വാഷിംഗ്ടണ്‍- ഇറാനില്‍ നടക്കുന്ന ആഭ്യന്തര പ്രക്ഷോഭങ്ങളുടെ പശ്ചാത്തലത്തില്‍, ഇറാന്‍ ചര്‍ച്ചകള്‍ക്ക് തയ്യാറാണെന്ന് അമേരിക്കന്‍ പ്രസിഡന്റ് ഡോണള്‍ഡ് ട്രംപ് വ്യക്തമാക്കി. ടെഹ്റാനുമായി ചര്‍ച്ച നടത്തുന്നതിനായി അമേരിക്ക ഗൗരവകരമായ പല നടപടികളും ആലോചിച്ചുവരികയാണെന്നും അദ്ദേഹം കൂട്ടിച്ചേര്‍ത്തു.

ഇറാന്‍ വിദേശകാര്യ മന്ത്രിയുടെ ഒമാന്‍ സന്ദര്‍ശനത്തിന് പിന്നാലെയാണ് ട്രംപിന്റെ ഈ പ്രതികരണം. 'ഇറാന്‍ ചര്‍ച്ചകള്‍ക്ക് തയ്യാറാണെന്ന് അറിയിച്ചിട്ടുണ്ട്. ഒരു കൂടിക്കാഴ്ചയ്ക്കുള്ള ക്രമീകരണങ്ങള്‍ നടക്കുകയാണ്' എന്ന് എയര്‍ഫോഴ്‌സ് വണ്ണില്‍ വെച്ച് മാധ്യമപ്രവര്‍ത്തകരോട് ട്രംപ് പറഞ്ഞു. ജൂണില്‍ നടന്ന 12 ദിവസത്തെ യുദ്ധത്തില്‍ അമേരിക്കയും ഇസ്രായേലും തകര്‍ത്ത ഇറാന്റെ ആണവ പദ്ധതിയെക്കുറിച്ചായിരിക്കും പ്രധാനമായും ചര്‍ച്ചകള്‍ നടക്കുക.

ചര്‍ച്ചകള്‍ക്ക് സാധ്യതയുണ്ടെങ്കിലും, ഇറാനിലെ പ്രക്ഷോഭകാരികളെ അടിച്ചമര്‍ത്തുന്ന നടപടി തുടര്‍ന്നാല്‍ അതിശക്തമായ സൈനിക നീക്കം ഉണ്ടാകുമെന്ന് ട്രംപ് മുന്നറിയിപ്പ് നല്‍കി. ഇറാനെതിരെ സൈനിക നടപടി ഉള്‍പ്പെടെയുള്ള 'അതിശക്തമായ ഓപ്ഷനുകള്‍' അമേരിക്കയുടെ പരിഗണനയിലുണ്ട്. അമേരിക്കന്‍ നടപടിക്കെതിരെ ഇറാന്‍ പ്രതികരിക്കുകയാണെങ്കില്‍, 'ഇതുവരെ കണ്ടിട്ടില്ലാത്ത വിധത്തിലുള്ള പ്രഹരം' നേരിടേണ്ടി വരുമെന്ന് ട്രംപ് ഭീഷണിപ്പെടുത്തി. കൂടിക്കാഴ്ചയ്ക്ക് മുന്‍പ് തന്നെ ചില നടപടികള്‍ സ്വീകരിക്കേണ്ടി വരുമെന്നും അദ്ദേഹം സൂചിപ്പിച്ചു.

ഇറാനില്‍ നിലവില്‍ അതിരൂക്ഷമായ സര്‍ക്കാര്‍ വിരുദ്ധ പ്രക്ഷോഭങ്ങള്‍ നടക്കുകയാണ്. 500-ലധികം ആളുകള്‍ കൊല്ലപ്പെടുകയും ആയിരക്കണക്കിന് പേര്‍ അറസ്റ്റിലാകുകയും ചെയ്തതായാണ് റിപ്പോര്‍ട്ടുകള്‍. ഈ സാഹചര്യം മുന്‍നിര്‍ത്തി അമേരിക്ക ഇറാന്‍ പ്രതിപക്ഷ ഗ്രൂപ്പുകളുമായി സമ്പര്‍ക്കം പുലര്‍ത്തുന്നുണ്ട്.

അതേസമയം, ആണവ പദ്ധതികളും മിസൈല്‍ ശേഖരവും തങ്ങളുടെ പ്രതിരോധത്തിന് അനിവാര്യമാണെന്നാണ് ഇറാന്റെ നിലപാട്. അതിനാല്‍ തന്നെ വരാനിരിക്കുന്ന ചര്‍ച്ചകളില്‍ ഇറാന്‍ എന്ത് വിട്ടുവീഴ്ച ചെയ്യുമെന്നത് ഇപ്പോഴും അവ്യക്തമാണ്.