റിയാദ്: മക്കയില്‍ തീര്‍ഥാടകര്‍ക്കുള്ള ഭക്ഷണ വിതരണ ശൃംഖല ക്രമീകരിക്കാനായി 'മുവരിദി'എന്ന പേരില്‍ ഡിജിറ്റല്‍ പ്ലാറ്റ്ഫോം പുറത്തിറക്കി. മുനിസിപ്പല്‍ ഭവന നിര്‍മാണ മന്ത്രി മാജിദ് അല്‍ ഹുഖൈല്‍ ആണ് പദ്ധതി ഉദ്ഘാടനം ചെയ്തത്. ഭക്ഷണ വിതരണക്കാരെയും, മറ്റ് ഭക്ഷണ വിതരണ കമ്പനികളെയും ഒരു ഡിജിറ്റല്‍ പ്ലാറ്റ്ഫോമിന് കീഴില്‍ കൊണ്ടുവരുന്നതിലൂടെ ഓര്‍ഡറുകള്‍ നല്‍കുന്നതും അവയുടെ വിതരണവും നിരീക്ഷിക്കാന്‍ ഈ സംവിധാനം സഹായിക്കും.

പ്രതിവര്‍ഷം 18 ലക്ഷത്തിലധികം വരുന്ന വിദേശ ഹാജിമാര്‍ക്കും ദശലക്ഷക്കണക്കിന് ഉംറ തീര്‍ത്ഥാടകര്‍ക്കും ആവശ്യമായ ഭക്ഷണം കൃത്യസമയത്ത് എത്തിക്കാന്‍ ഈ സംവിധാനം സഹായിക്കും. ഹജ്ജ്, ഉംറ സീസണുകളില്‍ ഭക്ഷണത്തിന്റെ ആവശ്യകത മുന്‍കൂട്ടി കാണാനും വിതരണം തടസ്സമില്ലാതെ ഉറപ്പാക്കാനും, വിതരണക്കാര്‍ക്ക് തങ്ങളുടെ സ്റ്റോക്കുകള്‍ ഡിജിറ്റലായി നിയന്ത്രിക്കാനും ഇതിലൂടെ കഴിയും.