റിയാദ്-സൗദി അറേബ്യയിലെ റിയാദില്‍ ടാന്‍സാനിയയില്‍നിന്നുള്ള സയാമി ഇരട്ടകളായ നാന്‍സിയെയും നൈസിനെയും വേര്‍പെടുത്താനുള്ള സങ്കീര്‍ണ്ണമായ ശസ്ത്രക്രിയ ഇന്ന് രാവിലെ ആരംഭിച്ചു. സൗദി ഭരണാധികാരി സല്‍മാന്‍ രാജാവിന്റെയും കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരന്റെയും പ്രത്യേക നിര്‍ദ്ദേശപ്രകാരമാണ് ഈ ശസ്ത്രക്രിയ നടക്കുന്നത്.

റിയാദിലെ മിനിസ്ട്രി ഓഫ് നാഷണല്‍ ഗാര്‍ഡിന് കീഴിലുള്ള കിംഗ് അബ്ദുള്ള സ്‌പെഷ്യലൈസ്ഡ് ചില്‍ഡ്രന്‍സ് ഹോസ്പിറ്റലിലെ വിദഗ്ധ മെഡിക്കല്‍ സംഘമാണ് ഒന്നര വയസ്സുകാരായ ഈ കുരുന്നുകളുടെ ശസ്ത്രക്രിയയ്ക്ക് നേതൃത്വം നല്‍കുന്നത്. കിംഗ് സല്‍മാന്‍ ഹ്യൂമാനിറ്റേറിയന്‍ എയ്ഡ് ആന്‍ഡ് റിലീഫ് സെന്റര്‍ (കെ.എസ് റിലീഫ്) ജനറല്‍ സൂപ്പര്‍വൈസറും മെഡിക്കല്‍ സംഘം തലവനുമായ ഡോ. അബ്ദുള്ള അല്‍ റബീഅയാണ് ശസ്ത്രക്രിയയുടെ വിവരങ്ങള്‍ പുറത്തുവിട്ടത്.
2026 ജനുവരി 27-നാണ് ഈ ഇരട്ടകളെ വിദഗ്ധ ചികിത്സയ്ക്കായി ടാന്‍സാനിയയില്‍ നിന്ന് സൗദിയില്‍ എത്തിച്ചത്. കഴിഞ്ഞ മാസങ്ങളില്‍ നടത്തിയ വിശദമായ പരിശോധനകള്‍ക്കും വിവിധ മെഡിക്കല്‍ ബോര്‍ഡ് മീറ്റിംഗുകള്‍ക്കും ശേഷമാണ് വേര്‍പെടുത്തല്‍ പ്രക്രിയ ആരംഭിക്കാന്‍ തീരുമാനിച്ചത്. കുഞ്ഞുങ്ങളുടെ നെഞ്ചിന്റെ താഴ്ഭാഗം, വയറ്, പെല്‍വിക് പ്രദേശം എന്നിവയാണ് പരസ്പരം ഒട്ടിച്ചേര്‍ന്നിരിക്കുന്നത്. ഓരോ കുഞ്ഞിനും ഓരോ കാലുകള്‍ വീതമാണുള്ളത്. മൂന്നാമതായി രൂപഭേദം സംഭവിച്ച മറ്റൊരു കാല്‍ കൂടി ഇവര്‍ പങ്കിടുന്നു. കൂടാതെ കരള്‍, വന്‍കുടല്‍, ഗുദം, മൂത്രനാളി, പ്രത്യുല്‍പ്പാദന വ്യവസ്ഥ എന്നിവയും ഇവര്‍ പങ്കിടുന്നുണ്ടെന്ന് ഡോക്ടര്‍മാര്‍ വ്യക്തമാക്കി.

ഈ ശസ്ത്രക്രിയ അതീവ സങ്കീര്‍ണ്ണമാണെന്നും പത്തോളം ഘട്ടങ്ങളിലായി ഏകദേശം 16 മണിക്കൂര്‍ നീണ്ടുനില്‍ക്കുമെന്നും അദ്ദേഹം അറിയിച്ചു. അനസ്‌തേഷ്യ, പീഡിയാട്രിക് സര്‍ജറി, പ്ലാസ്റ്റിക് സര്‍ജറി തുടങ്ങി വിവിധ വിഭാഗങ്ങളിലെ 35-ഓളം കണ്‍സള്‍ട്ടന്റുമാരും സ്‌പെഷ്യലിസ്റ്റുകളും അടങ്ങുന്ന സംഘമാണ് ദൗത്യത്തില്‍ പങ്കാളികളാകുന്നത്. ഏകദേശം 60 ശതമാനത്തിന് മുകളിലാണ് വിജയസാധ്യത കണക്കാക്കുന്നത്. സൗദി അറേബ്യയുടെ സയാമി ഇരട്ടകളെ വേര്‍പെടുത്തുന്ന പദ്ധതിയുടെ കീഴില്‍ ടാന്‍സാനിയയില്‍ നിന്നുള്ള ഇരട്ടകള്‍ക്കായി നടക്കുന്ന മൂന്നാമത്തെ ശസ്ത്രക്രിയയാണിത്.

മൊത്തത്തില്‍ ഈ പ്രോഗ്രാമിലെ 71-ാമത്തെ ശസ്ത്രക്രിയ കൂടിയാണിത്. 1990 മുതല്‍ ഇതുവരെ 5 ഭൂഖണ്ഡങ്ങളിലെ 28 രാജ്യങ്ങളില്‍ നിന്നുള്ള 157 കുഞ്ഞുങ്ങളെ സംരക്ഷിക്കാന്‍ ഈ മാനുഷിക പദ്ധതിയിലൂടെ സാധിച്ചിട്ടുണ്ട്. പദ്ധതിക്ക് നല്‍കിവരുന്ന നിരന്തര പിന്തുണയ്ക്ക് മെഡിക്കല്‍ സംഘം സൗദി നേതൃത്വത്തിന് നന്ദി അറിയിച്ചു. ശസ്ത്രക്രിയ വിജയകരമായി പൂര്‍ത്തിയാകാനും കുഞ്ഞുങ്ങള്‍ക്ക് ആരോഗ്യപൂര്‍ണ്ണമായ ജീവിതം തിരികെ ലഭിക്കാനുമുള്ള പ്രാര്‍ത്ഥനയിലാണ് ലോകമെമ്പാടുമുള്ള സുമനസ്സുകള്‍.