ലണ്ടന്: ലണ്ടനില് തേംസ് നദിയില് മുങ്ങിമരിച്ച നിലയില് കണ്ടെത്തിയ മലയാളി യുവതി കീര്ത്തി രാജഗോപാലിന്റെ (25) മൃതദേഹം നാളെ നാട്ടിലെത്തിക്കും. ലണ്ടനിലെ നിയമനടപടികള് പൂര്ത്തിയാക്കി ഇന്ന് തിരിക്കുന്ന മൃതദേഹം തിങ്കളാഴ്ച പുലര്ച്ചെ 3 മണിയോടെ മംഗളൂരു വിമാനത്താവളത്തില് എത്തും.
കാസര്കോട് കാഞ്ഞങ്ങാട് വെള്ളിക്കോത്ത് കാരക്കുഴി 'കീര്ത്തിവിനായക'യില് റിട്ട. സൈനികന് രാജഗോപാലിന്റെയും റീനയുടെയും മകളാണ് കീര്ത്തി. തിങ്കളാഴ്ച രാവിലെ 10 മണിയോടെ മൃതദേഹം വീട്ടിലെത്തിക്കും. തുടര്ന്ന് ഉച്ചയ്ക്ക് 12 മണിയോടെയാകും സംസ്കാര ചടങ്ങുകള് നടക്കുക.
വിദ്യാര്ത്ഥി വിസയില് യുകെയിലെത്തിയ കീര്ത്തി, പഠനശേഷം പോസ്റ്റ് സ്റ്റഡി വിസയില് അവിടെ ജോലി ചെയ്തു വരികയായിരുന്നു. ലണ്ടനിലെ ഡെസിമ സ്ട്രീറ്റ് സര്ജറിയില് പേഷ്യന്റ് സര്വീസ് അഡൈ്വസറായിരുന്ന കീര്ത്തി ഗവേഷണ പഠനത്തിനുള്ള തയ്യാറെടുപ്പിലായിരുന്നു.
കഴിഞ്ഞ മാര്ച്ച് 30-ന് ജോലി കഴിഞ്ഞ് വീട്ടിലെത്തിയ ശേഷം പുറത്തുപോയ കീര്ത്തിയെ കാണാതാവുകയായിരുന്നു. പിന്നീട് നടത്തിയ തിരച്ചിലിലാണ് ഈസ്റ്റ് ലണ്ടനിലെ ടവര് ഹാംലെറ്റ്സ് ബറോയ്ക്ക് സമീപം തേംസ് നദീതീരത്ത് മൃതദേഹം കണ്ടെത്തിയത്. പോസ്റ്റ്മോര്ട്ടം റിപ്പോര്ട്ട് പ്രകാരം മാര്ച്ച് 31-നാണ് മരണം സംഭവിച്ചത്. വിനായക് ആണ് കീര്ത്തിയുടെ സഹോദരന്.
Related News
