ടെക്‌സസ്: ശാരീരിക പരിമിതികള്‍ സ്വപ്നങ്ങള്‍ക്ക് തടസ്സമല്ലെന്ന് തെളിയിച്ച് ജര്‍മ്മന്‍ എഞ്ചിനീയര്‍ മിഖായേല ബെന്റ്‌ഹോസ് ചരിത്രം കുറിച്ചു. ആമസോണ്‍ സ്ഥാപകന്‍ ജെഫ് ബെസോസിന്റെ 'ബ്ലൂ ഒറിജിന്‍' കമ്പനിയുടെ 'ന്യൂ ഷെപ്പേര്‍ഡ്' പേടകത്തില്‍ ബഹിരാകാശ യാത്ര നടത്തിയതോടെ, ഈ നേട്ടം കൈവരിക്കുന്ന ലോകത്തിലെ ആദ്യത്തെ വീല്‍ചെയര്‍ ഉപയോക്താവായി മിഖായേല മാറി.
ടെക്‌സസിലെ കമ്പനി ബേസില്‍ നിന്ന് പ്രാദേശിക സമയം രാവിലെ 8:15-നായിരുന്നു വിക്ഷേപണം. ഏകദേശം 10 മിനിറ്റ് നീണ്ടുനിന്ന യാത്രയില്‍ മിഖായേല ഉള്‍പ്പെടെ ആറ് പേരടങ്ങുന്ന സംഘം ഭൂമിയുടെ അന്തരീക്ഷവും ബഹിരാകാശവും തമ്മിലുള്ള അതിര്‍ത്തിയായ 'കാര്‍മാന്‍ ലൈന്‍' മറികടന്നു.
യൂറോപ്യന്‍ സ്‌പേസ് ഏജന്‍സിയിലെ എഞ്ചിനീയറായ മിഖായേല, ഏഴ് വര്‍ഷം മുന്‍പ് നടന്ന ഒരു സൈക്കിള്‍ അപകടത്തെത്തുടര്‍ന്നാണ് പക്ഷാഘാതം വന്ന് വീല്‍ചെയറിലായത്. 'നമ്മള്‍ എല്ലാവരേയും ഉള്‍ക്കൊള്ളുന്ന സമൂഹമാകാന്‍ ആഗ്രഹിക്കുന്നുവെങ്കില്‍, അത് ബഹിരാകാശം ഉള്‍പ്പെടെയുള്ള എല്ലാ മേഖലകളിലും പ്രകടമാകണം - യാത്രക്ക് ശേഷം അവര്‍ പറഞ്ഞു. വരുംതലമുറകള്‍ക്ക് ഈ നേട്ടം വലിയ പ്രചോദനമാകുമെന്ന് അവര്‍ കൂട്ടിച്ചേര്‍ത്തു.
ബ്ലൂ ഒറിജിന്റെ പതിനാറാമത്തെ ക്രൂഡ് ഫ്‌ളൈറ്റ് ആയിരുന്നു ഇത്. പ്രശസ്ത ഗായിക കാറ്റി പെറി, 'സ്റ്റാര്‍ ട്രെക്ക്' താരം വില്യം ഷാറ്റ്നര്‍ തുടങ്ങി നിരവധി പ്രമുഖര്‍ നേരത്തെ ഈ കമ്പനി വഴി ബഹിരാകാശ യാത്ര നടത്തിയിട്ടുണ്ട്. നാസ അഡ്മിനിസ്‌ട്രേറ്റര്‍ ജാരെഡ് ഐസക്മാന്‍ മിഖായേലയെ എക്‌സ് പ്ലാറ്റ്ഫോമിലൂടെ അഭിനന്ദിച്ചു. ദശലക്ഷക്കണക്കിന് ആളുകള്‍ക്ക് ആകാശത്തേക്ക് നോക്കി അസാധ്യമായത് സ്വപ്നം കാണാന്‍ മിഖായേല പ്രചോദനമായെന്ന് അദ്ദേഹം കുറിച്ചു.
.jpg)
Related News
