ന്യൂയോര്‍ക്ക്: ഗള്‍ഫ് രാജ്യങ്ങള്‍ക്കും ജോര്‍ദാനും നേരെ ഇറാന്‍ നടത്തുന്ന മിസൈല്‍, ഡ്രോണ്‍ ആക്രമണങ്ങളെ അതിശക്തമായി അപലപിച്ച് ഐക്യരാഷ്ട്രസഭയുടെ സുരക്ഷാ സമിതി (UNSC) പ്രമേയം പാസാക്കി. ബുധനാഴ്ച നടന്ന വോട്ടെടുപ്പില്‍ സമിതിയിലെ 13 അംഗങ്ങള്‍ പ്രമേയത്തെ അനുകൂലിച്ചപ്പോള്‍ റഷ്യയും ചൈനയും വോട്ടെടുപ്പില്‍ നിന്ന് വിട്ടുനിന്നു.

ഗള്‍ഫ് സഹകരണ കൗണ്‍സിലിന് വേണ്ടി ബഹ്റൈന്‍ അവതരിപ്പിച്ച 2817-ാം നമ്പര്‍ പ്രമേയത്തെ ചരിത്രത്തിലാദ്യമായി 135 രാജ്യങ്ങള്‍ സഹ-സ്‌പോണ്‍സര്‍ ചെയ്തു. സമീപകാലത്ത് ഒരു സുരക്ഷാ സമിതി പ്രമേയത്തിന് ലഭിക്കുന്ന ഏറ്റവും വലിയ പിന്തുണയാണിത്.

ഗള്‍ഫ് രാജ്യങ്ങളുടെയും ജോര്‍ദാന്റെയും പരമാധികാരത്തിന് മേലുള്ള ഇറാന്റെ കടന്നുകയറ്റം അന്താരാഷ്ട്ര നിയമങ്ങളുടെ ലംഘനമാണെന്ന് പ്രമേയം ചൂണ്ടിക്കാട്ടി. നേരിട്ടോ പ്രോക്‌സി ഗ്രൂപ്പുകള്‍ വഴിയോ അയല്‍രാജ്യങ്ങള്‍ക്കെതിരെ നടത്തുന്ന ആക്രമണങ്ങള്‍ ഇറാന്‍ ഉടനടി നിരുപാധികം അവസാനിപ്പിക്കണമെന്ന് സമിതി ആവശ്യപ്പെട്ടു. വിമാനത്താവളങ്ങള്‍, ഊര്‍ജ്ജ നിലയങ്ങള്‍, ഭക്ഷ്യ ഉല്‍പ്പാദന കേന്ദ്രങ്ങള്‍ തുടങ്ങിയ സിവിലിയന്‍ അടിസ്ഥാന സൗകര്യങ്ങളെ ലക്ഷ്യം വെച്ചുള്ള ആക്രമണങ്ങളില്‍ സമിതി ആശങ്ക രേഖപ്പെടുത്തി. ഹോര്‍മുസ് കടലിടുക്ക്, ബാബ് അല്‍-മന്ദബ് തുടങ്ങിയ തന്ത്രപ്രധാനമായ ജലപാതകളിലെ സുരക്ഷ ഉറപ്പാക്കണമെന്നും അന്താരാഷ്ട്ര വ്യാപാരത്തെ ബാധിക്കുന്ന ഭീഷണികള്‍ ഒഴിവാക്കണമെന്നും പ്രമേയം ആവശ്യപ്പെട്ടു.

135 രാജ്യങ്ങളുടെ പിന്തുണ പ്രമേയത്തിന് ലഭിച്ചത് ഇറാന്റെ നടപടികള്‍ എത്രത്തോളം അപകടകരമാണെന്നതിന്റെ തെളിവാണെന്ന് ബഹ്റൈന്‍ സ്ഥാനപതി ജമാല്‍ അല്‍റോയായ് പറഞ്ഞു. മേഖലയുടെ സുരക്ഷ ആഗോള സമ്പദ്വ്യവസ്ഥയുമായി നേരിട്ട് ബന്ധപ്പെട്ടിരിക്കുന്നുവെന്നും അദ്ദേഹം കൂട്ടിച്ചേര്‍ത്തു.

ഇറാന്റെ നടപടികള്‍ മേഖലയെ യുദ്ധത്തിലേക്ക് തള്ളിവിടുകയാണെന്ന് ഫ്രാന്‍സും ബ്രിട്ടനും കുറ്റപ്പെടുത്തി. ഇറാന്റെ മിസൈല്‍ പദ്ധതികളും മിലിഷ്യകള്‍ക്കുള്ള പിന്തുണയും സമാധാനത്തിന് വെല്ലുവിളിയാണെന്ന് ഫ്രഞ്ച് പ്രതിനിധി ജെറോം ബോണാഫോണ്ട് പറഞ്ഞു. അതേസമയം, മേഖലയിലെ തങ്ങളുടെ പങ്കാളികള്‍ക്ക് എല്ലാവിധ പ്രതിരോധ പിന്തുണയും നല്‍കുമെന്ന് യുകെ വ്യക്തമാക്കി.

റഷ്യയുടെയും ചൈനയുടെയും നിലപാട്:
പ്രമേയം ഏകപക്ഷീയമാണെന്ന് ആരോപിച്ചാണ് റഷ്യയും ചൈനയും വോട്ടെടുപ്പില്‍ നിന്ന് വിട്ടുനിന്നത്. അമേരിക്കയും ഇസ്രായേലും ഇറാനെതിരെ നടത്തുന്ന നീക്കങ്ങളാണ് നിലവിലെ സംഘര്‍ഷത്തിന് കാരണമെന്നും ഇത് പ്രമേയത്തില്‍ പരാമര്‍ശിക്കുന്നില്ലെന്നും റഷ്യന്‍ സ്ഥാനപതി വസിലി നെബെന്‍സിയ പറഞ്ഞു. എന്നാല്‍ സിവിലിയന്‍ കേന്ദ്രങ്ങള്‍ക്ക് നേരെയുള്ള ആക്രമണം അംഗീകരിക്കാനാവില്ലെന്നും അദ്ദേഹം വ്യക്തമാക്കി.

ഫോട്ടോ: ന്യൂയോര്‍ക്കിലെ യുഎന്‍ ആസ്ഥാനത്ത് ബുധനാഴ്ച മാധ്യമപ്രവര്‍ത്തകരെ അഭിസംബോധന ചെയ്യുന്ന ഐക്യരാഷ്ട്രസഭയിലെ ബഹ്റൈന്‍ സ്ഥാനപതി ജമാല്‍ അല്‍റോയായ്.