മുംബൈ: ഇന്ത്യന് സിനിമയുടെ കരുത്തുറ്റ മുഖം, ബോളിവുഡിന്റെ പ്രിയപ്പെട്ട 'ഹീ-മാന്' ധര്മേന്ദ്ര (ധരം സിങ് ഡിയോള്) വിടവാങ്ങി. തൊണ്ണൂറാം പിറന്നാളിന്റെ നിറവിലേക്ക് കടക്കാന് കേവലം ദിവസങ്ങള് മാത്രം ബാക്കിനില്ക്കെയാണ് മുംബൈയിലെ വസതിയില് വെച്ച് ഉച്ചയ്ക്ക് ഒരു മണിയോടെ അദ്ദേഹത്തിന്റെ അന്ത്യം സംഭവിച്ചത്. സംവിധായകന് കരണ് ജോഹര് എക്സിലൂടെ പങ്കുവെച്ച കുറിപ്പിലൂടെയാണ് സിനിമാലോകം ഈ വിയോഗവാര്ത്ത അറിഞ്ഞത്.
കഴിഞ്ഞ രണ്ടാഴ്ചയായി അദ്ദേഹത്തിന്റെ ആരോഗ്യനിലയെക്കുറിച്ച് അഭ്യൂഹങ്ങള് നിലനിന്നിരുന്നു. ശ്വാസതടസ്സത്തെ തുടര്ന്ന് ബ്രീച്ച് കാന്ഡി ആശുപത്രിയില് ചികിത്സയിലായിരുന്ന അദ്ദേഹം വീട്ടില് തിരിച്ചെത്തിയെങ്കിലും, വിധി മറ്റൊന്നായിരുന്നു. 1960-ല് 'ദില് ഭീ തേരാ ഹം ഭീ തേരെ' എന്ന ചിത്രത്തിലൂടെ വെള്ളിത്തിരയിലെത്തിയ ധര്മേന്ദ്ര, ആറ് പതിറ്റാണ്ടോളം ഇന്ത്യന് സിനിമയില് നിറഞ്ഞുനിന്നു. ലളിതമായ റൊമാന്റിക് നായകനായി തുടങ്ങി, പിന്നീട് ആക്ഷന് സിനിമകളിലൂടെ ജനഹൃദയങ്ങളില് ഇടംപിടിച്ച അദ്ദേഹം 'ഷോലെ'യിലെ വീരു ഉള്പ്പെടെയുള്ള അനശ്വര കഥാപാത്രങ്ങളിലൂടെ ഇന്നും ജീവിക്കുന്നു.
പത്മഭൂഷണ് നല്കി രാജ്യം ആദരിച്ച ഈ പ്രതിഭ, വെള്ളിത്തിരയ്ക്ക് പുറമെ കൃഷിയിടങ്ങളിലും സജീവമായിരുന്നു. ഡിസംബര് 25-ന് റിലീസ് ചെയ്യാനിരിക്കുന്ന 'ഇക്കിസ്' എന്ന ചിത്രത്തിലൂടെ അവസാനമായി വെള്ളിത്തിരയില് മിന്നിമറയാന് ഒരുങ്ങുമ്പോഴാണ് ഈ അപ്രതീക്ഷിത വിടവാങ്ങല്.
Related News
