വാഷിംഗ്ടണ്‍/ദുബായ്: ഇറാനുമായുള്ള ചര്‍ച്ചകളില്‍ പുരോഗതിയുണ്ടായതിനെത്തുടര്‍ന്ന് ഹോര്‍മുസ് കടലിടുക്കിലെ കപ്പലുകള്‍ക്ക് സുരക്ഷ നല്‍കുന്ന 'പ്രൊജക്റ്റ് ഫ്രീഡം' ദൗത്യം താല്‍ക്കാലികമായി നിര്‍ത്തിവെക്കാന്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് തീരുമാനിച്ചു. ഇറാന്റെ ഭാഗത്തുനിന്നുള്ള അനുകൂല സമീപനത്തെത്തുടര്‍ന്നാണ് ഈ നീക്കമെന്ന് ട്രംപ് അറിയിച്ചു. അമേരിക്കയുടെ ആക്രമണാത്മക നടപടികള്‍ അവസാനിച്ചതായി വിദേശകാര്യ സെക്രട്ടറി മാര്‍ക്കോ റൂബിയോ പ്രഖ്യാപിച്ചു.
അതേസമയം, മേഖലയില്‍ സമാധാനം പുനഃസ്ഥാപിക്കാന്‍ ഇറാന്‍ വിട്ടുവീഴ്ചകള്‍ക്ക് തയ്യാറാകണമെന്ന് റൂബിയോ ആവശ്യപ്പെട്ടു. എന്നാല്‍, യുഎഇക്ക് നേരെ ഡ്രോണ്‍-മിസൈല്‍ ആക്രമണങ്ങള്‍ നടത്തിയെന്ന ആരോപണം ഇറാന്‍ സൈന്യം ശക്തമായി നിഷേധിച്ചു.
ഹോര്‍മുസ് കടലിടുക്കിലൂടെയുള്ള കപ്പല്‍ ഗതാഗതം നിയന്ത്രിക്കാന്‍ ഇറാന്‍ പുതിയ 'സൊവറിന്‍ ഗവേണന്‍സ് സിസ്റ്റം' ഏര്‍പ്പെടുത്തി. ഇനി മുതല്‍ ഈ തന്ത്രപ്രധാന പാതയിലൂടെ കടന്നുപോകുന്ന എല്ലാ കപ്പലുകളും മുന്‍കൂട്ടി ഇമെയില്‍ വഴി ഇറാന്‍ അധികൃതരില്‍ നിന്ന് അനുമതി വാങ്ങണം. അന്താരാഷ്ട്ര തലത്തില്‍ വലിയ പ്രതിഷേധത്തിന് ഇത് കാരണമായിട്ടുണ്ട്.
ചൊവ്വാഴ്ച രാത്രി ഹോര്‍മുസ് കടലിടുക്കിലൂടെ സഞ്ചരിക്കുകയായിരുന്ന ഒരു ചരക്ക് കപ്പലിന് നേരെ അജ്ഞാത വസ്തു ഉപയോഗിച്ച് ആക്രമണം നടന്നതായി യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷന്‍സ് സ്ഥിരീകരിച്ചു. ആക്രമണത്തിന്റെ ആഘാതത്തെക്കുറിച്ചും പാരിസ്ഥിതിക പ്രശ്‌നങ്ങളെക്കുറിച്ചും അന്വേഷണം നടക്കുകയാണ്.
ഇറാന്‍ വിദേശകാര്യ മന്ത്രി ചൈനയില്‍
അമേരിക്കയുമായുള്ള തര്‍ക്കം നിലനില്‍ക്കെ, ഇറാന്‍ വിദേശകാര്യ മന്ത്രി അബ്ബാസ് അരാഗ്ചി ചൈനീസ് വിദേശകാര്യ മന്ത്രി വാങ് യിയുമായി ബീജിംഗില്‍ കൂടിക്കാഴ്ച നടത്തി. ഇറാനില്‍ നിന്നുള്ള എണ്ണ ഇറക്കുമതിയില്‍ പ്രധാന പങ്കുവഹിക്കുന്ന ചൈനയുമായുള്ള ഈ ചര്‍ച്ചയെ ഏറെ പ്രാധാന്യത്തോടെയാണ് ലോകം നോക്കിക്കാണുന്നത്. മേയ് പകുതിയോടെ ട്രംപ് ചൈന സന്ദര്‍ശിക്കാനിരിക്കെയാണ് ഈ നീക്കം.
എണ്ണവിലയില്‍ ഇടിവ്: ചര്‍ച്ചകള്‍ പുരോഗമിക്കുന്ന വാര്‍ത്തകള്‍ പുറത്തുവന്നതോടെ ആഗോള വിപണിയില്‍ ക്രൂഡ് ഓയില്‍ വിലയില്‍ വലിയ ഇടിവ് രേഖപ്പെടുത്തി. ബ്രെന്റ് ക്രൂഡ് ബാരലിന് 110.29 ഡോളറായും ഡബ്ല്യു.ടി.ഐ (WTI) 102.27 ഡോളറായും കുറഞ്ഞു. കപ്പലുകള്‍ക്ക് നേരെയുള്ള ആക്രമണം നിര്‍ത്തുന്നില്ലെങ്കില്‍ ഇറാനെതിരെ ഉപരോധം ഏര്‍പ്പെടുത്തണമെന്ന് ആവശ്യപ്പെട്ട് അമേരിക്കയും ഗള്‍ഫ് രാജ്യങ്ങളും യുഎന്‍ രക്ഷാസമിതിയില്‍ കരട് പ്രമേയം അവതരിപ്പിച്ചു.
Related News
