്പലുകള്‍ക്ക് നേരെ ഇറാന്‍ ആക്രമണം നടത്തിയെങ്കിലും ഇരുരാജ്യങ്ങളും തമ്മിലുള്ള വെടിനിര്‍ത്തല്‍ കരാര്‍ നിലനില്‍ക്കുന്നതായി യുഎസ് പ്രസിഡന്റ് ഡൊണാള്‍ഡ് ട്രംപ്. വ്യാഴാഴ്ച നടന്ന ആക്രമണത്തെ 'ഒരു നിസ്സാര സംഭവം' എന്ന് വിശേഷിപ്പിച്ച ട്രംപ്, കരാര്‍ ലംഘിക്കപ്പെട്ടിട്ടില്ലെന്ന് വ്യക്തമാക്കി.
ഇറാനിയന്‍ സൈനിക കേന്ദ്രങ്ങള്‍ ലക്ഷ്യമിട്ട് തിരിച്ചടി നല്‍കിയതായി യുഎസ് സൈന്യം അറിയിച്ചു. എന്നാല്‍ വാഷിംഗ്ടണാണ് ആദ്യം വെടിവെപ്പ് ആരംഭിച്ചതെന്ന് ടെഹ്റാന്‍ ആരോപിച്ചു. ഏപ്രില്‍ 8 മുതല്‍ നിലവിലുള്ള ദുര്‍ബലമായ സമാധാനാന്തരീക്ഷത്തെ തകര്‍ക്കുന്നതാണ് പുതിയ സംഘര്‍ഷങ്ങള്‍.
വെടിനിര്‍ത്തല്‍ തുടരുന്നുണ്ടോ എന്ന ചോദ്യത്തിന്, 'അതെ, ഉണ്ട്. അവര്‍ ഇന്ന് ഞങ്ങളോട് കളിക്കാന്‍ വന്നു, ഞങ്ങള്‍ അവരെ തകര്‍ത്തു കളഞ്ഞു,' എന്നായിരുന്നു ട്രംപിന്റെ മറുപടി. ഇറാന്‍ വിക്ഷേപിച്ച മിസൈലുകളും ഡ്രോണുകളും യുഎസ് കപ്പലുകളെ ബാധിച്ചില്ലെന്നും യുഎസ് സെന്‍ട്രല്‍ കമാന്‍ഡ് അറിയിച്ചു. അതേസമയം, അമേരിക്കയാണ് ആദ്യം എണ്ണക്കപ്പല്‍ ആക്രമിച്ചതെന്ന് ഇറാന്‍ ആരോപിച്ചു.
ചര്‍ച്ചകള്‍ പുരോഗമിക്കുകയാണെന്നും എന്നാല്‍ കരാര്‍ ഒപ്പിടാന്‍ വൈകിയാല്‍ ഭാവിയില്‍ കൂടുതല്‍ ശക്തമായ തിരിച്ചടി നല്‍കുമെന്നും ട്രംപ് തന്റെ 'ട്രൂത്ത് സോഷ്യല്‍' പ്ലാറ്റ്ഫോമിലൂടെ മുന്നറിയിപ്പ് നല്‍കി. മധ്യസ്ഥത വഹിക്കുന്ന പാകിസ്ഥാനെ തങ്ങളുടെ നിലപാട് അറിയിക്കുമെന്ന് ഇറാന്‍ വിദേശകാര്യ മന്ത്രാലയം വ്യക്തമാക്കി.
ഇറാന്‍-യുഎസ് ചര്‍ച്ചകള്‍ വിജയിച്ചാല്‍ അത് ലബനനിലെ സംഘര്‍ഷങ്ങള്‍ കുറയ്ക്കാനും സഹായിച്ചേക്കും. ഇസ്രായേലും ലബനനും തമ്മിലുള്ള അടുത്ത ഘട്ട ചര്‍ച്ചകള്‍ മേയ് 14, 15 തീയതികളില്‍ നടക്കുമെന്ന് യുഎസ് സ്റ്റേറ്റ് ഡിപ്പാര്‍ട്ട്‌മെന്റ് സ്ഥിരീകരിച്ചു. ഹിസ്ബുള്ളയുമായുള്ള തര്‍ക്കങ്ങളാണ് സമാധാനത്തിന് തടസ്സമെന്ന് യുഎസ് വിദേശകാര്യ സെക്രട്ടറി മാര്‍ക്കോ റൂബിയോ പറഞ്ഞു. ഇറാന്‍ പരമോന്നത നേതാവ് ആയത്തുള്ള അലി ഖാംനഇ കൊല്ലപ്പെട്ടതിന് പിന്നാലെയാണ് ഹിസ്ബുള്ള ഇസ്രായേലിന് നേരെ ആക്രമണം തുടങ്ങിയതും ലബനന്‍ യുദ്ധത്തിലേക്ക് വലിച്ചിഴയ്ക്കപ്പെട്ടതും.
യുദ്ധത്തെത്തുടര്‍ന്ന് ഇറാന്‍ ഹോര്‍മുസ് കടലിടുക്ക് അടച്ചതോടെ ഏകദേശം 1,500 കപ്പലുകളും 20,000 ജീവനക്കാരും ഗള്‍ഫ് മേഖലയില്‍ കുടുങ്ങിക്കിടക്കുകയാണെന്ന് ഇന്റര്‍നാഷണല്‍ മാരിടൈം ഓര്‍ഗനൈസേഷന്‍ അറിയിച്ചു. കടലിടുക്ക് തുറക്കാന്‍ ട്രംപ് നാവിക സേനയ്ക്ക് നിര്‍ദ്ദേശം നല്‍കിയെങ്കിലും ചര്‍ച്ചകളിലെ പുരോഗതി കണക്കിലെടുത്ത് പിന്നീട് അത് പിന്‍വലിച്ചു. ഇറാന്‍ ആണവായുധം കൈവശം വയ്ക്കുന്നത് തടയാന്‍ യൂറോപ്യന്‍ യൂണിയനും അമേരിക്കയും ഒരേ നിലപാടിലാണെന്ന് ട്രംപ് കൂട്ടിച്ചേര്‍ത്തു.
Related News
