മാഡ്രിഡ്: ജോലിക്ക് വൈകി വരുന്നത് കുറ്റമാണെന്നറിയാം. എന്നാല്‍, കൃത്യസമയത്തിനും എത്രയോ മുന്‍പ് ഓഫീസിലെത്തുന്നത് ഒരു കുറ്റകൃത്യമായി കണക്കാക്കുമോ? സ്‌പെയിനില്‍ നടന്ന ഈ വിചിത്ര സംഭവം കേട്ടാല്‍ ആരും ഒന്ന് ഞെട്ടും. രണ്ട് വര്‍ഷത്തോളം സ്ഥിരമായി ഷിഫ്റ്റ് തുടങ്ങുന്നതിന് 40 മിനിറ്റ് മുന്‍പ് ഓഫീസിലെത്തിയ 22 വയസ്സുകാരിയായ മിടുക്കി ജീവനക്കാരിയെയാണ് അവരുടെ തൊഴിലുടമ പിരിച്ചുവിട്ടത്. ലോകത്തിലെ ഏറ്റവും വലിയ 'സമയനിഷ്ഠാ പിരിച്ചുവിടല്‍' കേസായി ഇത് മാറിയിരിക്കുന്നു.


സാധാരണ രാവിലെ 7:30-നാണ് യുവതിയുടെ ഷിഫ്റ്റ് തുടങ്ങേണ്ടിയിരുന്നത്. എന്നാല്‍, അവര്‍ സ്ഥിരമായി 6:45-നും 7:00-നും ഇടയില്‍ ഓഫീസിലെത്തും! 'നേരത്തെ എത്തിയിട്ട് അവര്‍ക്ക് 7:30-ന് മുന്‍പ് ഒന്നും ചെയ്യാനുണ്ടായിരുന്നില്ല. പലതവണ വാക്കാലുള്ളതും എഴുതിയതുമായ മുന്നറിയിപ്പുകള്‍ നല്‍കി. 'നിങ്ങള്‍ ഡ്യൂട്ടി സമയത്ത് മാത്രം വന്നാല്‍ മതി' എന്ന് പറഞ്ഞിട്ടും ഈ നിര്‍ദ്ദേശം അവര്‍ തീര്‍ത്തും അവഗണിച്ചു. ഇത് വെറും 'നേരത്തെയുള്ള വരവ്' മാത്രമല്ല, കമ്പനിയുടെ നിര്‍ദ്ദേശങ്ങളോടുള്ള മോശം പെരുമാറ്റം ആണ്!'. ചുരുക്കത്തില്‍, നിയമങ്ങള്‍ അനുസരിക്കാനുള്ള യുവതിയുടെ വിസമ്മതമാണ് തൊഴിലുടമയുടെ കണ്ണില്‍ കുറ്റകരമായത്.

തന്റെ പിരിച്ചുവിടല്‍ അന്യായമാണെന്ന് ആരോപിച്ച് യുവതി സ്‌പെയിനിലെ സോഷ്യല്‍ കോടതിയെ സമീപിച്ചു. എന്നാല്‍, കോടതി യുവതിയുടെ വാദം തള്ളിക്കളഞ്ഞു. നേരത്തെ വരരുത് എന്ന് പലതവണ കമ്പനി ആവശ്യപ്പെട്ടിട്ടും യുവതി അത് ആവര്‍ത്തിച്ച് ലംഘിച്ചുവെന്നാണ് കോടതിയുടെ കണ്ടെത്തല്‍. നേരത്തെ എത്തിയ 19 സന്ദര്‍ഭങ്ങളില്‍ യുവതി ഓഫീസില്‍ പ്രവേശിക്കുന്നതിന് മുന്‍പ് തന്നെ കമ്പനിയുടെ ആപ്പ് വഴി 'ലോഗിന്‍ ചെയ്യാന്‍' ശ്രമിച്ചിട്ടുണ്ട്. (തൊഴിലുടമ ഇതിനെ 'വിശ്വാസ വഞ്ചന'യായി ആരോപിച്ചു).

ഒരു സഹപ്രവര്‍ത്തകയുടെ മൊഴിയനുസരിച്ച്, ഈ 'സ്ഥിരമായ നേരത്തെയുള്ള വരവ്' ടീമിന്റെ ഏകോപനത്തിന് തടസ്സമുണ്ടാക്കി. 'നേരത്തെ എത്തുന്നത് പ്രശ്‌നമല്ല. പക്ഷേ, ഒരു ജീവനക്കാരി ജോലിസ്ഥലത്തെ നിയമങ്ങള്‍ പാലിക്കാന്‍ ബാധ്യസ്ഥയാണ്. സ്പാനിഷ് തൊഴിലാളി നിയമത്തിലെ ആര്‍ട്ടിക്കിള്‍ 54 യുവതി ലംഘിച്ചു.'

ലോകത്തിലെ മറ്റ് പല രാജ്യങ്ങളിലും, കൃത്യസമയത്ത് എത്താത്തതിനാണ് ആളുകളെ പിരിച്ചുവിടുന്നത്. എന്നാല്‍, സ്‌പെയിനിലെ ഈ വിധി നല്‍കുന്ന പാഠം ഇതാണ്: ജോലിസ്ഥലത്തെ നിയമങ്ങള്‍ പാലിക്കുന്നതാണ് സമയനിഷ്ഠയേക്കാള്‍ വലുത്.

നിങ്ങള്‍ ഇനി ഓഫീസില്‍ നേരത്തെ എത്താന്‍ പ്ലാന്‍ ചെയ്യുമ്പോള്‍ ശ്രദ്ധിക്കുക: ഒരുപക്ഷേ, ആ അധിക 40 മിനിറ്റ് നിങ്ങളെ പുറത്താക്കുന്നതിനുള്ള ഒരു 'ഓവര്‍ടൈം തെളിവാ'യി മാറിയേക്കാം!