ലണ്ടന്: ഒരുപാട് പ്രതീക്ഷകളുമായി വിദേശത്ത് വിദ്യാഭ്യാസം തേടിയെത്തിയ ഹരിയാന സ്വദേശിയായ 30-കാരന് വിജയ് കുമാര് ഷിയോറന് യുകെയില് ദാരുണമായി കൊല്ലപ്പെട്ടു. വിജയ് കുമാര് ബ്രിസ്റ്റലിലെ വെസ്റ്റ് ഓഫ് ഇംഗ്ലണ്ട് യൂണിവേഴ്സിറ്റിയില് പഠിക്കുകയായിരുന്നു.
ചാര്ഖി ദാദ്രിയിലെ ജാഗ്രാംബാസ് ഗ്രാമത്തില് നിന്നും വന്ന ആ യുവാവിന്റെ സ്വപ്നങ്ങള് നവംബര് 25 പുലര്ച്ചെ 4:15 ഓടെ വോര്സെസ്റ്ററിലെ ബാര്ബോണ് റോഡില് പൊലിഞ്ഞു. കുത്തേറ്റ നിലയില് ഗുരുതരമായി പരിക്കേറ്റ് കിടന്ന വിജയ് കുമാറിനെ വെസ്റ്റ് മെര്സിയ പോലീസാണ് കണ്ടെത്തിയത്. ഉടന് തന്നെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
ഈ കൊലപാതകത്തില് ഞെട്ടലിലാണ് ഇന്ത്യന് സമൂഹം. സംഭവവുമായി ബന്ധപ്പെട്ട് അഞ്ച് പേരെ പോലീസ് അറസ്റ്റ് ചെയ്ത് ചോദ്യം ചെയ്തുവരികയാണ്. കൊലപാതകത്തിലേക്ക് നയിച്ച കാരണങ്ങള് എന്താണെന്ന് കണ്ടെത്താന് വിപുലമായ അന്വേഷണം തുടരുകയാണെന്ന് ഡിറ്റക്റ്റീവ് ചീഫ് ഇന്സ്പെക്ടര് ലീ ഹോള്ഹൗസ് അറിയിച്ചു.
മകന്റെ മൃതദേഹം എത്രയും പെട്ടെന്ന് നാട്ടിലെത്തിച്ച് അവസാനമായി ഒരു നോക്ക് കാണാനുള്ള നെഞ്ചുരുകിയുള്ള അപേക്ഷയിലാണ് ഇപ്പോള് വിജയ് കുമാറിന്റെ കുടുംബം. വിജയ് കുമാറിന്റെ മൂത്ത സഹോദരന് രവി കുമാര്, വിദേശകാര്യ മന്ത്രി എസ്. ജയശങ്കറിന് കത്തയച്ച് അടിയന്തര സഹായം അഭ്യര്ത്ഥിച്ചിരിക്കുകയാണ്. ഒരു കുടുംബത്തിന്റെ മുഴുവന് പ്രതീക്ഷയുമായി വിദേശത്തേക്ക് പോയ മകന്റെ ശരീരം ജന്മനാട്ടിലേക്ക് തിരികെ കൊണ്ടുവരാനുള്ള കാത്തിരിപ്പിലാണ് ആ ഗ്രാമം.
Related News
