തെല്‍ അവീവ്/മോസ്‌കോ: ശനിയാഴ്ച ഉച്ചയോടെ മധ്യ ഇസ്രായേലില്‍ ഇറാന് നടത്തിയ മിസൈല്‍ ആക്രമണത്തില്‍ ഒരാള്‍ക്ക് പരിക്കേറ്റു. റാമത്ത് ഗാന്‍, ഗിവതൈം, ബ്‌നീ ബ്രാക്, പെറ്റാ തിക്വ എന്നീ നഗരങ്ങളിലാണ് മിസൈലുകള്‍ പതിച്ചത്. ആക്രമണത്തെത്തുടര്‍ന്ന് ഇസ്രായേലിലെ ഭൂരിഭാഗം പ്രദേശങ്ങളിലും അപായ സൂചന നല്‍കുന്ന സൈറണുകള്‍ മുഴങ്ങി.
പരിക്കേറ്റ 52 വയസ്സുകാരനെ ആശുപത്രിയില്‍ പ്രവേശിപ്പിച്ചു. ഇദ്ദേഹത്തിന്റെ പരിക്ക് സാരമുള്ളതല്ലെന്ന് ഇസ്രായേല്‍ രക്ഷാസേനയായ മാഗന്‍ ഡേവിഡ് അദോം അറിയിച്ചു. മിസൈല്‍ പതിച്ചതിനെത്തുടര്‍ന്ന് അപ്പാര്‍ട്ട്‌മെന്റ് കെട്ടിടങ്ങളുടെ ചുവരുകളും ജനലുകളും തകരുകയും കാറുകള്‍ക്ക് തീപിടിക്കുകയും ചെയ്തു. സ്‌ഫോടനമുണ്ടായ സ്ഥലങ്ങളില്‍ കനത്ത പുകയും നാശനഷ്ടങ്ങളും ദൃശ്യമാണ്.
ഇറാന്റെ ബൂഷെര്‍ ആണവനിലയത്തിന് സമീപം അമേരിക്കന്‍-ഇസ്രായേല്‍ മിസൈല്‍ പതിച്ചതിന് പിന്നാലെ 198 റഷ്യന്‍ ജീവനക്കാരെ പ്ലാന്റില്‍ നിന്ന് ഒഴിപ്പിച്ചു. റഷ്യന്‍ സ്റ്റേറ്റ് മീഡിയയാണ് ശനിയാഴ്ച ഈ വിവരം പുറത്തുവിട്ടത്. പ്ലാന്റിന് സമീപമുണ്ടായ ആക്രമണത്തിന് 20 മിനിറ്റിനുള്ളില്‍ തന്നെ ജീവനക്കാരുമായി ബസ്സുകള്‍ ഇറാന്-അര്‍മേനിയന്‍ അതിര്‍ത്തി ലക്ഷ്യമാക്കി പുറപ്പെട്ടതായി റഷ്യന്‍ ആണവ ഏജന്‍സിയായ റൊസാറ്റം മേധാവി അലക്‌സി ലിഖാച്ചേവ് വ്യക്തമാക്കി. വരാനിരിക്കുന്ന വലിയ ആക്രമണങ്ങള്‍ മുന്നില്‍ കണ്ടാണ് ഈ നീക്കമെന്നാണ് സൂചന.
അമേരിക്കന്‍ യുദ്ധവിമാനം വെടിവെച്ചിടാന്‍ തങ്ങള്‍ പുതിയ വ്യോമപ്രതിരോധ സംവിധാനമാണ് ഉപയോഗിച്ചതെന്ന് ഇറാന്റെ ഖാത്തം അല്‍ അന്‍ബിയ മിലിട്ടറി കമാന്‍ഡ് അറിയിച്ചു. രാജ്യത്തിന്റെ വ്യോമാതിര്‍ത്തിയില്‍ പൂര്‍ണ്ണ നിയന്ത്രണം ഉറപ്പാക്കുമെന്നും ശത്രുക്കളുടെ ഏത് കടന്നുകയറ്റത്തെയും ശക്തമായി നേരിടുമെന്നും ഇറാന് സൈനിക വക്താവ് വ്യക്തമാക്കി. യുദ്ധം ആറാം വാരത്തിലേക്ക് കടക്കുമ്പോള്‍ മേഖലയില്‍ കൂടുതല്‍ രാജ്യങ്ങള്‍ സംഘര്‍ഷത്തിലേക്ക് വലിച്ചിഴയ്ക്കപ്പെടുമെന്ന ആശങ്ക ശക്തമായിരിക്കുകയാണ്.
ഫോട്ടോ: രാമത്ത് ഗാനിലെ ജനവാസ മേഖലയില്‍ ഇറാന് നടത്തിയ ആക്രമണത്തെത്തുടര്‍ന്ന് ഇസ്രായേല്‍ രക്ഷാപ്രവര്‍ത്തകര്‍ സ്ഥലം പരിശോധിക്കുന്നു.
Related News
