ഒട്ടാവ: കാനഡയിലെ ബ്രാംപ്ടണില് പ്രായപൂര്ത്തിയാകാത്ത കുട്ടികളെ പീഡിപ്പിച്ചുവെന്ന പരാതിയില് മലയാളി വൈദികനായ ഫാ. ജെയിംസ് ചെരിക്കലിനെ (60) പീല് റീജ്യണല് പൊലീസ് അറസ്റ്റ് ചെയ്തു. സിറോ മലബാര് സഭ താമരശ്ശേരി രൂപതാംഗമായ ഇദ്ദേഹം ബ്രാംപ്ടണിലെ സെന്റ് ജെറോംസ് കാത്തലിക് ചര്ച്ചിലെ പാസ്റ്ററായി സേവനമനുഷ്ഠിച്ചു വരികയായിരുന്നു.
കഴിഞ്ഞ മൂന്ന് പതിറ്റാണ്ടിലേറെയായി ടൊറന്റോ അതിരൂപതയുടെ കീഴിലുള്ള വിവിധ ഇടവകകളില് ഇദ്ദേഹം പ്രവര്ത്തിച്ചു വരികയായിരുന്നു. ആരോപണം ഉയര്ന്നതിന് പിന്നാലെ ഡിസംബര് 18-നാണ് പൊലീസ് അറസ്റ്റ് രേഖപ്പെടുത്തിയത്. സഭയുടെ കര്ശനമായ പ്രോട്ടോക്കോളുകള് പാലിച്ച് ഇദ്ദേഹത്തെ ഔദ്യോഗിക സ്ഥാനങ്ങളില് നിന്ന് മാറ്റിയതായി ടൊറന്റോ അതിരൂപത പ്രസ്താവനയിലൂടെ അറിയിച്ചു.
'ലൈംഗിക ദുഷ്പെരുമാറ്റവുമായി ബന്ധപ്പെട്ട ഏതൊരു ആരോപണത്തെയും അതിരൂപത അതീവ ഗൗരവത്തോടെയാണ് കാണുന്നത്. നിയമനടപടികളുമായി പൂര്ണ്ണമായി സഹകരിക്കും.' - ടൊറന്റോ അതിരൂപത വെളിപ്പെടുത്തി.
അറസ്റ്റിനെത്തുടര്ന്ന് സെന്റ് ജെറോംസ് പള്ളിയില് ഡിസംബര് 25 മുതല് ജനുവരി 3 വരെയുള്ള വിശുദ്ധ കുര്ബാനകള് ഉള്പ്പെടെയുള്ള ചടങ്ങുകള് റദ്ദാക്കിയതായി അധികൃതര് അറിയിച്ചു. കനേഡിയന് നിയമപ്രകാരം 16 വയസ്സിന് താഴെയുള്ള കുട്ടികള്ക്കെതിരായ അതിക്രമങ്ങള്ക്കാണ് 'ലൈംഗിക ഇടപെടല്' എന്ന കുറ്റം ചുമത്തുന്നത്.
Related News
