ജനീവ- ലോകത്തെ പട്ടിണി സൂചികകള്‍ ആശങ്കാജനകമായ രീതിയില്‍ ഉയരുന്നതായി ലോക ഭക്ഷ്യ പദ്ധതിയുടെ എക്‌സിക്യൂട്ടീവ് ഡയറക്ടര്‍ സിന്‍ഡി മക്കെയ്ന്‍ മുന്നറിയിപ്പ് നല്‍കി. 2026-ല്‍ ലോകമെമ്പാടുമുള്ള 31.8 കോടിയിലധികം ആളുകള്‍ അതിരൂക്ഷമായ ഭക്ഷ്യക്ഷാമം നേരിടേണ്ടി വരുമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.

ലോക ഭക്ഷ്യ പദ്ധതിയുടെ 'ഗ്ലോബല്‍ ഔട്ട്ലുക്ക് 2026' റിപ്പോര്‍ട്ട് പ്രകാരം, 318 ദശലക്ഷം ആളുകള്‍ പട്ടിണിയുടെ അതിതീവ്രമായ ഘട്ടങ്ങളിലൂടെയാണ് കടന്നുപോകുന്നത്. ആഭ്യന്തര യുദ്ധങ്ങള്‍, തീവ്രമായ കാലാവസ്ഥാ വ്യതിയാനങ്ങള്‍, സാമ്പത്തിക തകര്‍ച്ച എന്നിവയാണ് പട്ടിണി വര്‍ദ്ധിപ്പിക്കുന്ന പ്രധാന ഘടകങ്ങള്‍. സുഡാന്‍, പലസ്തീന്‍ (ഗാസ), ദക്ഷിണ സുഡാന്‍, മാലി, ഹെയ്തി, യെമന്‍ തുടങ്ങിയ രാജ്യങ്ങള്‍ പട്ടിണിയുടെയും കടുത്ത ഭക്ഷ്യക്ഷാമത്തിന്റെയും വക്കിലാണെന്ന് റിപ്പോര്‍ട്ട് ചൂണ്ടിക്കാട്ടുന്നു.

ഭക്ഷ്യപദ്ധതിക്ക് ഒറ്റയ്ക്ക് ഈ പ്രതിസന്ധി പരിഹരിക്കാന്‍ കഴിയില്ലെന്നും ലോക നേതാക്കളുടെ അടിയന്തര ഇടപെടല്‍ ആവശ്യമാണെന്നും സിന്‍ഡി മക്കെയ്ന്‍ പറഞ്ഞു. സായുധ സംഘട്ടനങ്ങള്‍ അവസാനിപ്പിക്കുക, മാനുഷിക സഹായത്തിനായുള്ള ഫണ്ട് വര്‍ദ്ധിപ്പിക്കുക, കാലാവസ്ഥാ വ്യതിയാനത്തെ നേരിടാനുള്ള തന്ത്രപരമായ നീക്കങ്ങള്‍ നടത്തുക എന്നിവയിലൂടെ മാത്രമേ പട്ടിണി മരണങ്ങള്‍ ഒഴിവാക്കാന്‍ സാധിക്കൂ എന്ന് അവര്‍ ഓര്‍മ്മിപ്പിച്ചു.

വര്‍ദ്ധിച്ചുവരുന്ന ആവശ്യങ്ങള്‍ക്കിടയിലും അന്താരാഷ്ട്ര തലത്തില്‍ മാനുഷിക സഹായങ്ങള്‍ക്കായി ലഭിക്കുന്ന ഫണ്ടില്‍ വലിയ കുറവുണ്ടാകുന്നത് പ്രവര്‍ത്തനങ്ങളെ ബാധിക്കുന്നുണ്ട്. 2026-ല്‍ ഏറ്റവും ദുര്‍ബലരായ 11 കോടി ആളുകളിലേക്ക് സഹായമെത്തിക്കാനാണ് ഡബ്ല്യു.എഫ്.പി ലക്ഷ്യമിടുന്നത്, ഇതിനായി ഏകദേശം 13 ബില്യണ്‍ ഡോളര്‍ ആവശ്യമാണ്.

വിഭവങ്ങളുടെ പരിമിതിയും ദുരിതാശ്വാസ പ്രവര്‍ത്തകര്‍ നേരിടുന്ന സുരക്ഷാ ഭീഷണികളും കണക്കിലെടുത്ത്, ഈ ആഴ്ച മുതല്‍ 2026-ലെ പ്രത്യേക ദൗത്യങ്ങള്‍ ലോക ഭക്ഷ്യ പദ്ധതി ആരംഭിക്കും.