മഡ്രീഡ്: പശ്ചിമേഷ്യയില്‍ പടരുന്ന യുദ്ധാഗ്‌നി ലോകത്തിന്റെ തന്നെ നാശത്തിന് വഴിവെക്കുമെന്ന് സ്പാനിഷ് പ്രധാനമന്ത്രി പെഡ്രോ സാഞ്ചസിന്റെ മുന്നറിയിപ്പ്. ഇറാന് മേലുള്ള ഇസ്രായേലിന്റെയും അമേരിക്കയുടെയും ബോംബാക്രമണങ്ങളെ രൂക്ഷമായി വിമര്‍ശിച്ച സാഞ്ചസിനെതിരെ സാമ്പത്തിക ഉപരോധം ഏര്‍പ്പെടുത്തുമെന്ന ട്രംപിന്റെ ഭീഷണിക്ക് പിന്നാലെയാണ് അദ്ദേഹം രാജ്യത്തെ അഭിസംബോധന ചെയ്തത്.
'ദശലക്ഷക്കണക്കിന് മനുഷ്യരുടെ വിധി വെച്ച് ആര്‍ക്കും റഷ്യന്‍ റൗലറ്റ് കളിക്കാനാവില്ല. ചരിത്രത്തിലെ വലിയ ദുരന്തങ്ങള്‍ ഇത്തരത്തിലാണ് ആരംഭിക്കുന്നത്,' എന്ന് അദ്ദേഹം ടെലിവിഷന്‍ സന്ദേശത്തിലൂടെ ലോകത്തെ ഓര്‍മ്മിപ്പിച്ചു. സ്‌പെയിനിന്റെ നിലപാടില്‍ മാറ്റമില്ലെന്നും പശ്ചിമേഷ്യയിലെ ഈ 'മഹാദുരന്തത്തിന്' തങ്ങള്‍ എതിരാണെന്നും അദ്ദേഹം ആവര്‍ത്തിച്ചു.
ഇറാനെതിരെയുള്ള വ്യോമാക്രമണങ്ങള്‍ 'നിയമവിരുദ്ധവും അവിവേകവുമാണ്' എന്ന് സാഞ്ചസ് പ്രഖ്യാപിച്ചതോടെയാണ് നാറ്റോ സഖ്യകക്ഷികളായ അമേരിക്കയും സ്‌പെയിനും തമ്മിലുള്ള ബന്ധം വഷളായത്. ഇതില്‍ പ്രകോപിതനായ ഡൊണാള്‍ഡ് ട്രംപ്, മഡ്രീഡുമായുള്ള വ്യാപാര ബന്ധം വെട്ടിക്കുറയ്ക്കുമെന്നും സ്പാനിഷ് ഉല്‍പ്പന്നങ്ങള്‍ക്ക് മേല്‍ കടുത്ത നികുതി ചുമത്തുമെന്നും ഭീഷണി മുഴക്കിയിരുന്നു. എന്നാല്‍ സാമ്പത്തിക സമ്മര്‍ദ്ദത്തിന് വഴങ്ങി സ്വന്തം വിദേശനയം തിരുത്താന്‍ സ്‌പെയിന്‍ തയ്യാറല്ലെന്ന സൂചനയാണ് സാഞ്ചസ് നല്‍കുന്നത്.
അമേരിക്കന്‍ വിമാനങ്ങള്‍ക്ക് വിലക്ക്
വാക്കേറ്റങ്ങള്‍ക്കും അപ്പുറം സൈനികമായ ചില നിര്‍ണ്ണായക തീരുമാനങ്ങളും സാഞ്ചസ് കൈക്കൊണ്ടു കഴിഞ്ഞു. ഇറാനെതിരെയുള്ള ആക്രമണങ്ങള്‍ക്കായി തെക്കന്‍ സ്‌പെയിനിലെ വ്യോമ-നാവിക താവളങ്ങള്‍ ഉപയോഗിക്കുന്നതില്‍ നിന്ന് അമേരിക്കന്‍ യുദ്ധവിമാനങ്ങളെ സ്‌പെയിന്‍ വിലക്കി. യൂറോപ്യന്‍ മണ്ണിലെ തന്ത്രപ്രധാനമായ ഈ താവളങ്ങള്‍ നഷ്ടപ്പെടുന്നത് മേഖലയിലെ അമേരിക്കയുടെ സൈനിക നീക്കങ്ങള്‍ക്ക് വലിയ തിരിച്ചടിയാകുമെന്നാണ് വിലയിരുത്തപ്പെടുന്നത്.
മാനവികതക്കും സമാധാനത്തിനും മുന്‍ഗണന നല്‍കുന്ന സ്‌പെയിനിന്റെ ഈ നിലപാട് യൂറോപ്യന്‍ യൂണിയനുള്ളിലും വലിയ ചര്‍ച്ചകള്‍ക്ക് തുടക്കമിട്ടിട്ടുണ്ട്. അമേരിക്കന്‍ മേധാവിത്വത്തെ ചോദ്യം ചെയ്തുകൊണ്ട് സ്‌പെയിന്‍ നടത്തുന്ന ഈ നീക്കം വരും ദിവസങ്ങളില്‍ പശ്ചിമേഷ്യന്‍ രാഷ്ട്രീയത്തെയും അന്താരാഷ്ട്ര ബന്ധങ്ങളെയും എങ്ങനെയൊക്കെ ബാധിക്കുമെന്ന് ലോകം ഉറ്റുനോക്കുകയാണ്.
Related News
