ദമാം: നിര്‍ധനരായ 40 ഭിന്നശേഷിക്കാര്‍ക്ക് മക്കയിലെത്തി ഉംറ നിര്‍വഹിക്കാനും മദീന സന്ദര്‍ശിക്കാനും ദമാം കെ.എം.സി.സി അവസരമൊരുക്കുന്നു. ഈ മാസം 23ന് കരിപ്പൂരില്‍നിന്ന് പുറപ്പെടുന്ന സംഘം ഏഴ് ദിവസത്തോളം പുണ്യസ്ഥലങ്ങളില്‍ ചെലവഴിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. കഴിഞ്ഞതവണ പാര്‍ട്ടി പ്രവര്‍ത്തകരായ 100ലേറെ പേര്‍ക്കായിരുന്നു ഉംറചെയ്യാനുള്ള അവസരമൊരുക്കിയത്.
ഇത്തവണ ഭിന്നശേഷിക്കാര്‍ക്ക് അവസരം നല്‍കാന്‍ തീരുമാനിക്കുകയായിരുന്നു. പരസഹായത്താല്‍ കഴിയേണ്ടി വരുന്നവരാണ് അധികവും സംഘത്തില്‍ ഉള്‍പ്പെട്ടിട്ടുള്ളത്. അരക്ക് കീഴ്‌പോട്ട് തളര്‍ന്നുപോയ നാല് പേര്‍ക്ക് വില്‍ച്ചെയറിനോടൊപ്പം ഒരു സഹായി കൂടി ആവശ്യമാണ്. കണ്ണുകാണാത്തവര്‍. രണ്ട് കൈയ്യും നഷ്ടപ്പെട്ടവര്‍, കാന്‍സര്‍ ബാധിച്ച് ഒരു കൈ മുറിച്ചുകളഞ്ഞ വിദ്യാര്‍ഥി എന്നിവരുള്‍പ്പടെ സംഘത്തില്‍ അംഗങ്ങളാണ്.
ദമാം കെ.എം.സി.സിയുടെ ആവശ്യപ്രകാരം മുസ്‌ലീം ലീഗ് പഞ്ചായത്ത് കമ്മിറ്റികളാണ് ഉംറക്ക് അര്‍ഹരായവരെ തെരഞ്ഞെടുത്ത്. പൂര്‍ണമായും പരസഹായം വേണ്ടവര്‍ക്ക് സഹായികളേയും ഉള്‍പ്പെടുത്തിയിട്ടുണ്ട്. നിര്‍ധനരായ മറ്റൊരാള്‍ക്ക് ഉംറ ചെയ്യാനുള്ള അവസരം നല്‍കുക കൂടിയാണ് ഇതിലുടെ ചെയ്തിട്ടുള്ളത്. ദമാം കെ.എം.സി.സിയുടെ വളന്റിയര്‍മാര്‍ ഇവരെ സഹായിക്കാനായി ദമാമില്‍നിന്ന് മക്കയിലും മദീനയിലുമെത്തും. കൂടാതെ മക്ക മദീന കെ.എം.സി.സി പ്രവര്‍ത്തകരും ഇവര്‍ക്ക് അതിഥ്യമരുളും. നേരിട്ട് മദീനയില്‍ ഇറങ്ങി, മദീന സന്ദര്‍ശനം പൂര്‍ത്തിയാക്കിയ ശേഷം മക്കയില്‍ എത്തി ഉംറ നിര്‍വഹിക്കും. പ്രധാന തീര്‍ഥാടന കേന്ദ്രങ്ങള്‍ സന്ദര്‍ശിക്കും. കോട്ടക്കല്‍ അല്‍ ഹിന്ദ് ട്രാവല്‍സ് ആണ് ഇവര്‍ക്ക് വേണ്ട യാത്രാസൗകര്യങ്ങള്‍ ഒരുക്കുന്നത്.
നവംബര്‍ 30-ന് സംഘം നാട്ടിലേക്ക് മടങ്ങും. തീര്‍ഥാടകര്‍ക്കായി മടക്കയാത്രയില്‍ സമ്മാനിക്കാനായി വിവിധ സാധനങ്ങള്‍ അടങ്ങിയ ബാഗും കെ.എം.സി.സി ഒരുക്കിയിട്ടുണ്ട്. പ്രസിഡന്റ് സൈനു കുമളി, ജനറല്‍ സെക്രട്ടറി മുജീബ് കൊളത്തൂര്‍, പദ്ധതി ജനറല്‍ കണ്‍വീനര്‍ അസ്ലം കൊളക്കോടന്‍, കോഓഡിനേറ്റര്‍ മഹമൂദ് പൂക്കാട്, ഖാദര്‍ അണങ്കൂര്‍, ഷിബിലി ആലിക്കല്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
Related News
