ദുബായ്- യുഎഇയുടെ വിവിധ ഭാഗങ്ങളില്‍ ശനിയാഴ്ച നേരിയതും മിതമായതുമായ മഴ രേഖപ്പെടുത്തി. ഉപരിതല-അന്തരീക്ഷ ന്യൂനമര്‍ദ്ദങ്ങളുടെ ഫലമായി ദുബായ്, അബുദാബി, അല്‍ ഐന്‍ തുടങ്ങിയ നഗരങ്ങളിലാണ് മഴ അനുഭവപ്പെടുന്നത്. വരും ദിവസങ്ങളിലും കാലാവസ്ഥാ അസ്ഥിരത തുടരുമെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. കാറ്റിനും പൊടിക്കാറ്റിനും സാധ്യതയുള്ളതിനാല്‍ കടല്‍ പ്രക്ഷുബ്ധമാകാനും കാഴ്ചപരിധി കുറയാനും സാധ്യതയുണ്ട്.
മഴയെത്തുടര്‍ന്ന് റോഡ് സുരക്ഷ ഉറപ്പാക്കാന്‍ അബുദാബി, ദുബായ് പോലീസ് സേനകള്‍ പ്രത്യേക ജാഗ്രതാ നിര്‍ദ്ദേശം പുറപ്പെടുവിച്ചു. ഇലക്ട്രോണിക് ബോര്‍ഡുകളില്‍ പ്രദര്‍ശിപ്പിച്ചിരിക്കുന്ന വേഗപരിധി പാലിക്കണമെന്നും, വഴുക്കല്‍ ഒഴിവാക്കാന്‍ പെട്ടെന്ന് ബ്രേക്ക് ഇടുന്നത് ഒഴിവാക്കണമെന്നും പോലീസ് ഡ്രൈവര്‍മാരോട് ആവശ്യപ്പെട്ടു. വാഹനങ്ങള്‍ തമ്മില്‍ കൃത്യമായ അകലം പാലിക്കാനും വൈപ്പറുകള്‍ പ്രവര്‍ത്തനക്ഷമമാണെന്ന് ഉറപ്പുവരുത്താനും അധികൃതര്‍ നിര്‍ദ്ദേശിച്ചു.
ഞായറാഴ്ചയും രാജ്യത്തിന്റെ വിവിധ ഭാഗങ്ങളില്‍ മഴ തുടരുമെന്നാണ് പ്രവചനം. താപനില 31 നും 34 നും ഇടയിലായിരിക്കുമെങ്കിലും മലയോര മേഖലകളില്‍ 20ഡിഗ്രി സെല്‍ഷ്യസ് വരെ താഴാന്‍ സാധ്യതയുണ്ട്. തിങ്കളാഴ്ചയോടെ മഴയുടെ ശക്തി കുറയുമെങ്കിലും കിഴക്കന്‍, തെക്കന്‍ മേഖലകളില്‍ നേരിയ മഴയ്ക്ക് സാധ്യതയുണ്ട്. ബുധനാഴ്ചയോടെ ശക്തമായ വടക്കുപടിഞ്ഞാറന്‍ കാറ്റ് വീശാനും അറേബ്യന്‍ ഗള്‍ഫില്‍ കടല്‍ അതീവ പ്രക്ഷുബ്ധമാകാനും സാധ്യതയുള്ളതായി കാലാവസ്ഥാ റിപ്പോര്‍ട്ടുകള്‍ സൂചിപ്പിക്കുന്നു.
.jpg)
Related News
