ജിദ്ദ: ഷറഫിയയിലെ ഖാലിദ് ബിന്‍ വലീദ് ഏരിയയില്‍ സാബ് ബാങ്കിന് സമീപം പ്രവര്‍ത്തിക്കുന്ന അനസ് ബിന്‍ മാലിക് സെന്ററില്‍, ജിദ്ദ ദഅവാ കോര്‍ഡിനേഷന്‍ കമ്മിറ്റിയുടെ ആഭിമുഖ്യത്തില്‍ നടന്നു വരുന്ന സമൂഹ നോമ്പുതുറ മലയാളികള്‍ക്ക് ഏറെ ആശ്വാസമാകുന്നു. സൗദി ഇസ്ലാമിക കാര്യ മന്ത്രാലയത്തിന്റെ അനുമതിയോടെ സംഘടിപ്പിക്കുന്ന ഇഫ്താറില്‍ ദിവസവും മുന്നൂറിലധികം മലയാളികളാണ് പങ്കുചേരുന്നത്.

കഴിഞ്ഞ അഞ്ചു വര്‍ഷമായി നാട്ടില്‍ നിന്നുള്ള വിദഗ്ധരായ പാചകക്കാരെ എത്തിച്ച്, സെന്ററില്‍ തന്നെ തയാറാക്കുന്ന രുചികരമായ കേരളീയ ഭക്ഷണമാണ് ഇവിടെ വിതരണം ചെയ്യുന്നത്. സ്വദേശികളും വിദേശികളുമായ സുമനസ്സുകളുടെയും പ്രവര്‍ത്തകരുടെയും സഹകരണത്തോടെയാണ് ഏകദേശം 70,000 റിയാല്‍ ചെലവ് വരുന്ന ഈ പദ്ധതിക്കാവശ്യമായ തുക കണ്ടെത്തുന്നത്.

എല്ലാ ദിവസവും നോമ്പുതുറയ്ക്ക് മുന്‍പായി വിവിധ പണ്ഡിതന്മാര്‍ നയിക്കുന്ന വിജ്ഞാന സദസ്സും ഇഫ്താറിന്റെ ഭാഗമായി നടക്കുന്നുണ്ട്. ക്ലാസുകളില്‍ പങ്കെടുക്കാന്‍ നൂറുകണക്കിനാളുകള്‍ നേരത്തെ തന്നെ എത്താറുണ്ട്. പലപ്പോഴും തിരക്ക് കാരണം സീറ്റുകള്‍ ലഭിക്കാതെ വരുമ്പോള്‍ ഇഫ്താര്‍ കിറ്റുകള്‍ വാങ്ങി മടങ്ങുന്നതും ഇവിടത്തെ പതിവ് കാഴ്ചയാണ്. വളണ്ടിയര്‍മാരുടെ ചിട്ടയായ പ്രവര്‍ത്തനവും ഭക്ഷണത്തിലെ വൃത്തിയും ഗുണമേന്മയുമാണ് ഈ സംഗമത്തെ പ്രവാസി മലയാളികള്‍ക്കിടയില്‍ ജനപ്രിയമാക്കുന്നത്.

റമദാനിനോടനുബന്ധിച്ച് നിര്‍ധനരായ കുട്ടികള്‍ക്ക് പെരുന്നാള്‍ വസ്ത്രങ്ങള്‍ നല്‍കുന്ന 'ഈദ് കിസ്വ', സഹജീവികള്‍ക്ക് താങ്ങാവാനായി 'കനിവ്' ചാരിറ്റി പ്രോഗ്രാം എന്നിവയും സെന്റര്‍ വഴി നടപ്പിലാക്കുന്നുണ്ട്. കൂടാതെ സകാത്ത്, ഫിത്ര്‍ സകാത്ത് എന്നിവ ശേഖരിച്ച് അര്‍ഹരായവരിലേക്ക് എത്തിക്കാനുള്ള സംവിധാനവും അനസ് ബിന്‍ മാലിക് സെന്ററില്‍ ഒരുക്കിയിട്ടുണ്ട്.

കൂടുതല്‍ വിവരങ്ങള്‍ക്ക് ഈ നമ്പറുകളില്‍ ബന്ധപ്പെടാവുന്നതാണെന്ന് സംഘാടകര്‍ അറിയിച്ചു: 0509299816, 0560282977, 0551762022, 0508352690.