കവരത്തി: ലക്ഷദ്വീപിലെ അശാസ്ത്രീയമായ വാഹന നിരോധന ഉത്തരവും ഗസ്റ്റ് ഹൗസുകളിലെ മദ്യവിതരണവും അടിയന്തരമായി പിന്‍വലിക്കണമെന്ന് ഹംദുള്ള സയീദ് എം.പി. ആവശ്യപ്പെട്ടു. ജനജീവിതത്തെ സ്തംഭിപ്പിക്കുന്ന പരിഷ്‌കാരങ്ങള്‍ക്കെതിരെ ദ്വീപില്‍ പ്രതിഷേധം ശക്തമാവുകയാണ്.
ആരോഗ്യ സംരക്ഷണമെന്ന പേരില്‍ ബുധനാഴ്ചകളില്‍ ദ്വീപില്‍ വാഹനങ്ങള്‍ പൂര്‍ണ്ണമായും നിരോധിക്കാനുള്ള ഭരണകൂടത്തിന്റെ നീക്കത്തെ എം.പി. ശക്തമായി എതിര്‍ത്തു. ജില്ലാ കളക്ടര്‍ ഡോ. ഗിരി ശങ്കറിന് അയച്ച കത്തിലാണ് അദ്ദേഹം തന്റെ പ്രതിഷേധം അറിയിച്ചത്. സ്‌കൂള്‍ വിദ്യാര്‍ത്ഥികള്‍ക്കും രക്ഷിതാക്കള്‍ക്കും കപ്പല്‍/വിമാന യാത്രക്കാര്‍ക്കും ഈ നിരോധനം വലിയ ബുദ്ധിമുട്ടുണ്ടാക്കും. ദീര്‍ഘദൂരം നടക്കാന്‍ ബുദ്ധിമുട്ടുള്ള ഹൃദ്രോഗികള്‍ക്കും മുതിര്‍ന്ന പൗരന്മാര്‍ക്കും നിര്‍ബന്ധിത നടത്തം ആരോഗ്യപ്രശ്‌നങ്ങള്‍ സൃഷ്ടിക്കും.
നിയമം ലംഘിക്കുന്നവരില്‍ നിന്ന് 500 രൂപ പിഴ ഈടാക്കാനുള്ള തീരുമാനം സാധാരണക്കാര്‍ക്ക് വലിയ സാമ്പത്തിക ബാധ്യത ഉണ്ടാക്കുന്നതാണെന്നും ഇത്തരം അനാവശ്യ നിയന്ത്രണങ്ങള്‍ ദ്വീപിലെ ടൂറിസം മേഖലയുടെ തകര്‍ച്ചയ്ക്ക് കാരണമാകുമെന്നും എം.പി ചൂണ്ടിക്കാട്ടി. 2026 ഫെബ്രുവരി 25 മുതലാണ് ഈ ഉത്തരവ് നടപ്പിലാക്കാന്‍ നിശ്ചയിച്ചിരിക്കുന്നത്.
ദ്വീപിന്റെ സംസ്‌കാരത്തിന് നിരക്കാത്ത രീതിയില്‍ കില്‍ത്താന്‍, ചേത്ത്ലത്, ബിത്ര എന്നീ ദ്വീപുകളിലെ ഗസ്റ്റ് ഹൗസുകളില്‍ മദ്യം വിളമ്പാനുള്ള തീരുമാനവും ഭരണകൂടം കൈക്കൊണ്ടിട്ടുണ്ട്. ലക്ഷദ്വീപിന്റെ സാമൂഹിക അന്തരീക്ഷത്തെ തകര്‍ക്കുന്ന ഇത്തരം നീക്കങ്ങളില്‍ നിന്ന് അധികൃതര്‍ അടിയന്തരമായി പിന്മാറണമെന്നും എം.പി. ആവശ്യപ്പെട്ടു.
Related News
