ന്യൂദല്‍ഹി - സംസ്ഥാനം ഏറെ പ്രതീക്ഷയോടെ കാത്തിരുന്ന അതിവേഗ റെയില്‍ ഇടനാഴിയില്‍ കേരളം ഇല്ല. ബജറ്റില്‍ ധനമന്ത്രി നിര്‍മല സീതാരാമന്‍ പ്രഖ്യാപിച്ച ഏഴ് അതിവേഗ റെയില്‍ ഇടനാഴിയിലാണ് കേരളം ഉള്‍പ്പെടാതിരുന്നത്. മുംബൈ - പുനെ, പുനെ ഹൈദരാബാദ്, ഹൈദരാബാദ് -ബെംഗളൂരു, ഹൈദരാബാദ് -ചെന്നൈ, ചെന്നൈ -ബെംഗളൂരു, ദല്‍ഹി -വാരാണസി, വാരാണസി-സിലിഗുരി എന്നീ ഏഴ് അതിവേഗ റെയില്‍ ഇടനാഴികളാണ് ധനമന്ത്രി പഖ്യാപിച്ചത്. ഇതോടെ കേരള എംപിമാര്‍ 'കേരളം, കേരളം' എന്ന് ഉച്ചത്തില്‍ വിളിച്ചുപറഞ്ഞ് പ്രതിഷേധിച്ചു. 12 പുതിയ ജലപാതകളിലും കേരളത്തെ ഉള്‍പ്പെടുത്തിയില്ല. ധാതു ഇടനാഴിയില്‍ മാത്രമാണ് കേരളമുള്ളത്. അപൂര്‍വ ധാതുഖനനം കൂട്ടാനാണ് പദ്ധതി. ഒഡീഷ, കേരളം, ആന്ധ്രാപ്രദേശ്, തമിഴ്നാട് എന്നീ സംസ്ഥാനങ്ങളെ ചേര്‍ത്താണ് ഇടനാഴി പ്രഖ്യാപിച്ചത്.

പ്രധാനമായും ടയര്‍-2, ടയര്‍-3 നഗരങ്ങളെ പ്രധാന നഗര കേന്ദ്രങ്ങളുമായി ബന്ധിപ്പിക്കാനും റെയില്‍വേയെ റോഡ്, ഹ്രസ്വദൂര വിമാന യാത്രകള്‍ക്ക് ബദലാക്കാനും ലക്ഷ്യമിട്ടാണ് പ്രഖ്യാപനം.

പടിഞ്ഞാറന്‍, തെക്കന്‍, വടക്കന്‍, കിഴക്കന്‍ മേഖലകളെ ഒരുമിപ്പിക്കാനും വ്യാവസായിക കേന്ദ്രങ്ങള്‍, സാങ്കേതിക വിദ്യ കേന്ദ്രങ്ങള്‍, തീര്‍ത്ഥാടന നഗരങ്ങള്‍ എന്നിവയെ വേഗമേറിയതും കൂടുതല്‍ സംയോജിതവുമായ ശൃംഖലയിലേക്ക് കൊണ്ടുവരാനുമാണ് അതിവേഗ ഇടനാഴിയിലൂടെ ലക്ഷ്യമിടുന്നത്.

മറ്റ് പ്രധാന ബജറ്റ് നിര്‍ദേശങ്ങള്‍;

-വിദേശത്തേക്ക് പണം അയയ്ക്കാന്‍ നികുതി കുറയ്ക്കും

-കാന്‍സര്‍ ചികിത്സയ്ക്കുള്ള 17 മരുന്നുകള്‍ക്ക് കസ്റ്റംസ് തീരുവ ഇല്ല, കാന്‍സര്‍ മരുന്നുകളുടെ വില കുറയും. 7 അപൂര്‍വ രോഗങ്ങളുടെ മരുന്നുകള്‍ക്ക് തീരുവ ഇല്ല.

-മെഡിക്കല്‍ വിദ്യാഭ്യാസത്തിനുള്ള ടിസിഎസ് രണ്ട് ശതമാനമാക്കി.

-പരിശോധനയ്ക്ക് ശേഷവും ടാക്‌സ് റിട്ടേണ്‍ വിവരം പുതുക്കാം

-വിദേശയാത്രയുടെ ടിസിഎസ് അഞ്ചില്‍നിന്ന് രണ്ട് ശതമാനമാക്കി

-വാഹനാപകട നഷ്ടപരിഹാര തുകയ്ക്ക് നികുതിയില്ല