റിയാദ്: സൗദി അറേബ്യയിലെ 47 നഗരങ്ങളിലായി 19,489 വിദ്യാര്‍ത്ഥികള്‍ പങ്കെടുക്കുന്ന നാഷണല്‍ സയന്‍സ് ആന്‍ഡ് മാത്തമാറ്റിക്‌സ് ഒളിമ്പ്യാഡിന്റെ (NSMO) രണ്ടാം ഘട്ടത്തിന് ശനിയാഴ്ച തുടക്കമായി. മിനിസ്ട്രി ഓഫ് എഡ്യൂക്കേഷനുമായി സഹകരിച്ച് കിംഗ് അബ്ദുല്‍ അസീസ് ആന്‍ഡ് ഹിസ് കമ്പാനിയന്‍സ് ഫൗണ്ടേഷന്‍ ഫോര്‍ ഗിഫ്റ്റഡ്‌നെസ് ആന്‍ഡ് ക്രിയേറ്റിവിറ്റി (മാവ്ഹിബ - Mawhiba) ആണ് ഈ ബൃഹത്തായ പരിപാടി സംഘടിപ്പിക്കുന്നത്.

ഏപ്രില്‍ 4 മുതല്‍ 9 വരെ നീണ്ടുനില്‍ക്കുന്ന രണ്ടാം ഘട്ടത്തില്‍, യോഗ്യത നേടിയ 778 അധ്യാപകരുടെ നേതൃത്വത്തില്‍ വിദ്യാര്‍ത്ഥികള്‍ക്ക് തീവ്ര പരിശീലനം നല്‍കും. പ്രതിദിനം ആറ് മണിക്കൂര്‍ വീതം നീളുന്ന പരിശീലന പരിപാടികളാണ് ആസൂത്രണം ചെയ്തിരിക്കുന്നത്. ഗണിതം, ഇന്‍ഫോര്‍മാറ്റിക്‌സ്, ബയോളജി, ഫിസിക്‌സ്, സയന്‍സ്, കെമിസ്ട്രി എന്നീ വിഷയങ്ങളിലാണ് മത്സരങ്ങള്‍ നടക്കുന്നത്.

രണ്ടാം ഘട്ടത്തിന്റെ അവസാനം ജനറല്‍ ഡയറക്ടറേറ്റ് ഓഫ് എഡ്യൂക്കേഷന്‍ കേന്ദ്രങ്ങളില്‍ നേരിട്ടുള്ള പരീക്ഷ നടത്തും. ഇതില്‍ നിന്ന് തിരഞ്ഞെടുക്കപ്പെടുന്ന മികച്ച വിദ്യാര്‍ത്ഥികളാണ് മൂന്നാം ഘട്ടത്തിലേക്കും ദേശീയ ടീം പരിശീലനത്തിലേക്കും യോഗ്യത നേടുക.

ലക്ഷ്യം അന്താരാഷ്ട്ര നിലവാരം

മിഡില്‍ സ്‌കൂള്‍, ഹൈസ്‌കൂള്‍ തലത്തിലുള്ള വിദ്യാര്‍ത്ഥികള്‍ക്കായി രാജ്യത്ത് നടത്തുന്ന ഏറ്റവും വലിയ വാര്‍ഷിക മത്സരമാണിത്. വിദ്യാര്‍ത്ഥികളിലെ ശാസ്ത്രീയ അഭിരുചി വളര്‍ത്തുക, ഉയര്‍ന്ന നിലവാരത്തിലുള്ള ചിന്താശേഷി വികസിപ്പിക്കുക, അന്താരാഷ്ട്ര തലത്തിലുള്ള ശാസ്ത്ര വേദികളില്‍ സൗദി അറേബ്യയ്ക്ക് മികച്ച പ്രാതിനിധ്യം ഉറപ്പാക്കുക എന്നിവയാണ് ഈ സംരംഭത്തിലൂടെ മാവ്ഹിബയും വിദ്യാഭ്യാസ മന്ത്രാലയവും ലക്ഷ്യമിടുന്നത്.

രാജ്യത്തിന്റെ വിവിധ ഭാഗങ്ങളില്‍ നിന്നുള്ള പ്രതിഭകളെ കണ്ടെത്താനും അവര്‍ക്ക് ആവശ്യമായ വിദഗ്ധ പരിശീലനം പ്രാദേശികമായി തന്നെ ലഭ്യമാക്കാനും ഈ ഒളിമ്പ്യാഡ് സഹായിക്കുമെന്ന് അധികൃതര്‍ വ്യക്തമാക്കി.