റിയാദ്: ഒഐസിസി റിയാദ് സെന്‍ട്രല്‍ കമ്മിറ്റിയുടെ നേതൃത്വത്തില്‍ സംഘടിപ്പിച്ച 'ഗള്‍ഫ് ലക്ഷ്യ 2026' പ്രവര്‍ത്തക ക്യാമ്പ് ബത്ഹ ഡി പാലസ് ഓഡിറ്റോറിയത്തില്‍ ഉത്സാഹഭരിതമായി നടന്നു. സംഘടനാ നവീകരണത്തിനും പ്രവര്‍ത്തകരുടെ ചിന്താ ദിശ നിര്‍ണ്ണയത്തിനുമായി ഒരുക്കിയ ക്യാമ്പ് രാഷ്ട്രീയ ബോധവല്‍ക്കരണത്തിനും സംഘടനാ അച്ചടക്കത്തിനും പുതുവഴികള്‍ തുറന്നുവെന്ന വിലയിരുത്തലോടെയാണ് സമാപിച്ചത്.
ചടങ്ങില്‍ ജനറല്‍ സെക്രട്ടറി സുരേഷ് ശങ്കര്‍ ആമുഖ പ്രഭാഷണം നടത്തി. സെന്‍ട്രല്‍ കമ്മിറ്റി പ്രസിഡന്റ് സലീം കളക്കര അധ്യക്ഷത വഹിച്ചു. ചാലക്കുടി പാര്‍ലിമെന്റ് അംഗവും കോണ്‍ഗ്രസ് മാനിഫെസ്റ്റോ കമ്മിറ്റി ചെയര്‍മാനുമായ ബെന്നി ബഹന്നാന്‍ എം.പി. പ്രവര്‍ത്തക ക്യാമ്പ് ഉദ്ഘാടനം ചെയ്തു. പ്രവാസ ലോകത്ത് കോണ്‍ഗ്രസ് ആശയങ്ങളുടെ ശക്തമായ സാന്നിധ്യം കാലഘട്ടത്തിന്റെ ആവശ്യകതയാണെന്ന് അദ്ദേഹം പറഞ്ഞു. സംഘടനാ പ്രവര്‍ത്തനം വെറും ഔപചാരികതയല്ല, മറിച്ച് സാമൂഹിക ഉത്തരവാദിത്വമാണെന്നും അദ്ദേഹം ഓര്‍മ്മിപ്പിച്ചു.
കെ പി സി സി ജനറല്‍ സെക്രട്ടറി പി എ സലിം, നാഷണല്‍ കമ്മറ്റി പ്രസിഡന്റ് ബിജു കല്ലുമല, സെന്‍ട്രല്‍ കമ്മിറ്റി സംഘടനാചുമതലയുള്ള ജനറല്‍ സെക്രട്ടറി ഫൈസല്‍ ബാഹസ്സന്‍, കുഞ്ഞി കുമ്പള, നവാസ് വെള്ളിമാട് കുന്ന്, രഘുനാഥ് പറശ്ശിനിക്കടവ്, ശിഹാബ് കൊട്ടുകാട് തുടങ്ങിയവര്‍ ആശംസകള്‍ നേര്‍ന്നു.
പ്രോഗ്രാം കോര്‍ഡിനേറ്റര്‍ നിഷാദ് ആലംകോട് സ്വാഗതവും, സെന്‍ട്രല്‍ കമ്മിറ്റി വൈസ് പ്രസിഡന്റ് അമീര്‍ പട്ടണത്ത് നന്ദിയും രേഖപ്പെടുത്തി.
തുടര്‍ന്ന് വിവിധ സെക്ഷനുകളിലായി വിഷയാധിഷ്ഠിത ക്ലാസുകള്‍ നടന്നു. പ്രിയദര്‍ശിനി പബ്ലിക്കേഷന്‍ സൗദി ചാപ്റ്റര്‍ കോഡിനേറ്റര്‍ നൗഫല്‍ പാലക്കാടന്‍ വിഷയാവതരണം നടത്തി. രാവിലെ നടന്ന ആദ്യ സെക്ഷനില്‍ 'സംഘാടനവും സംഘടനാ അച്ചടക്കവും', രണ്ടാം സെക്ഷനില്‍ 'നാം എന്തിന് കോണ്‍ഗ്രസ് ആവണം' എന്നീ വിഷയങ്ങളില്‍ ബാലകൃഷ്ണന്‍ പെരിയ സംസാരിച്ചു. സംഘടനയുടെ മൂല്യാധിഷ്ഠിത രാഷ്ട്രീയ നിലപാടുകള്‍ പുതുതലമുറയിലേക്ക് കൈമാറേണ്ടത് പ്രവര്‍ത്തകരുടെ കടമയാണെന്ന് അദ്ദേഹം ചൂണ്ടിക്കാട്ടി. തുടര്‍ന്ന് പ്രവര്‍ത്തകരുടെ ചോദ്യങ്ങള്‍ക്ക് വിശദമായ മറുപടികളും നല്‍കി.
ഉച്ചയ്ക്ക് ശേഷം നടന്ന സെഷനില്‍ 'തിരഞ്ഞെടുപ്പിലേക്ക് പ്രവാസത്തിന്റെ ചുവടുവെപ്പ്' എന്ന വിഷയവുമായി ബെന്നി ബഹന്നാന്‍ എം.പി. ക്ലാസ് നയിച്ചു. പ്രവാസികളുടെ രാഷ്ട്രീയ ഇടപെടല്‍ കേരളത്തിന്റെ ഭാവി നിര്‍ണ്ണയത്തില്‍ നിര്‍ണായകമാകുമെന്ന് അദ്ദേഹം അഭിപ്രായപ്പെട്ടു. ആശയപരവും സംഘടനാപരവുമായ ആത്മവിശ്വാസം പകര്‍ന്ന ക്യാമ്പ്, 'ഗള്‍ഫ് ലക്ഷ്യ 2026'യുടെ വിജയകരമായ മുന്നേറ്റത്തിനായുള്ള പ്രതിജ്ഞയോടെയാണ് സമാപിച്ചത്.
പരിപാടിക്ക് സക്കീര്‍ ദാനത്ത്, ഷംനാദ് കരുനാഗപ്പള്ളി, മുഹമ്മദലി മണ്ണാര്‍ക്കാട്, ശുക്കൂര്‍ ആലുവ, സജീര്‍ പൂന്തുറ, ബാലു കുട്ടന്‍,ജോണ്‍സണ്‍ മാര്‍ക്കോസ്, നാദിര്‍ഷ റഹ്‌മാന്‍, സെയ്ഫ് കായംകുളം, ഹക്കിം പട്ടാമ്പി, ബഷീര്‍ കോട്ടക്കല്‍, അഷ്റഫ് മെച്ചെരി, സിദ്ധീഖ് കല്ലുപറമ്പന്‍ തുടങ്ങിയവര്‍ നേതൃത്വം നല്‍കി.
.jpg)
