ജിദ്ദ: കേരളം നിയമസഭാ തിരഞ്ഞെടുപ്പിന്റെ ആവേശത്തില് അമരുമ്പോള്, അതിന്റെ പ്രതിധ്വനികളുമായി പ്രവാസലോകത്തും കൊട്ടിക്കലാശം. ഒഐസിസി മലപ്പുറം ജില്ലാ കമ്മിറ്റിയുടെ ആഭിമുഖ്യത്തില് ജിദ്ദയില് സംഘടിപ്പിച്ച തിരഞ്ഞെടുപ്പ് കൊട്ടിക്കലാശം പ്രവര്ത്തകരുടെ പങ്കാളിത്തം കൊണ്ട് ശ്രദ്ധേയമായി.
മലപ്പുറം ജില്ലാ കമ്മിറ്റി ഓഫീസില് നടന്ന പരിപാടിയില്, നാട്ടിലെ തിരഞ്ഞെടുപ്പ് പ്രചാരണത്തിന്റെ അവസാന ഘട്ടത്തെ അനുസ്മരിപ്പിക്കും വിധം ആവേശകരമായ മുദ്രാവാക്യങ്ങളും രാഷ്ട്രീയ ഗാനങ്ങളുമായി പ്രവര്ത്തകര് അണിനിരന്നു. കൊടികള് വീശിയും കൈയടിച്ചും ഒരുമിച്ചുയര്ത്തിയ ശബ്ദം ജിദ്ദയിലെ പ്രവാസി സമൂഹത്തിനിടയില് തിരഞ്ഞെടുപ്പ് ചൂട് വര്ദ്ധിപ്പിച്ചു.
ഈ നിയമസഭാ തിരഞ്ഞെടുപ്പില് യുഡിഎഫ് സ്ഥാനാര്ത്ഥികള് വമ്പിച്ച വിജയം കൈവരിക്കുമെന്ന ആത്മവിശ്വാസം പ്രവര്ത്തകര് പ്രകടിപ്പിച്ചു. പ്രവാസികളുടെ രാഷ്ട്രീയ ബോധവും വോട്ടവകാശത്തോടുള്ള താല്പര്യവും വെളിവാക്കുന്നതായിരുന്നു ഈ കൂടിച്ചേരല് എന്ന് നേതാക്കള് അഭിപ്രായപ്പെട്ടു.
യാസിര് നായിഫ്, സി.ടി.പി. ഇസ്മയില്, ഇ.പി. മുഹമ്മദാലി, സാജു റിയാസ്, ഷംസുദ്ദീന്, നൗഷാദ് ബഡ്ജറ്റ്, കെ.പി. ഉസ്മാന്, ഗഫൂര് വണ്ടൂര് എന്നിവര് സംസാരിച്ചു. പി.കെ. നാദിര്ഷ, അബ്ദുള്ളക്കുട്ടി, നവാബ് കുറ്റിക്ക എന്നിവര് പരിപാടിക്ക് നേതൃത്വം നല്കി. യു.എം. ഹുസൈന് മലപ്പുറം സ്വാഗതവും ഫൈസല് മക്കരപ്പറമ്പ് നന്ദിയും പറഞ്ഞു.
ഫോട്ടോ: ജിദ്ദയില് ഒഐസിസി മലപ്പുറം ജില്ലാ കമ്മിറ്റി സംഘടിപ്പിച്ച തിരഞ്ഞെടുപ്പ് കൊട്ടിക്കലാശത്തില് നിന്ന്.
Related News
