ജിദ്ദ: ടി.എം.ഡബ്ല്യു.എ. ജിദ്ദ സംഘടിപ്പിച്ച 2025 നാനോ ക്രിക്കറ്റ് ടൂര്‍ണമെന്റില്‍ ഹിറ ഹുറികെയ്ന്‍സ് ജേതാക്കളായി. ഇഖ്‌ലാസ് ഗ്രൗണ്ടില്‍ നടന്ന ആവേശകരമായ ഫൈനലില്‍ ഫൈസലിയ യങ്ങ്സ്റ്റേഴ്സിനെ 13 റണ്‍സിന് പരാജയപ്പെടുത്തിയാണ് റിജാസ് അസ്സൈന്‍ നയിച്ച ഹിറ ഹുറികെയ്ന്‍സ് കിരീടം ചൂടിയത്.
ലീഗ് ഘട്ടത്തിലെ കരുത്തരായ ഹിറ ഹുറികെയ്ന്‍സും ഫൈസലിയ യങ്ങ്സ്റ്റേഴ്സും തമ്മിലായിരുന്നു കലാശപ്പോരാട്ടം. നിശ്ചിത ഓവറില്‍ പൊരുതിക്കളിച്ചെങ്കിലും ഹിറ ഹുറികെയ്ന്‍സ് ഉയര്‍ത്തിയ വെല്ലുവിളി മറികടക്കാന്‍ അനസ് അസീസിയയുടെ ഫൈസലിയ യങ്ങ്സ്റ്റേഴ്സിന് സാധിച്ചില്ല.
റിജാസ് അസ്സൈന്‍ നയിച്ച ഹിറ ഹുറികെയ്ന്‍സ്, അനസ് അസീസിയയുടെ നേതൃത്വത്തിലുള്ള ഫൈസലിയ യങ്ങ്‌സ്റ്റേഴ്സ്, മുഹമ്മദ് വി.പി. ക്യാപ്റ്റനായ ഒബ്ഹൂര്‍ തണ്ടേഴ്സ്, അഹമ്മദ് ഷോബിസ് നയിച്ച മര്‍വ റൈഡേഴ്സ് എന്നീ നാല് ടീമുകള്‍ ആയിരുന്നു പങ്കെടുത്തത്.
ടൂര്‍ണമെന്റിലുടനീളം വ്യക്തിഗത പ്രകടനങ്ങള്‍ കൊണ്ട് നിരവധി താരങ്ങള്‍ ശ്രദ്ധേയരായി. ഫൈനലില്‍ നിര്‍ണ്ണായക പ്രകടനം കാഴ്ചവെച്ച ഫുവാദിനെ മാന്‍ ഓഫ് ദി ഫൈനലായി തിരഞ്ഞെടുത്തു. കൂടാതെ, ടൂര്‍ണമെന്റിലെ ബെസ്റ്റ് ബാറ്റര്‍ പദവിയും ഫുവാദ് സ്വന്തമാക്കി. ബൗളിങ്ങില്‍ മാസ്മരിക പ്രകടനം കാഴ്ചവെച്ച ഗുല്‍സാര്‍ ബെസ്റ്റ് ബൗളറായി തിരഞ്ഞെടുക്കപ്പെട്ടു. ടൂര്‍ണമെന്റിലെ ഏറ്റവും മൂല്യവത്തായ കളിക്കാരനായി (മോസ്റ്റ് വാല്യബിള്‍ പ്ലെയര്‍) അനസ് അസീസിയ തിരഞ്ഞെടുക്കപ്പെട്ടു, ടൂര്‍ണമെന്റിലെ അദ്ദേഹത്തിന്റെ ഓള്‍റൗണ്ട് പ്രകടനത്തിനുള്ള അംഗീകാരമായിരുന്നു ഈ പുരസ്‌കാരം.
ഇവന്റ്സ് ഹെഡ് ശംഷീര്‍ കെ.എം.ന്റെ നേതൃത്വത്തിലുള്ള ഇവന്റ്സ് ടീമാണ് ടൂര്‍ണമെന്റ് ഏകോപിപ്പിച്ചത്. നിര്‍ഷാദ്, മനാഫ്, അബ്ദുല്‍ റാസിഖ്, സഹ്നാസ്, സിയാദ് കിടാരന്‍ എന്നിവര്‍ അടങ്ങുന്ന സംഘം ടൂര്‍ണമെന്റ് കുറ്റമറ്റ രീതിയില്‍ നടത്താന്‍ പ്രയത്‌നിച്ചു. വിജയികള്‍ക്ക് ട്രോഫികള്‍ വിതരണം ചെയ്യുകയും കളിക്കാരെ അഭിനന്ദിക്കുകയും ചെയ്തു. കായികപരമായ ഉണര്‍വ്വിനും അംഗങ്ങള്‍ക്കിടയിലെ സൗഹൃദം ഊട്ടിയുറപ്പിക്കാനും ഈ നാനോ ക്രിക്കറ്റ് ടൂര്‍ണമെന്റ് വലിയ സഹായകമായി.
.jpg)
