ജിദ്ദ- ഭാരതത്തിന്റെ 77-ാമത് റിപ്പബ്ലിക് ദിനം ജിദ്ദയിലെ ഇന്റര്‍നാഷണല്‍ ഇന്ത്യന്‍ സ്‌കൂളില്‍ വിപുലമായ പരിപാടികളോടെ ആഘോഷിച്ചു. വൈവിധ്യമാര്‍ന്ന കലാപരിപാടികള്‍ കൊണ്ട് സമ്പന്നമായിരുന്നു ഇത്തവണത്തെ ആഘോഷങ്ങള്‍.
ഇന്ത്യന്‍ കോണ്‍സല്‍ ജനറല്‍ ഫഹദ് അഹമ്മദ് ഖാന്‍ സൂരി ചടങ്ങില്‍ ദേശീയ പതാക ഉയര്‍ത്തുകയും രാഷ്ട്രപതിയുടെ റിപ്പബ്ലിക് ദിന സന്ദേശം വായിക്കുകയും ചെയ്തു. തുടര്‍ന്ന് കോണ്‍സല്‍ ജനറലും പത്‌നിയും ചേര്‍ന്ന് ത്രിവര്‍ണ്ണ ബലൂണുകള്‍ ആകാശത്തേക്ക് പറത്തി.
ഒന്നും രണ്ടും ക്ലാസുകളിലെ കുട്ടികള്‍ ഇന്ത്യയുടെ ദേശീയ പ്രതീകങ്ങളായി വേഷമിട്ടെത്തിയ 'പരേഡ് ഓഫ് പ്രൈഡ്' ഏറെ ശ്രദ്ധിക്കപ്പെട്ടു. ആറാം ക്ലാസ് മുതല്‍ എട്ടാം ക്ലാസ് വരെയുള്ള വിദ്യാര്‍ത്ഥികള്‍ 'ട്രഡീഷന്‍ ടു ട്രാന്‍സ്‌ഫോര്‍മേഷന്‍' എന്ന പ്രമേയത്തില്‍ അവതരിപ്പിച്ച സാംസ്‌കാരിക നൃത്തങ്ങള്‍ ഇന്ത്യയുടെ പൈതൃകവും വളര്‍ച്ചയും വിളിച്ചോതുന്നതായിരുന്നു.
വിവിധ സംസ്ഥാനങ്ങളുടെ പരമ്പരാഗത നൃത്തരൂപങ്ങളും ഇന്ത്യയുടെ ദേശീയ ചിഹ്നങ്ങളെ ആസ്പദമാക്കിയുള്ള നൃത്തങ്ങളും ചടങ്ങിന് മാറ്റുകൂട്ടി.
സൗദി വിദ്യാഭ്യാസ മന്ത്രാലയ പ്രതിനിധികള്‍ ഉള്‍പ്പെടെ നൂറുകണക്കിന് ആളുകള്‍ ചടങ്ങില്‍ സംബന്ധിച്ചു സ്‌കൂള്‍ മാനേജിംഗ് കമ്മിറ്റി ഭാരവാഹികള്‍, പ്രിന്‍സിപ്പാള്‍, അധ്യാപകര്‍, ജീവനക്കാര്‍ എന്നിവര്‍ ആഘോഷങ്ങള്‍ക്ക് നേതൃത്വം നല്‍കി.
