ജിദ്ദ: ഇന്ത്യന്‍ സ്‌കൂള്‍ പാരന്റ്സ് ഫോറം (ISPAF) ഇഫ്താര്‍ സംഗമവും ജിദ്ദ ഇന്റര്‍നാഷണല്‍ ഇന്ത്യന്‍ സ്‌കൂളിലെ പുതുതായി നിയമിതരായ മാനേജ്മെന്റ് കമ്മിറ്റി (SMC) അംഗങ്ങള്‍ക്കുള്ള സ്വീകരണവും സംഘടിപ്പിച്ചു. ഇസ്പാഫ് പ്രസിഡന്റ് എഞ്ചിനീയര്‍ മുഹമ്മദ് ബൈജു ചടങ്ങില്‍ അധ്യക്ഷത വഹിച്ചു. ജനറല്‍ സെക്രട്ടറി ഡോ. മുഹമ്മദ് ഫൈസല്‍ സ്വാഗതം ആശംസിച്ചു. ഐ.ഐ.എസ്.ജെ ഗേള്‍സ് സെക്ഷന്‍ വൈസ് പ്രിന്‍സിപ്പല്‍ ഫര്‍ഹത്തുന്നിസ മുഖ്യാതിഥിയായിരുന്ന ചടങ്ങില്‍ പുതിയ സ്‌കൂള്‍ മാനേജ്മെന്റ് കമ്മിറ്റി ചെയര്‍മാന്‍ ഡോ. മുഹമ്മദ് അസ്ലം, അംഗങ്ങളായ ഡോ. മുഹമ്മദ് ആസിഫ് ഖാന്‍, മുഹമ്മദ് റാഷിദ്, സയ്യിദ് നയീമുദ്ദീന്‍, ഡോ. സബ് കൊട്ട, ഫാദില്‍ നിബ്രാസ് എന്നിവരെ ഇസ്പാഫ് ഭാരവാഹികള്‍ ആദരിച്ചു.
സ്‌കൂളിന്റെ ഉന്നമനത്തിനായി മാനേജ്മെന്റ് അടിയന്തരമായി ശ്രദ്ധിക്കേണ്ട അഞ്ച് പ്രധാന ആവശ്യങ്ങള്‍ ഇസ്പാഫ് ചടങ്ങില്‍ മുന്നോട്ട് വെച്ചു. റദ്ദാക്കിയ 10, 12 ക്ലാസ്സുകളിലെ സി.ബി.എസ്.ഇ. പരീക്ഷാ പേപ്പറുകള്‍ക്ക് മോഡറേഷന്‍ ഗ്രേഡുകള്‍ അനുവദിക്കുക, ഉയര്‍ന്ന ക്ലാസ്സുകളിലെ വിദ്യാര്‍ത്ഥികളുടെ എണ്ണം കുറയ്ക്കുകയും പഠന നിലവാരം മെച്ചപ്പെടുത്തുന്നതിനായി കൂടുതല്‍ ഡിവിഷനുകള്‍ അനുവദിക്കുകയും ചെയ്യുക, ഫീസ് കുടിശ്ശികയുള്ളവര്‍ക്ക് ലേറ്റ് ഫീസും റീ-അഡ്മിഷന്‍ ഫീസും ഒഴിവാക്കി നല്‍കുക, അധ്യാപകരുടെ ശമ്പളം കാലാനുസൃതമായി പരിഷ്‌കരിക്കുക, സ്‌കൂളിലെ വിദ്യാഭ്യാസത്തിന്റെ മൊത്തത്തിലുള്ള ഗുണനിലവാരം വര്‍ദ്ധിപ്പിക്കുക തുടങ്ങിയ ആവശ്യങ്ങളാണ് ഇസ്പാഫ് ഉന്നയിത്തത്.
ഈ ആവശ്യങ്ങള്‍ ഗൗരവമായി പരിഗണിക്കുമെന്നും ആവശ്യമായ നടപടികള്‍ സ്വീകരിക്കുമെന്നും മാനേജിംഗ് കമ്മിറ്റി ചെയര്‍മാനും അംഗങ്ങളും വൈസ് പ്രിന്‍സിപ്പലും ഉറപ്പ് നല്‍കി. ഇസ്പാഫ് എക്‌സിക്യൂട്ടീവ് അംഗങ്ങള്‍ ഉള്‍പ്പെടെ നിരവധി പേര്‍ സംഗമത്തില്‍ പങ്കെടുത്തു.
.jpg)
