റിയാദ്: സൗദി അറേബ്യയില്‍ സ്വദേശികള്‍ക്ക് വീട് നിര്‍മ്മാണത്തിനുള്ള ചെലവ് കുറയ്ക്കുന്നതിനായി നിര്‍മ്മാണ മേഖലയിലെ വിദേശ തൊഴിലാളികളുടെ ലെവി ഒഴിവാക്കുന്നത് സംബന്ധിച്ച് പഠനം നടത്തണമെന്ന് ശൂറ കൗണ്‍സില്‍ നിര്‍ദ്ദേശിച്ചു. ശൂറ കൗണ്‍സില്‍ സ്പീക്കര്‍ ഷെയ്ഖ് അബ്ദുള്ള അല്‍-ഷെയ്ഖിന്റെ അധ്യക്ഷതയില്‍ വീഡിയോ കോണ്‍ഫറന്‍സ് വഴി ചേര്‍ന്ന യോഗത്തിലാണ് അംഗങ്ങള്‍ വിവിധ ശുപാര്‍ശകള്‍ മുന്നോട്ടുവെച്ചത്.
കൗണ്‍സില്‍ അംഗം റാഇദ അബു നയന്‍ ആണ് നിര്‍മ്മാണ മേഖലയിലെ വിദേശ തൊഴിലാളികള്‍ക്കുള്ള ഫീസ് ഒഴിവാക്കണമെന്ന നിര്‍ദ്ദേശം മുന്നോട്ടുവെച്ചത്. ഈ നീക്കം വീട് നിര്‍മ്മാണ ചെലവ് ഗണ്യമായി കുറയ്ക്കാന്‍ സഹായിക്കുമെന്നും റിയല്‍ എസ്റ്റേറ്റ് മേഖലയില്‍ കൂടുതല്‍ നിക്ഷേപങ്ങള്‍ ആകര്‍ഷിക്കുമെന്നും അവര്‍ ചൂണ്ടിക്കാട്ടി. വാണിജ്യ മന്ത്രാലയം ബന്ധപ്പെട്ട അധികാരികളുമായി ചേര്‍ന്ന് ഇതിന്റെ സാധ്യതകള്‍ പഠിക്കണമെന്ന് അവര്‍ ആവശ്യപ്പെട്ടു.
കാര്‍ ഡീലര്‍ഷിപ്പുകളില്‍ സ്‌പെയര്‍ പാര്‍ട്‌സുകളുടെ ലഭ്യത ഉറപ്പുവരുത്താന്‍ മന്ത്രാലയം അടിയന്തരമായി ഇടപെടണമെന്ന് ഖാലിദ് അല്‍-ബുറൈക് ആവശ്യപ്പെട്ടു. വാഹനങ്ങളുടെ അറ്റകുറ്റപ്പണികള്‍ക്കും ഡയഗ്‌നോസ്റ്റിക് പരിശോധനകള്‍ക്കും എടുക്കുന്ന സമയം കുറയ്ക്കണമെന്നും ഉപഭോക്താക്കള്‍ക്ക് മികച്ച സേവനം ഉറപ്പാക്കാന്‍ കര്‍ശന മാനദണ്ഡങ്ങള്‍ വേണമെന്നും അദ്ദേഹം പറഞ്ഞു.
ചെറുകിട കര്‍ഷകരെയും ബിസിനസുകാരെയും ഏകോപിപ്പിച്ചുകൊണ്ട് കാര്‍ഷിക ഉല്‍പ്പാദന-വിപണന കമ്പനികള്‍ സ്ഥാപിക്കണമെന്ന് ആസിം മദ്ഖലി നിര്‍ദ്ദേശിച്ചു. ഇത് രാജ്യത്തെ ഭക്ഷ്യസുരക്ഷ വര്‍ധിപ്പിക്കാനും സാമ്പത്തിക സുസ്ഥിരത ഉറപ്പാക്കാനും സഹായിക്കുമെന്ന് അദ്ദേഹം പറഞ്ഞു.
വാണിജ്യ മേഖലയിലെ നിയമലംഘനങ്ങള്‍ (തസത്തുര്‍) തടയാന്‍ മന്ത്രാലയം നടത്തുന്ന നീക്കങ്ങളെ ഡോ. ഹസ്സന്‍ അല്‍-ഹസ്മി പ്രശംസിച്ചു. വിപണിയില്‍ വ്യാജ ഉല്‍പ്പന്നങ്ങള്‍ എത്തുന്നത് തടയാന്‍ കൂടുതല്‍ ഫലപ്രദമായ മാര്‍ഗങ്ങള്‍ കണ്ടെത്തണമെന്ന് അദ്ദേഹം ആവശ്യപ്പെട്ടു.
ചെറുകിട-ഇടത്തരം സംരംഭകര്‍ക്കായി വാണിജ്യ കരാറുകള്‍ കൈകാര്യം ചെയ്യാന്‍ ഒരു സ്മാര്‍ട്ട് നാഷണല്‍ പ്ലാറ്റ്ഫോം രൂപീകരിക്കണമെന്ന് ഡോ. തുര്‍ക്കി അല്‍-അന്‍സി നിര്‍ദ്ദേശിച്ചു. ഉപഭോക്താക്കള്‍ക്കായി ഏകീകൃത ഡിജിറ്റല്‍ പ്ലാറ്റ്ഫോം ഒരുക്കാനും വിപണിയിലെ സുതാര്യതയ്ക്കായി കൃത്യമായ ഡാറ്റ പ്രസിദ്ധീകരിക്കാനും നിര്‍ദ്ദേശമുയര്‍ന്നു.
ഒമാനുമായി ചെറുകിട വ്യവസായ മേഖലയിലും, കാനഡയുമായി ഖനന മേഖലയിലും, ജര്‍മ്മനിയുമായി ഊര്‍ജ്ജ മേഖലയിലും സഹകരിക്കുന്നതിനുള്ള കരാറുകള്‍ക്ക് കൗണ്‍സില്‍ അംഗീകാരം നല്‍കി. കൂടാതെ, നേപ്പാളുമായി തൊഴില്‍ കരാറിലും കൗണ്‍സില്‍ ഒപ്പുവെച്ചു.
Related News
