മക്ക: പുണ്യമാസമായ റമദാന്‍ വന്നെത്താനിരിക്കെ, മക്കയിലെ മസ്ജിദുല്‍ ഹറാമില്‍ തീര്‍ഥാടകരുടെ സുരക്ഷ ഉറപ്പാക്കാന്‍ അത്യാധുനിക സ്മാര്‍ട്ട് ക്രൗഡ് മാനേജ്മെന്റ് സംവിധാനം ഒരുങ്ങി. സാങ്കേതിക വിദ്യയുടെ സഹായത്തോടെ തിരക്ക് നിയന്ത്രിക്കുന്നതിലൂടെ തീര്‍ഥാടകര്‍ക്ക് കൂടുതല്‍ സുഗമമായി ഇബാദത്തുകള്‍ നിര്‍വഹിക്കാന്‍ സാധിക്കും.

ഹറാമിലെത്തുന്നവരുടെ എണ്ണം സ്മാര്‍ട്ട് കൗണ്ടിങ് രീതിയിലൂടെ കൃത്യമായി കണക്കാക്കും. ഈ വിവരങ്ങള്‍ തത്സമയം തന്നെ ഫീല്‍ഡ് ടീമുകള്‍ക്ക് ലഭ്യമാകും. ജനത്തിരക്ക് വര്‍ധിക്കുന്നത് മുന്‍കൂട്ടി മനസ്സിലാക്കി, തീര്‍ഥാടകരെ തിരക്ക് കുറഞ്ഞ വിവിധ നിലകളിലേക്കും മുറ്റങ്ങളിലേക്കും ഇടനാഴികളിലേക്കും യഥാസമയം വഴിതിരിച്ചുവിടും. ഇരുഹറം കാര്യവിഭാഗം നടപ്പിലാക്കുന്ന അത്യാധുനിക സംവിധാനങ്ങള്‍ വഴി ഓരോ തീര്‍ഥാടകനും മികച്ച സേവനം ഉറപ്പാക്കുകയാണ് ലക്ഷ്യം.

റമദാനില്‍ ലോകത്തിന്റെ വിവിധ ഭാഗങ്ങളില്‍ നിന്ന് ദശലക്ഷക്കണക്കിന് വിശ്വാസികളാണ് ഉംറ നിര്‍വഹിക്കാന്‍ എത്തുന്നത്. ഈ വലിയ ജനബാഹുല്യം സുരക്ഷിതമായി കൈകാര്യം ചെയ്യാനാണ് സൗദി അറേബ്യ പുതിയ സാങ്കേതിക വിദ്യകള്‍ പ്രയോജനപ്പെടുത്തുന്നത്.

'തീര്‍ഥാടകരുടെ സുരക്ഷയ്ക്കും സൗകര്യത്തിനുമാണ് മുന്‍ഗണന. സ്മാര്‍ട്ട് സംവിധാനങ്ങളിലൂടെ തിരക്ക് ഫലപ്രദമായി നിയന്ത്രിക്കാനും അപകടസാധ്യതകള്‍ ഒഴിവാക്കാനും സാധിക്കും.' - ഇരുഹറം കാര്യവിഭാഗം വ്യക്തമാക്കി.